Lehkha chhiartute hlutna

Science thiamna hmanga khawvel hmasawnna hi nasa taka a zuan avangin thiltih a awlsam a. Internet khawvela kan chen tawh avangin lehkhabu kêua hun hmang hman hi kan awm meuh tawh lo. Chutih lai chuan lehkhabu hlutna chang hria mi tam tak kan la awm e.

Zirna huang hian internet lama hriatna hnâr aiin lehkhabu aṭanga hriatna hnâr neih hi a dah sang zawk. Hna sang kan exzam dawn pawhin lehkhabu chhiar tam a ngai ṭhin. Khawvel ram ropui hruaitute hi lehkha chhiar nasa an ni. Mizorama kan ram hruaitu ṭha leh langsarte pawh hi lehkhathiam leh lehkha chhiar nasa an ni zel.

Lehkha chhiar tur chuan hun, sum leh pai leh taimakna neih a ngai. Lehkhabu chhiartu leh lei tute hi mi hausa leh mi hman tak an ni bik lo. Anni hi awm lo ta se, lehkhabu ziaktute tan hian lehkhabu tihchhuah zel ngam a ni lo ang a. Lehkhabu ṭha chhiar tur kan nei lo thuai ang a, hnam ropui leh fing, ram leh hnam hmasawn nih zel a harsa ngawt ang.

Lehkhabu ṭha, bu 3000 aṭanga bu 10000 dâwn kan la hralh zo thei te hi a thlamuanthlak. Lehkhabu dawr ṭha tak tak kan la nei te, social media kal tlanga lehkhabu kan la zuar thei te hi a lawmawm viau.

Sum tam tak nei, lung chhuak si loa khawlkhawm a, hum tlattu chuan ram a ti rethei a ni. Lehkhabu leia a sum leh hun senga lehkha chhiar ṭhin chu kan ram leh hnam hmasawnna kengtu a ni.

Lehkhabu chhuah­na/ chhutna dawr changtlung tak kan nei chho mek zel te hi a ṭha a lawmawm a ni. Lehkhabu ṭha lo chhuahna bul chu a chhiartu kan la awm zel vang a ni.

Anniho vang hian Mizo ṭawng a hausak phah a, lehkhabu ṭha leh rotling a chhuah zel theih phah bawk a ni. Lehkha chhiartu hi nei lo ila chuan lehkhabu tam tak hi chu a chhuak tawh lo ang a, a chhuah pawhin a hlu lo ang. Lehkhabu hlutna vawrtawp chu a chhiar tute hi an ni.

Ram leh hnam rohlu i ni a, i hun hlu leh sum senga leh­khabu leh chan­chinbu te i lo leia i chhiar avang hian Mizoram leh Zofate hian kan zah che a ni.

Lehkabu leina leh chhiarna atana sum i lo insen ṭhin avang hian chawimawi leh zah i phu e. Internet ringawt bih loin hma sawn turin lehkhabu i chhiar zel ang u.

- Rinfela Zadeng