Sakramen atan Mizo siam grape wine

Wine tih hming pu hrim hrim hi alcohol tel miah loin a siam theih em ka hre lo. Wine kan hriat tlangpuiah chuan alcohol a tel hlawm a, a tel tam lo thung.

The Mizoram Liquor (Prohibition) Act-in alcohol telna rêng rêng a khap a, wine-te pawh khap tel vek mah se, kohhrante hi chu wine chungchang bikah chuan an ngawih a ṭulna chin a awm ve. A chhan chu, Lalpa Zanriah Sakramen atana wine kan hman (sacramental wine)-ah alcohol a tel miau a. Kohhran lian ber, Presbyterian Kohhranin sacramental wine kan hman mekah phei chuan alcohol a sang viau mai.

Chutih rualin, kohhran mipui tana hriatthiama pawm theih tur tâwk leh tui tur àwm tâwkin tui an pawlh ṭhin a, sakramen kan chana wine kan inah hi chuan alcohol a tlem tawh hle ang.

Sakramen uain hman mek

Mizoram Presbyterian Kohhranin sacramental wine a hman mek hi Tincture Cardamom (carminative) niin an sawi a, a bûr páwn lamah inziakah chuan ethyl alcohol 38-43% v/v inkar a awm niin a lang. Ethyl alcohol (Ethanol) hi zu siamna nen thil thuhmun niin an sawi. Internet-a tarlanah chuan, Tincture Cardamom chu damdawi atan pawh an hman ṭhin niin a lang a; pum nuam lo, luakchhuakah a ṭha niin a lang. Chutih rualin, a lâwnga in tura an siam chu a nih loh hmel thung. A bûrah 'inflammable' tih a inziah avangin a kâng thei a nih hmel a, fimkhur taka dahṭhat tur tih a inziak bawk.

Tarlan danin, Tincture Cardamom chu Cardamom seed (elaichi) leh ethyl alcohol hmanga siam a ni. Zu kan tihte zinga mi - whisky chu buh/wheat/barley leh ethyl alcohol hmanga siam a ni a; rum chu fú (sugarcane) leh ethly alcohol hmanga siam a ni tlangpui a, vodka chu starch (cereals/alu/apple, etc.) leh ethyl alcohol hmanga siam a ni thung.

Mizo siam grape wine

Champhai Winery-a wine an siam Champwine-ah chuan alcohol 10.9% v/v a awm a, grape wine dangah chuan 10% a awm tling lo hlawm tih Excise department chuan an tarlang. Chuti a nih chuan, Mizorama grape wine siam chhuahah aiin Presbyterian Kohhranin sakramen atana kan hman wine-ah alcohol a tam zawk hle tihna a ni.

Sakramen atana wine kan hman meka alcohol awm zat hian Mizorama sap zu lâr zuala alcohol awm zat a tluk reng tih a hriat theih a, zu ṭhenkhatah ai pawhin alcohol a tam zawk nghe nghe. Whisky ho-ah alcohol 40-43% a awm tlangpui a, rum-ah 40-50% leh vodka-ah 30-40% a awm tlangpui.

Grape wine kan nei

Isua Krista mantira a awm zana zanriah hnuhnung an kîlnaah khan wine (uain) leh chhang an eiin an in tih kan hmu. Matthaia 26:27-29 ah chuan, "Tin, no a la a, lawmthu a sawi a, an hnenah a pe a, 'In zain in rawh u;
hei hi ka thisen, sualte ngaihdam nana mi tam tak tana chhuak tur, thuthlunna chu a ni. Nimahsela, ka hrilh a che u, ka Pa ramah nangmahni nena a thar ka in ní a thlen hma loh zawng tun achinah grep hrui raha mi hi ka in leh tawh lo vang,' a ti a," (Lk 22:17-20) tih a ni.

Lal Isua'n min zirtir anga min chhandamna thisen aiawh atana wine kan inte hi entirna a ni a, eng pawh hmang ila, kan tih chhan hi a pawimawh lai ber a ni. Wine tak leh tak loh te, a tui leh tui loh te, a rawng awm dan tihte hi a pawimawh ber a ni lo. Chutih rualin, Isua hun lai pawha an lo hman ṭhin ang ngei mai (ang thei ang ber) grape tui sàwr (grape wine) tam tham tak kan ramah ngei kan siam chhuaha kan neih ve tâkah chuan hmang ta ila, tuna kan hman mek, Haryana state-a elaichi aṭanga siam ai chuan a inhmeh viau lo'ng maw?

Economy tihsanna

Eng thilah pawh ni se, kan rama thar leh siam chhuah ngei kan hman a, chumi avanga state páwna sum luang chhuak tur kan hum hian Mizoram economy kan siamṭha tial tial dawn a, chu chu Mizoram mipui, sorkar leh kohhrante pawhin hma kan sawn zelna tur a ni. Tunah hian sakramen kan chan ṭhin hmangin kohhrante'n a hring a hràna Mizoram economy tihsanna remchang kan nei ta.

Mizoram chhung khawchhak lama Mizote ngeiin an thar chhuah leh Champhai leh Hnahlan aṭanga siam chhuah grape wine hi kohhrante'n sakramen atan hmang hi ila, ram leh hnam tan thil ropui tak kan ti dawn tihna a ni a; a hlâwkna téltu chu Mizoram leh Mizo mipui kan ni ang. Sum tam tak Mizoram páwn lama sumdawngte hnena kan pek ṭhin kha state páwnah chhuak tawh loin, Mizote vêkin an chang dawn tihna a ni a. Kan Mizopui, kan kohhran mite ngeiin rim taka an thawha an thar chhuahah hlâwkna ṭha zawk an nei thei dawn a ni. Hlâwkna tak tak an hmu a nih ngat chuan, hun lo la kal zel turah pawh tam zawk thar tumin, tam zawk siam chhuah tumin nasa zawkin an thawk ngei dawn a, mimalin hlâwkna sang zawk an neih phah dawn mai bakah, Mizoram, sorkar leh kohhrante'n a hlâwkna kan tél tláng zel ngeiin a rinawm.

Pathian ram a pung ang

Sakramen atana wine kan hmante state páwn aṭanga la lut lo a, Mizoram chhunga thar leh siam kan hmang a nih chuan sum tam tak Mizoram páwn lama sumdawngte hnena kan pek ṭhin kha state páwnah chhuak tawh loin, Mizote vekin an chang dawn tihna a ni a. Chuti a nih chuan, Pathian ram leh thawhlawm dang eng eng emawa kohhranin a hmuh lêt leh pawh a pung sawt theiin awm asin.
Entirna sawi ta ila: kohhran pakhat hian kum khatah state páwna mi sacramental wine lei nan cheng nuai 100 hmang ta se, cheng nuai 100 aṭanga sawma pakhat (10%) chu cheng nuai 10 a ni. Chu cheng nuai 10 chu Pathian tan (Pathian ram) an pe lêt kher loin a rinawm. Sakramen atan Mizoram chhunga grape wine kan hmang a nih erawh chuan, suma hlâwkna téltute chu Pathian ram pe ṭhin an nih chuan, sawma pakhat - cheng nuai 10 chu kohhranin a hmu lêt thei dawn zu nia!

A chunga kan sawite hi a tlangpuia thlirna, thil awm theite sawi a ni a; kan sawi ang hian ti ta ila, a tak takah chuan kan sawi ang diak diak hian a thleng kher lo thei tih erawh hriat a ṭha ang.

Ngaihtuahna thar pú ila

Champhai leh Hnahlana grape wine siam chhuahte sakramen atana hman rawtna hi Synod Inkhawmpui pawhin rawtna a luh angin a lo ngaihtuah tawh a, mahse, a la pawm rih lo niin ka hria. Hun lo la kal turah ngaihtuahna thar púin, rilru thar nen ngaihtuah leh tawh se a duhawm ngawt mai.

Tuna kan hman mek dinhmun kan hre tawh a, kan duh loh em em zu (alcohol) tam záwngah phei chuan tuna kan hman lai Tincture Cardomom aiin Mizorama grape wine-teah alcohol a tlem fe zawk bawk si nen, kohhran tih atan pawh a àwm hlein a lang. Tuna kan hman mek emaw, kan hman tawh ṭhinte emaw, Mizoram páwn aṭanga lâk luhte hi Mizo thar leh siamte aia ṭhat bikna tak a nei a nih loh chuan Mizo siam ngei hi hmang thei ila, a va lawmawm dawn em.

Fimkhur erawh a ṭul

Mizoramah sakramen atana hman theih wine siam chhuah a nih ve reng laia kohhrante'n state páwna siam an hmang zel a nih pawhin, hriatthiam a ngai ve tho bawk àwm e; ngaihtuah ngai leh vènthâwn tur thil a awm ve nual ang.

A pawimawh ber pakhat chu, Mizorama kohhran zinga sakramen nei kohhrante hian Champhai leh Hnahlana siam grape wine hmang dawn ta ila, rin pui berah nei dawn ta ila, an siam chhuah zat hian a tlin em, a daih dawn em, tih hi a ni. A daih zãn a, thlaphànna tur awm miah loa kohhrante an pe reng thei dawn a nih chuan a ṭha mai a; an pe séng dawn lo a nih erawh chuan hman ngam a la ni lo, tihna a ni a, grape chíngtute leh winery enkawltute an ṭan lehzual a ngai tihna a ni. Kohhran pawl khata awm ṭheuh ṭheuh, a ṭhenin Mizorama mi an hman a, a ṭhenin state páwn aṭanga lak luh an hman chu thil tih chi a ni kher lo ang.

Sawi tawh angin, sakramen kan chan ṭhin hi entirna a ni kan tih tawh kha; Isua zirtirna bawhzuina a ni. Champhai leh Hnahlan grape wine-te hi hmang ta ila, kohhran mite rilruah eng angin nge a thawh ang, tih ngaihtuah tel a ngai. Sakramen ngaihsan loh phahna emaw, sakramen-in a tum ber ngaih pawimawh loh phahna a awm thei ang em? Kan uain in chu Champhai leh Hnahlan mite'n grape tui an sâwr mai mai kha a ni a, tih rilru kohhran mipui thinlunga awm chunga an chang (in) a nih chuan a ṭha lo thei. Kohhran mipui kan inpeih a ngai a, thinlung taka kan pawm tlàn a ngai tihna a nih chu.

Tlángkawmna

Champhai leh Hnahlan grape wine-te hi kum 2015 vel aṭang khan Mizoram Baptist Kohhran chuan sakramen atan an lo hmang ṭan tawh a, tun thlengin an la hmang. An inchhir lo a, ṭha an ti a, an zawngchhang hle niin an sawi. UPC kohhran ṭhenkhat pawhin sakramen atan Mizorama siam grape wine an hmang nia sawi a ni bawk a; anni pawh hian ti fuh lo an inti lo niin a lang. Kei pawhin Mizote thar grape leh Mizorama siam grape wine an hmang hi ṭha ka lo tihpui ve hle.

- K. Zothanpara