Tun ṭum Sorkar chu Ṭanrual pui an har deuh

Covid-19 dona atana commitee peng hrang hrang siamah opposition MLA pakhatmah an telh  lo.     Hri len ṭan tirhin sum tam angin an sawi a, mipui kan thlamuan hnuah sum a awm loh thu Chief Minister, Finance Minister ni bawkin a sawi leh.

     Sum a awm loh thu leh Chief Minister relief fund-ah chhung lut tura nasa taka kan inkar laiin insum karna nei miah lovin CM bialah contract nuai 300 man bawr a chhuak mek. Khawpui pui kawng tizim zawngin tender chhuah lovin foothpath siam a ni bawk. 

    Tangkhangte hruai zawh tawh lamah pawh Covid-19 test-na RT-PCR ngaihtuah belh mek a ni, an la ti chhek chhek mai hi a thinrim thlak tak zet. 

      Covid-19 test-na khawl neih harsatzia mipui min hrilh vak vak a, Physicist pakhat comment la chhawngin nuclear power plant nei ve phak lo turah kan inngai hman. 

      Opposition lamin Covid19 dona atana thil an pek reng rengin an bei zui zel bawk. Ruling lam duh khawp lohna a rikin, "Tun hi ṭanrual hun a ni, in sawisel hun a ni lo," an ti a. Opposition lamin tha an thawh vein an diriam leh vak vak si. 

      Engkim mai hi inbuat­saihna a tlachawpin a nep ve thlawt a ni. Chief Secretary-ah Mizo pa, viak ṭha leh thinnel tak mai nei lo phei i la chu an mualpho nasa khawp ang le. 

      CM ber hian he hriin ei leh bar a nghawng chhoh dan tur hi a man lo emawni aw a tih theih. A department chan Horticulture leh PWD-ah supply tender leh PWD construction work a la chhuak fo maite hian sorkar puih hi a ti phurawm lo tak zet a ni.

     Engpawhnise hei lo hi ram kan nei lo, kan ta, kan ram, Mizoram neitu kan ni. Tute emaw kan duhkhawp lo a nih pawhin thil ṭha tih i ning suh ang u.