MIṬHATE NGAWIH RENG VANGA MI-AWKHRAWLTE VAWKLALLENNA

Khawvelah hian sual leh ṭha hi a indo reng a, sualin hnehna a chan hun a herchhuak cháwk ṭhin. Khawvel hian he hun thim hi a lo hmachhawn fo tawh ṭhin a, ram tam tak chuan hun harsa leh khirh tak tak lo hmachhawn tawhin Revolution te hial a lo chhuak tawh a, ngaihdan leh pawm dan inan loh vangin tualchhung indona (Civil war) thlengin ram ropui America te pawhin an lo hmachhawn tawh a, thisen a lo luang nasa tawh hle ṭhin. He hun thim hnuaiah hian ram politics kal dik loh vangin hringnun hlu tak chu vui liamin a lo awm tawh ṭhin a, mahni mihringpuite suata thisen tam tak luantir hunte pawh a lo inherchhuak tawh ṭhin.

Khawvel ram hrang hrang inawp dan danglam tak tak karah ram inrelbawl dan kalphung inan lohna vangin khawvel hian cold war te pawh a lo hmachhawn tawh a. Hetih lai karah hian dictator te, terrorist te, etc., ten ram ṭhenkhat an lo awp mek bawk. Mahni ngaihdan leh duhdan pawh puan chhuah theih lohna rorelna hnuaiah mi tam takin hringnun an vui liam mêk a, zalenna rahbehna leh mihring nun hlutna hnualsuatna hun thim hi he khawvel mihringte hian tun khawvelah pawh hian an la hmachhawn mêk chu a nih hi!

HRINGNUN PHUARKHAWMTU POLITICS: Ram rorelna kalphung political system hian kan nun pum hi min nghawng vek tih hi mi tam tak chuan kan hrethiam kher lo ang. Ram hruaitu pakhatin, “Politics ngaihtuah lo chuan amah a inngaihtuah lo a ni” a lo tih khan a hril thui hle mai. Ram hruaitute rorelna kalphung dik leh dik loh vangin kan hringnun damchhung tâwi tê hi kan hman dan a danglam dawrh thei tih hi khawvel ram hrang hrang kalphung hian a hril chiang hle awm e. Ram hmangaihtute hruaina hnuaiah mipuiten intodelh takin, zalen leh thlamuang takin an hringnun an vui liam a, ram hruaitu lal hrawt ching leh pamhamte hruaina hnuaiah mipuite an rûm ṭhin a, rethei tlawk tlawkin hringnun an vuiliam ṭhin.

Irish Philosopher Edmund Barke chuan, “The only thing necessary for the triumph of evil is for good man to do nothing” tiin thil sual leh ṭha lo dinchanna tura thil pawimawh ber pakhat chu miṭhate engmah ti lova awmtir leh ngawihtir hi a ni tiin a lo sawi diam tawh a. French ram rorelna, nuam tinreng tawla lal an hrawt lai khan an ram miṭha leh philosopher, Voltaire te, Jean Jacques Rousseau te leh Montesquieu te khan thudik hmangin mipui mit kha lo tivar lo se revolution kha chhuakin reformation kha a thleng kher ang em? Mipuite mit tivara thilṭha leh ṭha lo thliar hrang tura lo auchhuak ṭhin miṭhate hi ram tin hian an kawl vek a, he’ng mite pênchhuahna hmunah hian mipuiten kawng dik an lo zawh tawh ṭhin.

Politics hian kan nun zawng zawng min phuarkhawm vek a ni tih hrethiam pha lo hi mi puitling tak tak zingah hian an awm nawk ang. Luhchilh tlaka an ngaih loh vangte pawh a ni mahna le. Mahni ngaihdan dik tak leh duhdan puangchhuak ngam lo leh pênchhuahpui ngam lote hi mi pamhamte lal hrawtna hnuaiah an kûn ṭhin. Naupang tea USA President ni ta, Barak Obama khan an ram ṭhalaite chu ram rorelna siam ṭha turin a pawn aṭang ni lova a chhunga luhchilh turin a lo fuih mawlh mawlh tawh ṭhin.

AWN LAM NEI LO NEUTRAL-TE: Greek Philosopher Plato khan “One of the penalties for refusing to participate in politics is that you end up being governed by your inferiors” tiin ram rorelna huangchhungah miṭhate inbarh lut ve turin a lo ngênngáwl hle tawh a. America President Wooddrow Wilson chuan, “Neutrality is a negative word. It does not express what America ought to feel. We are not trying to preserve the foundations on which peace may be rebuilt” tiin ramin harsatna a tawh laia ngaihdan pawh sawi ngam lo, neutrality mindset neite a demna thu an lo chhakchhuak tawh bawk.

Hetih lai hian American writer leh Nobel laureate Elie Wiesel chuan, “We must take sides. Neutrality helps the oppressor, never the victim. Silence encourages the tormentor, never the tormented” tiin kan ngawih reng vanga a tuartu kan nih theihzia hi khawvel hian min lo hriattir fo tawh ṭhin. A duhthawh deuh Italian moral philosopher Dante Alighieri phei chuan, “The darkest place in the hell are reserved for those who maintain their neutrality in times of moral crisis” tiin ramin harsatna a tawh lai pawha ngawih chuh rengte hi hremhmun thim lai ber chang turin a lo ruat hmak bawk.

NGAWIH HI FINNA?: Ram hrang hrang hruaitute ngaihdan leh pawm dan a inan miau loh vangin an rorelna kalphung pawh a inang lo zut a. Hrin hran kan nih angin kan ngaihdan leh duhdan a hrang hlak bawk. Lal Solomon-a’n “Mi â ber pawh a ngawih reng chuan mifing a ni mai” a tih hi ram inrelbawlna huangchhungah erawh chángchàwi chi a ni ber lo mai thei. German Philosopher Friedrich Nietzsche chuan, “Silence is worse; all thruths that are kept silent become poisonous” tiin ngawih reng leh thudik puanchhuah ngam lohna hi tûr hlauhawm tak a chan theihzia a lo phochhuak ve thung.

Dr. Martin Luther King Jr khan, “In the end, we will remember not the words of our enemies, but the silence of our friends” tiin an hmelmate lawmna aw thangkhawk aiin an ṭhianten an ngawihsanna chuan a thinlung a tihnatzia a lo tlangaupui hial tawh a. Amah Martin Luther King Jr vêk chuan heti hian a han thual leh nghal zat a, “A man dies when he refuses to stand up for that which is right. A man dies when he refuses to stand up for justice. A man dies when he refuses to take a stand for that which is true” tiin..

Kan hriat ṭheuh angin kan ram kalphung hi mipui rorelna Democracy a nih angin kan sawrkar hi kan tana kan siam leh kan ta a ni. Abraham Lincoln-an, “Government of the people, by the people, for the people, shall not perish from the Earth” a lo ti, mathlawn lovin he kan ram sawrkar pawh hi Political Party bil sawrkar ni lovin a ram mipuite ta a ni tih hi kan hriat thar fo a ngai. Khawi ramah mah roreltute lal hrawtna, inchhekarbawmna leh inhaivurna hian rah ṭha a chhuah ngai lo a, ram mipui hian an tuar zawk ṭhin a ni tih hi he khawvel hian min lo hmuhtir fo tawh! Duhtawka lal hrawta mahni hlawh phû hauh loa ram hruaitute inchhekarbawmna leh in ropui an din ulh ulhna ramah mipuiten rethei tak leh beidawng takin an hringnun an vuiliam ṭhin. He hun thim hi kan ram hian kan hmachhawn ve mêk a ni lo’m ni?

Miṭhaten ngawih an chuhna leh an pênchhuah duh lohna ram apiangah miawkhrawl leh pamhamten rorelna huangchhungah duhtawkin lal hrawtin an inhaivûr ṭhin a, thilṭha ti tura an pênchhuah ngam loh vanga an dawihzepna chuan an lu chungah meiling chhêkkhawl tirin mipamhamte bâwihah an tlu lut ṭhin a, talchhuah an tum ve meuh chuan phéngphehlepa khua a tlai tawh ṭhin. Tun dinhmuna kan ramin a tawn mék pawh hi ngaihtuah ila, miṭha leh midikte aia sum ngah ngah hmelṭhatna hun lo thleng chho hi a ni. Politics huangchhungah sum ngah ngah an lut thûk a, an sum lakluhna bulfûk hriat tur awm loa hausa tak takten he kan ram rorelna hi an thunun chho a nih chuan kan chan tur chu a nasa lo khawp ang.

Khawvel mihringte tan hian vawi khat chauh pian hun ruat a ni a, thih hun ruat a ni bawk. Tu mah piang nawn tur kan awm lo a, thlarau khawvel ata he leia lo kir leh ta hi kan la awm lo chu a nih hi. Kan hun tawn mek leh kan khawvel kalphung hmu thiam pha reng chunga auchuak ngam lo, pênchhuak ngam lova ngawi renga ram hruaitute lalhrawt leh inhaivur kan uipui tuilian thlir reng a nih chuan keini'n tuar lo mah ila, kan tu leh fate tan he saltanna aṭanga talchhuah hi a har ṭalh tawh ang. Theihtawpa hna kan thawk chunga kan retheihnate leh harsatna bawih ata talchhuak thei lova kan awm hi kan kan chantawka khuarèl a ni bik rêng nge, kan hruaitute ram hruai dan dik loh vang tih hi zawhna pawimawh tak a ni e.

- Lalnunmawia Pachuau