Thupek zawm hlawh lo

Mizoramah hian khapna thupek chhuah a awm fo a, ṭhenkhat hi chu kenkawh zui lem loh leh bawhzui lem loh a awm ṭhin. Thupek kenkawh zui si loh zingah hian kawng chhukah lirthei tinung loa tlan khapna thupek hi a tel awm e.

Lirtheia a nung loa kawng chhuka tlan hi danin a phal loh sa a nih ka ring a, khapna thupek chhuah leh chuan a ngai em tih chu ka hre lo. Kumin April thla vel khan Traffic SP chuan kawng chhukah lirthe tinung loa tlan khap a nih thu a puang a, a hnuah Zonet Cable TV lamah pawh a thusawi an puan ka lo hmu a ni.

Lirthei tinung loa kawng chhuka tlan hi a him lo a, khawl a nih dan turin a thawh a rinawm loh. Mipui leh lirthei khalhtute tan a him loh em avangin Traffic SP hian khapna thupek hi a chhuahah ka ngai a, ka lo lawm hle.

Mah se, hun an kal a, he khapna thupek hian zawm a hlawh lohzia ka hmuh tak siah chuan ka lawmna lak kianin a awm rang hle. Thupek chhuah hi chu a har lo a, a bawhzuina a awm si loh chuan awmzia a awm lo. Lirthei a nung loa kawng chhuka tlanpui hi thil hlauh­awm tak a ni a, chuvangin he khapna thupek hi bawhzui atan a duhawm hle.

Khapna thupek ṭhen­khat hi chu bawh­zui harsa ve deuh, hun duh rei, mihring mamawh tam deuh te a awm ve ṭhin. Mah se, tuna khapna thupek kan sawi hi chu bawhzui har lo tak, khapna chhuah a nih aṭanga bawhzui nghal theih chi a niin ka hria.

Khawilai veng kil­khawr deuha kawng chhuka lirthei tlante a nung chunga an tlan leh tlan loh endik vek chu thil theih loh a ni awm e. Mahse, Aizawl khawpui chhung lunlai bika kawng chhuka lirthei tlante hi chu endik theih a ni.

Entirna atan Bawng­kawn leh Chan­mari-ah Traffic duty point a awm a, henga traffic police duty-te hmuh lai ngeia lirthei tam takin, kawng chhuk laia a nung loa an tlan avanga, kawng phei an thlen dawna an lirthei an tinung lai ka hmu ngun mai. Mah se, khapna thupek awm reng chu bawhzui a ni ngai lo.

Heng Traffic duty point thlen hma deuh hian traffic police pakhat lek pawh a khat tawkin han duty se, lirthei a nung loa tlante chu han man chat zel mai se, kawngro a va su dawn em. Tuna he thupek kan bawhzui dan ngawt hi chuan khapna thupek awmze nei lo a nih chhunzawm zel a hlauhawm hle.

Chhinga Veng aṭanga Bethlehem Veng lam penna turah hian traffic police an duty

ṭhin, mahse heng duty-te hmuh lai ngeia lirthei khalhtu­te'n Bethlehem Veng lama an kual dawna an lirthei an tinung lai ka hmu fo mai. Helai hmun hi thupek bawhzui nan a remchang hle ang a, mahse an bawhzui si lo.

Temple Square aṭanga Vaivakawn panna kawngahte hian Vaivakawn thlen hma deuhin, a khat tawkin traffic police han duty-in thupek bawhchhiate chu han man ṭhin se chuan he thupek hian awmzia a va nei dawn em. Nileng lenga duty chu thil theih a ni lo thei e, mahse a khat tawkin han ding zeuh zeuh se chuan he thupek hi a hlawhtlin phah ngei ang.

He thupek ṭha tak hi bawhzui loha a tham ral mai mai ka hlau takzet zet a ni. Traffic police-te'n ṭan han la deuh se, a khat mawi tawkin he khapna thupek kengkawh turin duty han in dah ṭhin se a va lawmawm dawn em.

- Lalrintluanga