Lalchhungkaw induhsakna hi

Sorkarna chang­tu apiangah Lalchhung­kaw induhsakna a nasa tiin kan au kan au ṭhin a, tuna sor­kar mekah pawh Lal­chhungkaw induh­sakna tiin sawi a ni leh fo a, a bikin Chief Minister a kawk deuh ruih ṭhin.

Eng party sor­karah pawh induh­sakna uchuak a awm deuh zel a, Chief Minister chauh hi Lalchhungkua an ni lo a, Minister leh party hruaitute hi duhsak uchuak nei thei an ni a, an nei ngei bawk ṭhin. Party mi, an sorkar theihna tura theihtawp chhuaha campaign

ṭhinte aiin tute emaw duhsak hleihluak a, an duhsakna man an hnena let leh thei an hre riau niin an sawi.

Department hrang hrangah contract hna­thawh a tam a, chungah chuan thawk thei bik riau leh duhsakna dawng bik riau, party workers ni si lo an tam hle. Entir nan department pakhat hnuaiah hna nasa taka thawh a ni a, chungte chu tender a nih hriat a ni ngai lo a, a thawktu mi pahnih khatin an thawk ngawt ngawt mai tihte hi kan lo hre ve hlei hlui a, a hlawkna engzat percent nge Minister-ah lut ang tihte thlenga sawi a tam hle.

Chutiang bawk chuan Minister dangte department enkawlah hian duhsakna dawnga thawk ngawt ngawt an tam mai. Hei vangte pawh hi a ni ang, Minister-te hlawh leh hamṭhatna an dawn aṭanga an thehchhuah leh hisap hian, dik taka sum lakluh loh a tam tih hi a hriat a ni. Eiru rau rauah mirethei leh harsa hnenah sum a lut leh erawh hi chu a ziaawm phian. Officer eiru, an eiruk sum an chhungkaw bil chauha an dah hmak ang ai chuan.

Enga pawh chu nise, sorkarna chang mektute zingah pawh Lalchhungkaw induhsakna a lian em em a, contractor zingah pawh a che thei chin chu an in haivur thur thur a, a che thei lote chu an bet ngawih ngawih mai a nih hi. Minister thawhpui thiam chuan contract hna a thawk ur ur a, an inthurual hle tih pawh a lang reng a, hai rual a ni lo.

Mahni party mi leh sa, an sorkar theih nana a kula taia thawk, an sorkar hnuah Minister belh bik nei lote an rozia hmuh hian Lalchhungkaw induhsakna a awm tih hi a hriat hle a ni. Party office-ah han kal i la, office nghak peih leh thawk peih deuhte an ro hle tih hriat phei chuan induhsak bikna a nasa tih hi kan lo hmuh ve dan chu a ni e.

- Lalkhirhvela