LAL ISUA KAN NEI

Aizawl tlâk lam a ni a, ruah a sur deuh cherh cherh reng a. Lei tawlh fo chuan in leh lo a ti chhe mêk a, eng chen nge lei hi a chêtin a tawlh ang a, in leh lo hi a tihchhiat belh zêl ang tih chu chulai hmuna awmte ngaihtuahna luahtu lian ber a ni.

In ṭha pui pui leh man to tak takte chu lei tawlh chuan a hnûk liam tawh a. Mi tam takin an in leh lo luah ngam loin chulai hmun chu an chhuahsan tawh bawk. Khawtlâng, Kohhran leh ram pawh an buai ru a, theihtawp chhuahin chu lei tawlh zêl chu tihtâwp dan tur an ngaihtuah a ni.

Chu leiminna aṭanga hla vak loah chuan hmeithâi pakhat a awm a, a vah te pahnih nen. Hmeichhe awmnêm, pasal sûn tawh, fa sûn tawh a ni. A pasal boral ta in chu rochunin a vah te pahnih chu a awmpui a. A vah te tan chuan a ni chu engkima engkim a ni.

Zana ruah a sûr châng te, an ṭhen­awmte in leh lo lei tawlhin a tihchhiat lâi te chuan rilru mangang ru takin hun a hmang ṭhîn a. Mahse tih theih engmah a nei lo. A vahte thlamuanna nimah se a ni ngei pawh chuan thlamuantu a mamawh.

An in leh lo te chu a min ve ang em? Engtin zêl nge an awm ang? Chûng zawhnate chuan a rilru a luah reng a, mahse engmah tih theih a awm lo.

Tunah chuan Ai­zawlah in leh lo ṭha, hmun nghet neih chu thil harsa tak a ni tih hre chiang bertu an ni. Chung harsatnate chu hriat pui ve lo ang maiin lei chu a tawlh leh ṭhîn a. Biak In sak zawh ṭêp tawh te pawh chu a innghahna lei a khîk tawh avangin an chhu chhe leh mêk a ni si.

Leiminin a tih­chhiat vanga in leh lo nei lote chu an ṭhenawm te inah an riak a. Chhuatah mu-in mikhual an va ni a, chutih ruala an vênga Zonunmawi lo lang chhuak chu hmuh hmai rual a ni lo. A thlum a al eiza in, an lunngai tlângin an thlaphâng tlâng a, hlimna tur a awmin hlim takin an nuiza bawk.

Chûng zawng zawng te chu chu lai hmun ah chuan a thleng tawh a, a thleng mek a, engtikah nge a tawp ang le? An in leh lo la chhe ve lo te pawh chuan chung chhiatna chu an chungah a thleng ve thei tih chu ngaihtuahna mai ni loin an mit ngeiin an hmu a, engkim chân vek thei an ni tih an hre chiang hle.

Chu hmeithai,

ṭawngkam danga nuthlawi, nep ve tak pawh chuan chung thil chu a ngaihtuah thleng vek a, mutmu pawh nghar mut bakin a tuah meuh tawh lo.

"A Nî, engtik thleng nge lei hi a tawlh zêl ang le?"

"Bawihi, ka hre bîk hauh lo mai!"

"Kan in te hi min ve ta vek se khawiah nge kan awm tâk ang le?"

"Bawihi, ka hre bîk hauh lo mai! Thil pakhat chiah ka hria"

"Chu chu enge ni ã Ni?"

"Lal Isua kan nei"

- Rinfela Zadeng