RAM NATH KOVIND

Kan President thar chu Uttar Pradesh-a Kanpur khaw chhuak, hnam hnufual, Dalit zinga mi, Ram Nath Kovind a nih hmèl ta hle a, July 17, 2017-a vote thlak hunah, a tlinna khawp vote a hmu phâk dawn nia ngaih a ni.

Dan hre mi, lehkha thiam tak, thawm na lo leh pa inhrosa lo tak, he hna chelh tura rin kaite sawi nikhuaa vawi khat mah sawi lan ve loh ni mah se, Raisina Hill-ah a pém ngei dawnin a lang a, eptu pawlte candidate, IFS officer hlui leh Lok Sabha Speaker hlui, Meira Kumar-i chuan a hneh lo deuh dawn a nih hmel. Meira Kumar-i hi kan politician lar, hnam hnufual hruaitu langsar, Jagjivan Ram-a fanu a ni a, ani kha a thau-in a chak lo ve khawp a, Lammuala Indira pavillion-ah ṭhu chunga thu a sawi kha, ṭhenkhat chuan in la hre mai thei.

President candidate atana NDA-in Bihar Larsap, Ram Nath Kovind an thlang thut mai hi a hria apiangin mak an ti a ni ber a, candidate tur dap tur hian senior Cabinet minister - Rajnath Singh, Arun Jaitley, Sushma Swaraj, Venkaiah Naidu, Ananth Kumar leh Thawarchand Gehlot-a telna committee an din nâ a, anni pawh hian engmah an hre chuang lova, BJP thuneitu sang, Parliamentary Board pawhin an hre hek lo. Hemi chungchanga thu tawp siam tura June ni 19-a an ṭhutkhawm pawhin member dangte chu an bangbo hneh hle a, PM, Narendra Modi leh BJP President, Amit Shah chauh lo chuan engmah an hre lo takzet niin an sawi. June ni 18 zanah khan anni pahnih hian Kovind-a hi an be fel chiah a, amah pawh a ṭháwng khawp mai a, a chhungte, Singapore-ah an zin bo vek si a, haw thuai turin a chah nghal rum rum nghe nghe a ni awm e.

A tûka BJP Parliamentary Board an han ṭhu khawm pawh chu an rei lo khawp mai a, an tih dan pangngaiin member dangte chuan, 'Kan President kutah awm mai rawh se' an ti leh mai a, Amit Shah-a chuan PM, Modi-a chu a'n bekbawr zeuh a, an tifel a ni mai. PM hian hawihhawm thilah Congress President, Sonia Gandhi leh PM hlui, Manmohan Singh-a chu NDA President candidate hi a hrilh a, candidate dang nei lo tur pawhin a ngen nia hriat a ni. Chawhnu dar 2-ah an candidate tur hi an puang ta rup mai a, BJP hruaitu dangte pawh hian a hma darkar khatah an candidate tur hi an hre ve chauh a ni. Candidate tur ngaihtuahtu committee hi ṭhu khawm ve bawk mah se, Jharkhand Larsap, Draupadi Murmu-i chu an sawi lar pawl a ni a, an inràwnkhawmna tawp thlengin Kovind-a hming hi an sawi ri chhin miah lo niin an sawi.

Kovind-a te hnam, Kori hi UP-a Dalit zinga a tam zual 3-na an ni a, amah hi dan hre mi, MP leh Larsap pawh ni tawh a nih avang leh, Larsap hminghliau lo tak a nih avangin President ṭha pangngai tak a nih rin a ni. President hlui boral ta, APJ Abdul Kalam-a ang chi deuh a nih rin a nih bâkah, Giani Zail Singh-a anga politics a ngaihven zui loh beisei a ni. Mak angreng tak chu - tun hmaa Vice President - S. Radhakrishnan, Zakir Hussain, VV Giri, R. Venkataraman, Shankar Dayal Sharma leh KR Narayanan te kha a hnuah President an ni chho vek a, anni tih loh pawh kha Acting President an ni nual hlawm. Tun hnaiah hian, President atan Vice President la ni lo, APJ Abdul Kalam, Pratibha Patil leh Pranab Mukherjee hi a záwnin President an rawn ni ta nawlh nawlh mai a, tuna mi tur pawh hi chutiang bawk chu a ni leh dawn a nih hi.

- RK Lianzuala