2wheeler khalhtute polite se
Aizawl khawpuiah Tow Wheeler Taxi 3000 chuang zet a service tawh a. Heng taxi te hi taxi pangngai aiin a chuan man a tlawmin kal duhna hmun thlen zung zung a awl zawk a, mipui pawhin kan bawh ta viau mai.
Hetiang hi India ram state dangah an neih ve loh vangin state dang aṭanga lokalte pawhin mak an ti a, an hmang ṭangkai ve viau a ni.
Kan hriat ṭheuh angin Aizawl khawpui kawng a zimin traffic jam a nasa thei em em a, chetsual palh pawh a hlauhawm ṭhin hle a ni. Lirthei chi hrang hrang a tam a, motor pangngai (four wheelers) khalhtute chu an police tlangpui a, midang zai pawh an ngai tlangpui ṭhin.
Chutih laiin two wheelers khalhtute zingah chuhhelh leh polite lo tak tak an tam em em a, chung zingah chuan Tow Wheelers Taxi khalhtute hi an tam ber lawr lak.
Tow Wheeler Taxi khalhtute zingah passenger melh paha midang ngaihchan nachang pawh hre lem loa khalh mai mai an awm fo mai. A dang leh chuan mahni chauh in ngaihtuaha tlan vuk vuk ching an tam hle bawk. Traffic jam ah in-line thlapa lirthei dang khalhtute an lo din laiin heng kan sawi mek Tww Wheelers Taxi khalhtute chuan dinglam leh veilam pawh sawi loa hmaa mite tlan pelh ringawt ngaihtuaha khalh ṭhin an awm tam hle.
Two Wheelers Taxi khalh zingah hian anmahni chauh hi lirthei khalh emaw inti, zu leh drugs rui deuh chunga khalh ching pawh an awm nawk mai. Ṭhenkhat chu in tlan pelh dan tur ni miah lo a, four wheeler thlenga an veilama tlan pelh ching an awm bawk. Hengho hi an mawl vang a ni a, traffic hian hrem zel se a ṭha, an tan inzirna pawh a ni nghal ang.
A dang leh chu two wheeler vek lo intlar put mai veilamah tlan pelh chingte an ni. Hengho hian two wheelers khalh ve tho tan buaina an siam bakah chetsual theihna a ti tam a, a hlauhawm em em a ni.
Heng passenger phur enkawltu State Transport Authority (STA) pawh hian permit pechhuak ringawt loin thlithlai zui deuh hlawm se, a ṭul chuan dan khalha khalhtute chungah pawh action la zel se a ṭha hle ang. Hrem theihna dan an neih hi hre chiang deuh teh se.
Traffic police lam pawh hian a bikin Two Wheeler Taxi khalhtute hi thlithlai ngun deuh se a duhawm khawp mai. Zodin square lam aṭanga kala Bazar Bungkawn thleng hian Two Wheeler Taxi khalhtute hi dan an bawhchhe nasa zual a, traffic police tan pawh helai hmun tawite hi chu ven hneh a har lo. Duty pathum vel dahin, dan dik loa midang tlan pelh chingte hi man zel teh se.
Nitin duty indah pawh a ngai lo ang. Dan loa midang tlan pelh ching leh chuhhelh te chu office ah emaw ko se, dan an zawm theihna tur thu ṭha hrilh ta ṭhin se, mi 20/30 bak koh an ngai lo ang.
Kan Aizawl khawpui mawina leh nawmna ber chu public transport hi an ni a, chutah chuan a langsar leh enkawl ngai ber chu Two Wheeler Taxi khalhtute hi an ni. Anniho hi traffic police lam hian vil ngun deuh bik se a lawmawm khawp ang.
Traffic jam karah rem leh rem loin an passenger phurh chhuang ni awm fahrana wrong side lama lirthei tlanpelh tum tlat hian khawpui pawh a ti mawi lo a, a ti zahawm lo bawk a ni.
- Lal Rinmawia