Vawk hri lengah kan tiṭha em?
Vawk hri chi khat, African Swine Fever vangin Mizoram vawk tam tak suat a ngai a. Vawk vulhtuten hun leh tha tam tak an sen chu a lo thlawnin an vawk a thih avangin an hloh a ni ber a, mahse tunah hian central lam aṭanga vawk thi tanpuina lokal hi an dawng ngei dawn niin a lang ta a, an lawmpui awm hnuhnawh.
Hetihlai hian ASF vanga vawk tam tak kan tih thih tawh avang hian Mizoram sorkar chaklohzia a lang chiang em em thung a ni.
Mizoram sorkar khan ASF vanga vawk thi tihtawp an tum thu nikum lam daih tawh khan an puang dum dum a, mahse hei tunah pawh ASF vanga vawk thi hi khaw hrang hrangah a la awm fo mai a. Hei hian Mizoram sorkarin vawk hri a thunun hneh lohzia a tilang chiang hle mai a, sorkar chak lo a ni tih a lang chiang viau.
Vawk pul hri hmachhawn danah Mizoram chu India rama tiṭha ber kan ni tia puangin AH & Very Minister an chhuan thu MNF party thuchhuah chuan a tarlang hial kha a ni a. Minister hian theihtawp a chhuahna avangin Mizoram hi ASF management-ah India rama tiṭha ber kan ni, ti zawngin thuchhuah an siam hial kha a nia.
MNF party thuchhuah hi ka han chhui chiang deuh a, Mizoram chauh hi vawk suat compensation dawng tur kan nih thu te an tarlang a. Mahse vawk pul hri hian hmar chhak state hrang hrang a tuam a. Mizoram hi inveng tha lo ber pawl kan ni zawk - vawk thih tamna ber kan ni tlat.
Mizoramah vawk cheng vaibelchhe 60 chuang man kan ti thi tawh a, heti chunga vawk pul hri avang kan Vety Minister han fak ngam hi thil mak tak a ni. Mizoram pumah vawk pul hri hi a leng a, khawiah mah kan in veng tha lo tihna a nih chu!
Mizoram pumah vawk hri leng kan thunun theih loh laiin ASF hri len ve thona hmar chhak state ṭhenkhatah chuan he hri hi an thunun thei bik tlat thung a ni. Kan tehnawm Manipur, Meghalaya, Tripura leh Sikkim ahte pawh hri hi a leng; Mizoram anga chhiatna rapthlak thleng loin an sorkarin vawk vulhtute hmakhua an ngai a. State dang angin vawk lak luh kawngah te dan mumal kan chelek ngam lo nge tih tur khawpin Mizoram chuan he hri hi kan tuar na ta ber niin a lang.
Vawk hri thunun thei lo leh a tuar na ber state kan ni chunga a ti ṭha ber anga thuchhuah hmanga sorkarin hna thawk tha nih a tum hi thil zahthlak lam a ni zawk lo maw?
- Lal Remtluanga