Mizoramah MNF aiin Congress an hlawhtling zawk

Indian National Congress hi 1885-ah Indian Nationalism humhalh leh chhawm chhoh zelna atan din a ni a. Chumi hnu kum 66 hnuah April ni 11, 1961 khan Mizoramah pawh Congress hi din a lo ni ve ta a. Remna thu emaw Mizoram hmasawnna emaw leh thil dang dangte mipui hnenah sawi ve bawk ṭhin mahse INC hi chu India hnam zia luipuia in hruai luh chu a goal lian ber a ni a. A tawi zawngin India-a luh ngheh zirna hmun a ni.

Hemi lehlam chiah atan hian Mizo Nationalism tun din a, Pathian leh kan ram tan tia pawl lo piang leh chu Mizo National Front a ni a, October ni 22, 1961-ah a ding ve ta a ni. Political party ding hmasa ber Mizo Union khan India aṭanga in lakhran an tum lova, Assam aṭanga chhuak a state pakhat nih ve an tum ber. An hla-ah pawh "Aw lo eng rawh state ram ṭhal tui ang kan nghak che" an ti a ni.

MNF erawh chuan Mizo Nationalism tun din a, mahni ke-a dinga India (vai) zia ni lo, Mizo nunze dik dinchhuah tir an tum thung. Chumi atan chuan kum 1966 khan India awpbehna ata talchhuah tumin Independent an puang a, ralthuam an neih ang ang leh an finna zawng zawngin Mizo Hnam rilru chu nasa takin an tuh a, an duhthusamin Independent te hmu lo mah ila, kan hnam leh kan sakhua Kristianna hum him zel duhna thinlung an tuh a ni.

Amaherawhchu, over­ground-a an lo chhuah leha kum 10 lai an sorkhar chhung khan kawng tam takah hnam rilru puin hna thawk mahse vai zia kan lo ṭhan hnan nasat tawh avangin duhthusamin an hlawhtling lo. Chuti chung chuan vawiin thlengin Mizo Nationalism chu ṭhangtharte-ah an la tuh ta ṭang ṭang a, an hlawhtlinna erawh a sang hlei thei lo. Congress lam erawh chuan India rama a din chhan ang ngeiin Mizoramah pawh zawi zawiin vai zia an tuh a, an hlawhtling hle.

1) Corruption-ah: British hun laia corruption kan hriat ngai meuh loh chu India-in mahnia ro a inrel chinah hian a nasa ta em em a, corruption lian chin vaibelchhe tel hlir pawh item 123 ngawt a awm a, chu chu India zepui a ni. Central-a Congress kum 60 an lal chhunga thil thleng deuh vek a ni. Kum 2012 chhunga eirukna ngawt pawh vaibelchhia hlira vaibelchhe tam tak a ni. He corruption zia hi Mizoramah pawh a hlawhtling hle. Tun hnaia mi ngawt pawh a tam em em a ni. Hei hi India zia Mizorama a siper kan lo entawn ve a ni - Congress hlawhtlinna.

2) Thu dik chanvea Politics khelh: India ram ze pakhat chu thu dik zik tluak lo hmanga voter-te thlem thluk a ni. Mizoramah pawh hian chu chu a hlawhtling hle. Mi hlemhlete an hamṭha-in a lang fo tlat. Thu puarpawleng kan lawm tawh zawk - Congress hlawhtlinna bawk.

3) Kan Kristianna tihdal: India zepui chu Kristianna tih dal a ni a, he zia hi Zoramah a hlawhtling viau. Tunah phei chuan Hindu sakhaw tih dan chal hnawih sen te, coconut sawh keh te pawh kan ngai thiam em em tawh a, Congress mi ni kher lo pawhin thui tak kan ngaithiam tawh. Kan Kristianna a dal ta hle - Congress hlawhtlinna tho.

4) Inbumna: India ramah hian sum leh pai hmanga inbumna hi a nasa a, tangka inpuk pe leh duh lo te, sumdawnna lem ti an tam em em bawk. Chu zia chu Mizoramah pawh a intuh nghet ta hle mai. Hei hian Congress party hlawhtlinzia a tilang chiang hle - Vairam zia kan lak a ni deuh ber.

5) Mirethei behchhana Politics khelh: India rama Cong­ress zepui pakhat chu mirethei siam tam a, sum hmanga vote zawn. Hei hi Mizoramah pawh a hlawhtling hle. Kan lo rethei a, inthlan dawna cheng sanghnih khata lei kan awl ta em em a, chu chu kan politics khelh phung a ni ta deuh ber mai. Hemi thu-ah hian Congress chu tumahin an tluk lo. He zia hi Party dang pawhin an ching ve viau tawh.

6) Nawrh: Heng bandh, dharna, kawng zawh te kan lo chin tak em em te hi vairama an tih dan kan lak deuh vek a ni. Sorkhara lungawi lohna nei tam takin nawrh dan chi hrang hrang an huaihawt ṭhin. Hei pawh hi India mi tam tak zia a ni.

7) Hlemhletna: Vai ramah hian inbumna chi hrang hrang a tam a, hei hi Mizoramah pawh kan hriat loh hlanin kan lo entawn nasa ta hle mai. Mizote kha chu tlawmngai, rinawm, huaisen, taima an ni ṭhin kha a ni a. Mahse chu chu vai ziain a thlak nasa ta hle mai. Congress hlawhtlinna chikhat. Hnam rinawm lo, hlemhle kan lo ni ta a ang hle.

8) Kutdawh rilru: Mizoram Congress hian hman ata tawh Central zem zen kan ni tih an sawi fo ṭhin a, midanga innghat tihna a ni. Kum 20 kal ta velah phei kha chuan Vai buhfai ei ṭheuh ṭheuh engah nge kan Congress loh bik lem ang le ti tawk te pawh an awm kha, chu rilru chu zawi zawiin mipuiah an tuh a, tunah chuan ngaiah kan neih ta der mai. Congress ni kher lo pawhin midanga innghahna riltu kan pu ta vek mai. He thu-ah pawh hian Congress chu an hlawhtling thlawt a ni.

9) Chakma: MNF-in Chakma Autonomous District Council thiah an tum a, MNF leh India inbiak lai pawhin an sawi. 1998-a MNF a sorkhar tirh khan CADC ṭhiah an sawi ri a, mahse an ṭhiat lo, an hlawhchham. Mizoram Congress erawh chu Chakma District Council petu kal zel leh vulh liantu an ni a, an hlawhtling hle. Chu an hlawhtlinna chu kan ram tan kumkhaw phur rit a ni chho mek. Tuikuk chhawmdawl an buaipui leh mek.

Sawi tur a tam viau. MNF-in Mizo Nationalism tun din an tum a, tunah chuan za-ah 30-in an hlawhtlingah ngai ila, Congress-in Indian Nationalism lamah min hruai an tum a, za-ah 70-in an hlawhtling ti ila a dik mai awm e.

- Rualkhuma Hmar