KHAWṬHA HNUAIAH KUM 10 CHUANG CHHUNGA KAWNG CHHIAT BER ṬUM KUM 2019-2022
Congress in kum 10 chhung ro an rel a, hemi chhung hian Mizoramah kawng tam tak an siam thar a, kawngpui chhe deuhte an thawm ṭha a, kawngte ṭha taka chei hunlai an nei. Nimahsela kum 10 an sawrkar hun tawp kum 2017 & 2018 lamah erawh Mizoramah ruahpui vanawn a sur avangin kawng ṭhasate pawh sabereka khuangkaihin nasa takin a tichhia a, chu'ng kawng chhiate chu vanpui kum tluanin a buak hawk hawk ṭhin avangin siamṭhata thuamṭhat ngaihna a awm lo va, khuanu rorel avanga kawngchhia chu Mizoram mipuiin nasa takin kan tuar a, hemi kan tawrhna hi khatih hunlaia opposition party MNF te chuan hmingṭhatna lak tumin sawrkarna changtu Congress sawrkar chu tihhmingchhiat tumin nasa takin an chirhtheh a, hetianga an thiltih avang hian MNF party chu an hlawhtling reng a ni.
Mizorama ruahsur zirchiangtu State Metereological Centre hnenah an record dil chhuah a ni a, an record-ah chuan kum 2017 khan Mizoramah thla tin ruahsur chawhrual chu 224.892 mm niin, furpui vanglai June thla phei kha chuan ruah a sur hnem hle a ruah hi 743.5 mm hial a tla a, hemi kum hian fur hi a inṭan hma hle a, April thla aṭanga inṭanin Ocotober thla phei kha chuan ruahpui 329 mm hiala tam a la tla a ni. A kum leh 2018 khan kum hmasaa heng ruahpuiin kawngpui nasa taka a tihchhiat siamṭhat hna thawh hman lek lovin January thla aṭangin ruah a sur ṭan avangin kawng siam hna thawk thei lovin khawchhia chuan sawrkar kut a phuar tlat a, January aṭanga September thla thleng khan thla tin ruahsur chawhrual chu 184.11 mm niin kawng siam tura hnathawh a ṭan ve theih hun meuhah MLA inthlanna avangin kawng siam hna a thawh theih ta loh a ni.
MNF sawrkar hi kawng siam ṭha tur hian khuanu malsawmna dawngin sawrkarna an neih ṭan thla December thla khan ruah a tla miah lo va, khua hi an nei ṭha chho hle a, kum 2019 kha kum 3 chhunga ruahsur a la tlem ber ṭum niin August thla thleng khan chawhrualin ruah hi thla tin 165.84 mm a tam a tla a, amaherawchu kawng siamhna hi ruah hmi a tla dek deka hnathawh an chawl nghal a, MNF Sawrkar tharin kawng a siam ve tlem te chu Covid avanga ram chhungah motor reng reng a tlan theih loh hunlai chiahin hun rei lo te chhung chauh a daih a, kawng siam tura mawhphurhna latu PWD changtu Pu Zoramthanga hi kawng siamna pawisa dah theitu thuneihna neitu niin Finance Deptt. changtu leh, Mizoram Chief Minister meuh a nih avangin tu mitmei ven ngai lovin khaw ṭha hnuaiah kawng ṭha kan neihna tura hma la thei a nih avangin, Mizoram mipuiin MNF sawrkarah kawng ṭha nei turin beiseina kan neih san tehlul nen, tun kum 10 chhungin Mizoramin kawng kan la neih chhiat ber ṭum a ni lawi si a, a vawi khat nan kawng chhiat avangin tlan lo turin inkhap hial a lo ngai ta a, Mizoram chaklakna ber kan National Highway te chu dil emaw tih theih hial khawpin a lo chhe ta!
He Mizoram kawngchhiat chungchangah hian a mawhphurtu Pu Zoramthanga leh a kaihhruai MNF sawrkar hi tun Mizoram kawngchhiatna chhan chu a ngaihna an hriat thlawt loh avang a ni tih anmahni hian pawm ngam rawh se.
Source: Meterological Centre, Directorate of Science & Technology
- Lalhruaitluanga Bawitlung