KA LO SAWI VE

Kan dam a, Lal Isua alo la kal lo a nih chuan 2018 kum tawp lamah chuan MLA kan thlang leh dawn a, kan sorkar hrawn tawhte aṭanga malsawmna dawn zel beiseite leh rorelna tha zawk beiseiten kan ngaihdan kan sawi ṭheuh zel ang a. In thlan result aṭangin Zoram Kristian din­hmun a lo lang leh dawn a ni.

Vanglaini ni Dt. 4 June 2017 chhuaka Pu Lalthanliana, Salem Veng ngaihdan kha Zonet fakselna-ah an rawn chhang a. Eng pawh ni sela, Kristian state kan nih tlat avangin Bible mila kan kal thiam hi a pawimawh ber ka rin avangin kan tana ṭha leh dik ni tura ka ngaih ka han tarlang ve dawn a ni.

Pu Zoramthanga Sorkar leh Pu Hawla sorkar kan hrawn tawh a, term hnih an sorkar chuan Zoram mipuite hian kan kham khawp mai. A Congress Party emaw MNF Party hrim hrim kha kan kham a ni lo. Party sorkar lu ber thuneihna hman danah te, rorel danah te, hnathawh danah te kan hna an ṭha lo a ni. Ek In kal thei, mawza man to, Aii Puk, compensation, damdawi In chhawng bo etc. te kha dikna duh tan, hmasawnna thlirtu tan, sual hua Kristian tan a ei theih loh. Kristian lo sorkar pawhin an tih duh loh zu zuar sorkar, mi rethei aia hausa duhsaka chhiah awltu Chief Minister; corruption hua inti si a vulh liantu CM: A hnathawkte hlawh pek tur nei lova insawi K.Deposit a vaibelchhe tel nei reng lawi si, fel lo hi a tam khawp mai.

Leveticus 19:15-ah Rorel­na-ah chuan fel lo takin i rel tur a ni lo : mi rethei i thlei tur a ni lova, mi thil ti thei i zah chuang tur a ni lo…” tih hi MNF leh Congress sorkar-ah hi chuan vut laka vawih ang a ni. Vigilense & Monitoring Committee Pu CL Ruala hova kumtluana ram hmasawnna tur hnathawh chawhma hun lekah dawhkan aṭanga “A ṭha, a ṭha…” an han ti kumtluan theite hi Jeremia 8:11-a “Ka fanu, ka mite hliam chu ngaihsam takin,” a ṭha alawm, a ṭha alawm tiin an thawi a, a ṭha hauh si lova” tih ang chiah hi a ni.

Bilkhawthlir aṭanga Tui­pawl thleng, Champhai aṭanga Tlabung thleng kawng ṭha lai reng reng awm lo ṭha tithei sorkar hi, an sorkar leh a nih chuan kan in enfiah a ṭul khawp ang. Deut 17:7 “In zing ata thil ṭha lo chu in tibo tur a ni” tih a ni. Thuthlung bawhchhia-a Pathian dang betu chu tihlum tur chung chang a ni. Duhamna (tangka sum) hi milem biakna a ni. Zote-an vaibelchhia min kawhhmuh nasat dan leh NLUP Pu Hawlan min sem a kan thinlung ram a eichhiat dan hi ‘hei lo liama Pathian dang bia’ tih tur dang a awm thei dawn em ni?

Jeremia 13:23 Ethiopia mi hangin a vun a ti danglamin, kei te in a zia a thleng thei em ni? Thei nise nang mi thil sual tih ching ṭhinte pawhin thil ṭha in ti thei ang chu” min ti.

Thuhriltu 8:11-ah “Thil sual tih chungah hremna hlen nghal mai nih ṭhin loh avangin, mihring fate thinlung chu thil sual ti turin a lo ngampa ṭhin” tih a ni leh zel a. Kan ramah impeachment dante kan neih ve loh a vangin hneh taka sorkarna siam ṭhin kan CM ni tawh pahnihte hian an zia hi an thlak danglam na chhan tur a awm lova, rak rakin iak iak ṭhin mah ila, an hrikhru pawh a za phak ngai lovang.

In zinga thil ṭha lo chu tibo rawh u, tih kan zawm dan tur chu, lunga va denhlum kher lam ni lovin, ‘A hausa tawh em a, an tu, tu leh te thlengin an rethei tawh lovang’ a ti a, vote loh phal hi kan ram damna tur kawng pawimawh a ni. Malaria aiin zuin min eihlum nasa ta em mai! Kohhran mite u, “Lalpa hming lam apiangin sual kalsan rawh se” (II Tim 2:19) “Nawhchizuar zawn chu a mah nen pumkhat an ni tih in hre lo em ni? (I Kor 6:16) min ti leh zel si a. Inbih chian a hun tak meuh a ni.

PRISM ten Sorkar khalh ngil tumin hlemhletna doin theih tawp an chhuah a, “Heti chen hi kan theih tawk a ni e. Kan in veng sengin, khalh ngil thei ngang lo a ni. Pawn lam aṭang chuan a tan theih tak tak loh, i luhchilh mai teh ang” an ti a. Eng an ang dawn nge dawn lo tih pawh la hriat hma hauhin sawisel leh dem an tawk a. An hlawhtlin tak tak hi kan hlau zawk em ni?

Lal Thanhawla dawhkan hnuaia chaw mal tla hi kan lo la it ru hle em ni dawn? Pu Hawla dawhkan aṭanga chaw mal tla aṭang hian tu tute nge lo chang ve an awm ang em? Lo dawng ve an awm pawhin ‘ka dawng e’ chu an ti miah lovang.

Pu Hawla leh Pu Zorama te dawhkan aṭanga an ei bang nawi beisei pha miah lo hi an Unit dinna khuaah hian kan awm ṭeuh a, it reng reng lo pawh hi an awm thluah tho tih hi Pu Lalthanliana hian hria se a pawi lovang. Tin, inthlan apiang hian mahni party a vui vui party dang vote hi an awm thei khawp tih pawh hi unit hruaitu aṭang a mahni tanghma haina a len tlat ṭhin avangin an in kuahnghet vek thei lo tih pawh a dik thui thei hle.

Rom 12:2-ah “Pathian duh zawng, a ṭha leh, lawm tlak leh, ṭhat famkim chu inhriat theih nan, in rilru a thara awmin lo danglam zawk tawh rawh u” min ti. Delhi mipuite chu an danglam thei, AAP an sorkar tir. Tripura mipuite an danglam ngam, Manik sarkar-a an sorkar tir ngam. Bihar mipuite an danglam thiam, zu zawrh khap ngam an sorkar tir thiam, Zoram Kristian mipuite hi kan danglam ve theiin rilru thar kan pu ve ngam dawn em?

Pathian thu-in, “Chhiah chawina tura hnenah chuan chawi ula, tih tura chu tih ula, pawisak tura chu pawisa rawh u” (Rom 13:9) tihah hian tawp mai lo ila, thuhriltu 3:5 thu, “Pawm hun a awm a, pawm loh hun a awm” tih nen pawh la kawp thiam ila, kan ti fuh ang.

Khawvel ram ropui ber America chuan a zawnin President term 2 bak nih an rem ti lo. Kan pu ve hi chuan chin tawk tih a nei lo, mipuiten kan duh tawk tir a ngai a nih hi. Zu zawrh ṭawngṭai chhanna han tih em hi zawng Setana meuh pawhin khel a tih deuh ka ring.

Football season a tawp a, Manager/ Coach hlawhtling lo chu an ban tawp tawp hlawm mai a. Mizoram mipuite hian kan sum enkawltu fel lo hlawhtling lo kan thlak ngam loh chuan kan la hlawhchham zel dawn a ni mai. Minister zikhlum ṭiak buaipui leh sem rawk vel hi chuan ram ropui chu sawi loh, veng changkang min thlen hi ka ring mawlh lo. NLUP-NEDP/ SEDP hian i sum dehchhuah dawn tipungin, i thlaithar chhuah titam mahse, damdawi in ṭha etc, zirna ṭha, kawngpui ṭha kan neih si loh chuan kan ram a dam ṭha chuang ang em? Kan phun kan ang hi a reh ang em?

- H. Lalnunsanga, Lawngtlai