Ruihhlo do a hun leh ta
Tun hnaiah ruihhlo man a awm leh ta fo a, heti taka ruihhlo a tam hi a pawi a ni. Hmannia State Level Core Committee on Ruihhlo Do report-ah khan ruihhlo a hluar dan report kan hmu a ni. Kum 2021 chhung khan heroin Kg 18.906 man a ni.
Kum 2022 May 15 thleng khan heroin kg 10.081 man a ni leh tawh a, kum chanve pawh kan hman hmain nikuma ruihhlo man zat aia tam mah man a ni tawh.
Excise & Narcotics Department-in an man chin ringawt tarlan a ni a. Hemi hian a entir chu ruihhlo a tam hle tih a ni. Ruihhlo te, ralthuam te hi an man fo chuan man loh pawh tam tak a awm dawn tih a chiang viau a ni.
Hei hi kan ram dinhmun dik tak chu a ni mek a, zu kan khap avangin ruihhlo a hluar ta ti pawl an awm bawk a, eng pawh ni se kan ram a dam lo a ni. Zu zawrh lai pawh khan ruihhlo hi a hluar reng tho a, inhnial aia pawimawh chu ruihhlo do tura kan zavaia kan ṭan rual a ngai ta a ni.
Ṭhalai zingah ruihhlo ti thar an pung zel a, tun anga ruihhlo lei tur a awm reng chuan kan hmabak hi a thim viau dawn a, ruihhlo do beihpui thlak a hun hle tawh a ni.
Ruihhlo hi hlawh nei loin mi tlawmngai intel khawmin an do a, khatiang chauh pawhin awmzia a neih chuan Police leh Excise neih sate hi han ṭang ve leh deuh se, thui tak an ven theih ngei a rinawm.
Ruihhlo do tura CYMA a che chhuak leh tur hi a lawmawm rualin hlauhthawn ruk ka nei bawk. Tun hma anga do kha chu an ti tawh lo turah ngai ila, mihring nunna a hek a, ruihhlo a bo si lo.
Ruihhlo doa SRS an han che tak tak kha chu mi ṭhenkhat chuan in sawisakna khawl an ti nung niin an sawi duh hial a nih kha. YMA hian ram hnuk khawih thil tam takah ngawih a chuh fo a, politics khelh nan CYMA post hi an hmang ta emaw tih hial turin an che leh ṭhin a nih kha.
Ruihhlo kan do hian a mihringa do loin ruihhlo do mai ila, tun hmaa kan chet fuh lohna tam tak kha kan pumpelh thei ang. Kan mi mante kutthlak mai tawh loin thuneitute kutah hlan zel tawh ni se.
Ruihhlo hi hua ila, do ila mihring man te erawh hremna na thei ang ber pek zel ni tawh rawh se.
- Lal Pekhlua