DRINKING WATER DEPARTMENT

Journalism Zirtan Bu-ah chuan thu lar tak pakhat a awm a, chu chu hei hi a ni, “Ui-in mihring a seh chuan thu thar (news) a tling hranpa lova; mihringin ui a seh vethung erawh chuan news a tling” an ti ṭhin. Chutiang deuh chuan - ṭhal laiin tui a harsa a, ren tur a ni tih chu thuthar a tling hranpa lova, amaherawhchu fur tui tam vanglai taka PHE Department-in tui harsat thu leh ren tura mipui min hrilh ta mai leh ruahtui dawng khawl tura min hrilh hi chu thuthar satliah pawh ni lo; breaking news hial a tling thei mai awm e.

A tirah chuan fur ruahtui tlak tam luat avangin Tlawnglui tui a nu vek a, pump tlak a awm lo an ti phawt a. A dawtah tui pump tur leh sawngbawl thianghlim tura khuah tlinna bikah hnawl leh chirhdiak a tling tam lutuk an ti leh a. Chumi hnuah pump khawl pakhat a chhia tiin a zui leh a. Hriat zui zel danah phei chuan pump khawl chhia siam ṭhat nan Disaster Management lamah sum dil mek a ni an la ti ta deuh deuh a. Hun enge maw chen hnuah Engineer-in-Chief hovin PHE engineer rualten tui harsat chungchang leh a chinfel dan tur ngaihtuahin an

ṭhukhawm tih kan hre leh a. He tih lai tak hi chuan beisei a sang lo khawp mai. PHE connection chauh ring tan phei chuan tui zuar ho phone number Vanglaini-ah kan zawng sup sup awm e.

Sorkar lahin PHE tia kan hriat lar em em lah chu Drinking Water Department tiin a hming a thlak zui leh ta lai nen. Ngaihtuahna awm ve pakhatah chuan he tui pump na hmuna tui luh tam theih dan tur te, ruahpui vanawn bawhawk thlen hunah pawh tui volume san theih ber tur te a hmain engineer thiamte hian an lo hisap pha bik lo em ni tih te, tui pump khawl hlui tawh tak leh hman rim em em, chhe rup thei vendan turte hi lo suangtuah lawk a ni lo em ni tiin a zeldin theih a. Engpawhnise khawl thil an nih avanga hriat lawk loh chhiatna thleng thei a nih dan leh khuarel chhiatna hrang hrang hisap lawk theih a nih loh dan te chu kan hriatthiampui a ni.

Tui hi a lova kan awm theih loh a ni a, chuvangin a mawhphurtu Department pawhin mutmawh hnarmawhah lain theihtawp an chhuah tih a lang a. Chhun zan zawmin hna an thawk a, Aizawl khawpui dangchar lutuk tur pawh hun rei vak lo chhungin an thawidam leh ta mai zawng a nih hi. Hetiang dinhmuna kan din lai khan mi thil chikmi leh chinchang hre awm tak pakhat pawhin tui harsat meuh chuan PHE Department ṭangkaizia a hriat ve chauh thu a rawn ziak nghe nghe a nih kha.

He Department hi Drinking Water and Sanitation tia hming a put hnuah hian an hmalakna leh an hnathawh phung a la pangngai reng fova. Mipui hnena tuisik thianghlim in tur pek mai bakah inbual, insuk, inthiarna zawng zawng atana tui hman tham min pek chu an tih tur a nih avangin drinking, washing, bathing, sanitation, etc an huam vek a ni. Minister viak ṭha leh khawvel tukverh dak phain a enkawl Department hian sawi leh sel tawrh chang nei zeuh ṭhin mahse a pumpui thu a lak erawh chuan he Department hian fak leh chawimawi an phuin ka hria.

Shillong bawngpui phurh chhuah a, a hnute sawra mipui mimira sem chu a kalkawng a thui chiam lo. Tlawnglui khuah fal a pump khawl hautak zet maia Tuikhuahtlang pump thlen te, chuta

ṭanga Aizawl veng hrang hranga tuizem hrawl pui pui bun leh enkawl te, pipe te zawk hmanga veng keltil leh mawng fe fe thlenga supply darh te chu hna namai a nih lohzia kan hriatpui a ṭul a ni. Tlem lai deuh khan New Market pa pakhat nen kan titi a, tui an hmuh ṭhat loh thu leh nuho mangangin hotu lian zawk hnena an thlen thu min hrilh a. Kei chuan khawi aṭangin nge tui an lak tih te, an pipe kalkawng leh zem lian an fawhna hmun te ka zawh chuan min chhan ngaihna zu hre der lova. Hei hi ka han sawi chhan chu mahni connection line te, khawi tanky nge kan zawm tih te, engtikah nge tui min pek dawn tih te bakah nileng lenga hah taka tui sem kual ṭhin, an huatthu lovah hlawh tlemte hmua MR rualte hahzia te pawh hi kan hriatpui a ṭul thlawt a ni.

Eng emaw hleka hotu lian zawk hnena zualko mai ṭhin lovin, tui hmuh chungchanga hriat duh neih chuan kum 10 chuang chuang MR a thawk tawh min bialtute hnenah hian thil chinchang hriat hmasak tum a finthlak ang. Anniho hi hawihhawm leh zawldawh taka biak thiam te pawh an ṭulin an hah thawidam nan pawh thilphal a ṭul ve bawk a ni.

- Zothankunga