MIZORAM CALENDAR A THLAWNA SEM TAM LUTUK HI

State hrang hrang hian an State Calendar hi an siam deuh ṭheuh niin a lang a, chung zingah chuan Mizoram Calendar tluka a ram miten an hlut hi an tam awm love. Mizoram Calendar hi a ṭha ṭhin khawp mai a, ṭum khat erawh nula thlalak an zeh tel nasat deuh avanga sawiselna awm deuh. Mizoram Calendar hi Mizoram pawna House hrang hrangah te leh hmun kilkhawr zawk thlengin kan tar nasa a, a mawiin a zahpuiawm lo ṭhin hle a ni. Phai leh thingtlang zawka awm chhungte leh thiante pawh Mizoram Calendar hi kum tin ka lo thawn ve nual ṭhin a, an lo nghakhlel ṭhin khawp mai.

RTI zawhna min chhan­na aṭanga a lan danin kum 2020 khan Mizoram Calen­dar hi copy 80,000 chhuin copy khat chhut man Rs. 48.72 a ni a, a vaiin Rs. 38,97,400/- sen a ni. Mipuiah copy khat Rs. 50/- zela min leitir laiin copy 80,000 chhut aṭang hian copy 30,000 lai (38%) chu a thlawnin zuk sem chhuak a! Chutiang bawkin kum 2021 ah copy 85,000 chhuin copy 30,000 bawk a thlawnin an sem chhuak leh a, hei hi 36% a tling phak hial. Mipuiah copy 55,000 chu copy khat Rs. 60/-in an hralh chhuak leh a ni. Hemi kum hian Mizoram Calendar hi copy khat Rs. 53.012 chhutin copy 85,000 chhut man chu Rs.45,06,050/- a ni. Tute nge a thlawna Mizoram Calendar dawng?

Mizoram Calendar a thlawna dawngtute hi CM, Minister leh Sorkar hotute, mi pawimawh bakah Sorkar hmun pawimawh leh Office hrang hranga tar tur niin a lang. Mipui rethei leh sum nei lo zawkten copy khat Rs. 60/- a kan lei laiin sum nei zawkten a thlawna an dawng bik hi a dik lo a ni. Mipui sum (public money) a lo thlawna an lo dawn bik ringawt chhan tur awmin a lang lo.

Kum tin copy 30,000 vel a thlawna sem hi a man chhut chuan 30,000 × 60 = Rs. 18,00,000/- lai a ni a, hei hi Sorkarin a tum (I&PR department budgets bet) a nih hmel. Chutih laiin mipui lei copy 55,000 × 60 = Rs. 33,00,000/- hi a thlawna an semna man hian mipuiin Mizoram Calendar an leina man tih tlem nan (subsidize) hian hman ni ta se (33,00,000-18,00,000 = Rs. 15,00,000/-) copy khat leina man hi Rs. 27.28 velah tla thlain a lo berah Rs. 30/- chuan a lei theih dawnin a lang.

Hei hi a remchang ngang lo a nih pawhin a thlawna Mizoram Calendar semna cheng nuai 18 hi kan Sorkar sum bawmah hian lo lut leh ta zawk se mipui sum (public money) tuakna ṭha tak a ni ngei ang. Chuti a nih loh pawhin Health Care atan te, thil dang danga hmanna tur chu sawi sen a ni lo. Tunah Mizoram sorkar suma a harsat em em lai hian he sum hi hman ṭangkai theih tak a ni ngei ang.

Mizoram Calendar hi Government Press-ah chhut ni rawh se :

Kum 2015 khan Govern­ment Press (Printing and Stationery Department) ah Mizoram Calendar hi copy 60,000 chu copy khat Rs. 40/- in an lo chhu tawh a. A vaia chhut man cheng nuai 24 chu Mizoram Sorkar sum bawmah a lo lut tawh nghe nghe a ni. Hei hi keini state, thawh chhuah neih tlem avanga sum harsatna tawk fo leh tawk mek tan chuan a hlu tham hle a ni. Eng vangin nge Govt Press hian Mizoram Calendar hi an chhut chhunzawm zel mai loh? tih I&PR department RTI a zawhna chu “Chhuttir chhunzawm a ni lo” tih ringawtin min chhang a, a mumal lo hle.

A chhan ni thei awm ang te zirchian­naah chuan Mizoram Calendar chhutna order hi I&PR department hian Govt. Press-ah hun chep leh hnawhsarum deuh takin an pe a ni awm a. Govt. Press ah hian thawktu an indaih lo deuh nia insawiin Mizoram Calendar chhut hna hi a ṭhen chu phai lamah an pe chhawng (out source) ve tho a ni awm e. Chu bakah an chhut (print quality) hi a vawi khatnaah khan duhthu sam lo deuh lai lo awmin a duh tan sawisel tur a awm a ni mai thei - hei erawh khawl man to leh changkang tak cheng nuai 400 dawn man nei an ni a, an chhut tam na na na chuan hma an sawn zel ngei a rinawm.

Mizoram Sorkar depart­ment dang hian Calendar an chhu ve ṭhin tho a, Govt. Press-ah a tam zawk chu an chhuttir thei tho a ni. An remchang ngang lo a nih pawhin an phalna la hmasain Printing press dangah chhuttir mahse a royalty (sum) chu Printing and Stationery department (Govt. Press) ah hian an chhunglut ṭhin tho niin an sawi. I&PR department hian Printing and Stationery department (Govt. Press) ah phalna la lem lovin Mizoram Calendar hi tender hmangin royalty pawh chawi chuang lovin Adland Publicity Pvt. Ltd. 11C, 17 Camac Street Kol­kata (phone no. 033 4066 7166) ah an chhuttir fo ṭhin a ni. Hetia hmun danga an chhuttir chhan dang a awm zawk em ni? tih zawhna a awm thei hial awm e.

Mizoram Calendar chhut a hun dawn hnai leh ta. I&PR department hian hnawhsarum lo deuh zawkin leh felfai taka in puahchahna neiin Printing and Stationery department (Govt. Press) ah hian Mizoram Calendar 2023 hi chhuttir tawh se la. Mizo mipuiin kan hlut em em Mizoram Calendar pawh mipuiin tlawm zawka kan lei thei nan a leina tur sum nei zawk CM, Minister, Sorkar department hotute leh department hrang hrangah te, mi pawimawh te hnenah hian a thlawnin sem bik tawh lo hram se a duhawm hle mai.

Chutiang tur leh Mizoram Calendar ṭha tak kan neih leh theih nan te, an hna ṭha taka an thawh chhunzawm theih nan I&PR department hi duhsakna ka hlan e.

- VL-a, Tuikual South