Kawng kama thlai thar zawrh kha

Tuikual South-in an veng chhung Hor­ticulture leh Agri­culture office kawt vela chawhmeh zuarte awmze nei zawka enkawl an duh a, Aizawl Municipal Corporation (AMC) nen mumal taka an awm theih dan ruahmanna an siam tih leh dawhkân leh identity card an sem tih kha chanchinbu lamah ka lo chhiar a, mi khawlh ve hrim hrim ka nih vang nge ka rilrua a lo lan dan chu, “Eheu, heng hi kan legalise zel dawn a nih chuan man chawia dawr luah pawh a ngaih loh hi!” tih a ni ta daih mai le.

Bazar chhunga tlema hmun lun lo deuhlaia man chawia inzuarte ai chuan kawngpui kama inzuarte hian dawrtu an hmuh zawk kei chuan ka lo ring ve daih mai a ni. Heng mite hi thingtlang nu leh pa, anmahni lova an thlai thar chhuah zuarte an nih chuan ka ngaidam thei a, kharchhawng nuho kawngpui kama inzuar kan lo ‘legalise’ a nih chuan nakinah kan inchhir ka hlau khawp mai.

Tunah hi chuan Aizawl khawpui hmun danga inzuarte pawhin “Tuikual lamah pawh an phal­sak tawh alawm,” an ti thei tawh dawn a, a pawmpuitu (ID petu) lah chu AMC lam aiawh an ni bawk si a, kan khawpuiah hian a remchanna hmuna ṭhut hmun rem ve tawp mai hi thil thiang lo a nih tawh loh chuan kan buaina hi a pung zel dawn tihna a ni mai.

Tunah pawh hian kan bazarah kan leng tawh lova, loh theih lovin kawngpuiah kan inpho tawh tho tho a, hei hi kan awm dan a nih tawh avangin mumal taka Tuikual South vela tih anga kalpui hi a ṭhat zawk dan chu a awm tho va, an ngaihtuah chhuahna ki pawh hi a zahawm ka ti. Ka hlauhthawn em em ve thung chu kawngpui sira duhna hmun hmuna Inrinni tuka inzawrh hi ‘thil thiang’ a nih chuan Aizawl khawpui kawngpui lun lai hi chu bazarah kan chhuah zo vek ang a, mipui lahin bazar chhunga luh aiin awlsam taka kawng kama thlai thar lei hi a samkhai kan ti dawn bawk si a, tichuan kan khawpui chu kan awm nuai nuai tawh mai dawn a nih hmel si a, ngaihtuah nawn leh ka rawt a ni.

Tin, AMC pawh hian pawisa a nei tam tawk tawh a, hmun hrang hranga kil tina hna chhe te te inpe kawi mai mai lo hian project lian tham siam se, Aizawlah hian chawhmeh bazar tur hmun 10 velah sa thei se a ziaawm tur a nia, an term hmasa phei kha chu in lal chhawkin hun an hmang zova, a pawi hle a ni.

Tunah hian hmun awl hi khawi veng vengah emaw chuan a la hmuh chawp theih a, a chhawngin mi 50 vel ṭhut theihna bazar sak hi thil theih a la ni a, he lamah hian ngaihtuahna seng zawk se ka va duh em.

- Lalthansanga (Sangtea)