FAPA RANGKACHAK JEREMY-A

India ramah hian mihring 1,388,052,928 (1.38 billion As of January 7, 2022, https://www.indiaonlinepages.c...) kan cheng mek a, mi vaibelchhe za chuang aiawha fehchhuah hi a namai lo. Kumpinu khawpuia ram nitla seng lova roreltute ram awp ṭhin khawvel huap inelnaa a ṭha ber nih hi thil awlsam a ni lo. Mahse tih theih loha lang titheitu chu Mizo tlangval Jeremy Lalrinnunga a ni.

He naupang danglam tak hian kum 9 mi a nih laiin an chhungkua a ngaihtuah thleng phak daih tawh! An chhungkaw dinhmun a ngaihtuah a, an harsat dan leh an hmakhua a thlir thiam a, an chhungkaw tana engemaw tal thawk chhuak ve turin Pune-ah kal turin a rilru a siam thei tlat a, naupang danglam tak leh tumruh tak a ni. Chu a tumruhna chuan a Pa leh an chhungkaw thinlung a khawih danglam a, kum 9 mi a nihin chhungkua ngaihtuahna nen a fehchhuak ngam tawh.

Naupang inthunun thei tak, tumruh êm êm, thil ṭha lo laka insum thei, hmel hlim tak pu reng thei he tlangval hi a chhuanawm a, a nu leh pa a chawimawi dânte hi a mawi mang e! Hlawhtlinna tura pawimawh tumruhna leh mahni inthununna a nei ṭha êm êm a, hei hi ṭhalaiten i entawn ang u. Mizo ṭhalai, talent nei ṭha si, mahse discipline chhiat avanga pâr chhuak ve ta lo tam tak te kha an uiawm mang e. Jeremy-a nun aṭang hian i zir thar leh ang u.

Infiamna lama hlawhtling mai a ni lo; India leh Mizoram tan fapa rangkachak a ni. Chung zawng zawng chungah chuan an chhungkaw tâna fapa rangkachak a nihna hi a hlu hle. A pa zu in ṭhin a fuihna hi a ropui asin: "Ka Pa, zu lo nghei rawh, India track suit i ha hman lo ang e" tia ani naupang te in a pa a fuihna chuan a pa zu in a simtir chiang teh asin! Chhungkaw tana fapa rangkachak a va ni em! A fapa chu India aiawhin a fehchhuak ta fo a, a pa pawhin a fapa India track suit chu a ha thei ta ngei mai.

Jeremy-a nunah hian Mizo ṭhalaiten zir tur kan ngah. Kum 9 mi a nihin a fehchhuak a, a chanchin kan hriat zui chu India tan Gold Medal a rawn hawn tih hi a ni. Mizo ṭhalai, phaia lehkha zir, hnathawk leh inhlawh tura chhuk hi ka hmu ve ta nual, mi tam tak chuan an nu leh paten thlantuia bual pawisate chu nawmchen nan leh hur nan an hmang ral a, an nun an tichhe mek a ni. Hna chu an thawk a, pawisa pawh an tlachham lo, mahse an nun hloh ta si hi ka hmu ve ta nual mai. Pawisa chu an nei a, mahse nun an hloh si. Jeremy-a erawh chu chutiang a ni ve lo. An chhungkaw dinhmun a hre chiang a, a thil tumah a chiang a, nawmchenna leh holam takin a nun a hmang ve lo.

A nu leh pa in an fapa, phaia awm Mizo nunzia a hloh lohna tur leh rinna kawnga a bo lohna tura an umzui dan hi a ngaihnawm a, phone text hmanga Pathian thu hmanga an umzui ṭhin rah an seng a ni. Jeremy-a chuan a hlawhtlinna bulpuiah Pathian a hmang thiam ta. A chakna thurukah Pathian a hmang tlat a, a chawimawi ṭhin Pathian chuan a chawimawi ve ta thung a nih hi.

Jeremy-a Gold Medal kalkawng hautakzia hi chawimawina nopui phênah hian kan theihnghilh loh a tha awm e. Inhliam chunga khatiang inelna hautak hmachhawn kha a namai lo. Infiamna tualzawla inhliam vanga a tluk rap rap tawh hnua a rawn thochhuak leh ṭhin khan a tumruhzia a entir a. Pathian chauh beiseia a rawn pênchhuak ngam kha a huaisenthlak a, a rinchhan Lalpa chuan a hun takah a ṭanpui ta reng a ni. Pathian ring ngam tak takte nunah hian Pathian hnathawh ropui a thleng ṭhin a ni.

Jeremy-a hlawhtlinna hian Mizo ṭhalaite thinlungah thu sawi thar leh sela. Tumruhna, taihmakna, chhelna, insumtheihna zawng zawng belhkhawm hian hlawhtlinna a siam a, a tâwpkhawka chuang erawh chu Pathian a ni. Pathian ṭihna nen chuan engkim a lo tih theih a ni tih hi Jeremy-a nunah hian a hmuh theih awm e. Mizoram fapa rangkachak, India chhuanvawr Jeremy-a Commonwealth Games Gold Medalist thinlung takin kan lawmpui kan hlan a, hmalam pan zel turin duhsakna kan hlan e.

Kan mi hmasate hunlaia zirna lama 'Mizo uisa ei thluakin a tlin lo' an tih thin kha zirna lamah chauh ni lovin infiamna leh thildangah pawh kan ṭhalai chhuanawm tak takten dâwtah an chantir zel a, he Mizo thluak leh theihna hian a duh phawt chuan a tum ram a thleng thei a, India ram ropui meuh pawh a sawi nghing thei tih hi Jeremy-a nunah hian a takin kan hmu. "Mizo kan ni, kan hmel a ṭha, kan tum a sâng bawk si" tia kan ṭhalaite hmalam pana nawr kaltu lo ni mawlh rawh se.

- PC Nghaklianmawia