HNAM INPUMKHATNA

Hnam inpum­khatna chungchang hi kan sawi ṭhin a, sawi nawn fo a ngai dawn niin a lang. NGO hrang hrang YMA, MUP, MHIP, ZORO leh Political Party tin bakah Kohhran thlenga sawi a ni fo ṭhin. Hnam inpumkhatna hi rinna kawngah te, hmasawnna kawngah te thil pawimawh tawp khawk a ni. Hnam inpumkhat lo chu chimralin an awm ṭhin.

Tun hnai maia thil thleng niin a lang a, (ka lo hawi zau lo deuh nge) a hmun ngeia chengten min hrilh a ni a. Ka vei em avangin ka rawn tarlang ve a ni. Kan ram Mizoram chhungah ngei LADC khawpui Lawngtlai khawpuiah ngei sawn hnam bil thil an kalpui nasa hle a ni awm e. Sorkar hnathawh nan, sumdawn nan te Lai hnam nih a ngai a ni awm e.

Tunah hian Lai hnam ni lo an district huam chhung Lawngtlai-ah sawn dawr kai an awm tawh lo an ti a ni awm e. Chutih laiin vai dawrkai erawh chu an zalen hle thung lawi si an ti.

Tin, inhmun lo ram neih chungchangah pawh Lai hnam mi lo chu an district huam chhungah hian a harsa viau dawn niin a lang. Hetianga kan kal dawn a nih chuan Mizoramah hian hnam hrang hrang kan awm si a, thil ṭha lo zawk a hrin chhuah hma ngeia sorkar angte, NGO angtea hma kan lak vat a ngai niin a lang. Hetianga hnam bil thil kalpui hian hnam inpumkhatna a tichhe thei tlat a ni. Hetianga mahni thuneihna huam chhunga kan in-lulin lutuk chuan district danga miten kan tih dan an rawn thik ve ang a, kan ram zim te hi kan inhung bing thliah ang a, ram hrehawm takah kan chhuah mai ang tih a hlauhawm takzet a ni.

A thuhrimah Mi­zoramah hian hnam hrang leh ṭawng hrang tam tak a awm a, Lusei ṭawng, Hmar ṭawng, Lai ṭawng, Mara ṭawng, Paite

ṭawng, Ralte ṭawng adt a awm a, heng zawng zawng hi Mizo ṭawng vek an ni a. Ṭawng tlanglawn leh official ṭawnga kan hman chu Lusei ṭawng a ni a. Ṭawng dang zawngte hi humhalhin a bo loh nan ṭan la chung siin Lusei ṭawngah hian i lungawi tlang ang u tih hi ka rawn sawi ve duh a ni e. Ka rawn sawi tawh anga inhung bingna rilru kan put chuan a titute ngei tan pawh a la pawi thei ang.

Hawh u, kan ram zimte hi lungrual takin i humhalh tlang teh ang u.

- J.V Pahlira, Aizawl West