VAI MISTIRI BUMIN AWM TAWH LO ANG U

Kan ram mamawh em em ni reng chunga Mizoten hun rei tak bawh nachang kan hriat loh cement mistiri hnaa Mizote vaiin min bum fo dan leh min la bum reng dan mi hnen aṭanga ka hriat leh ka hmuh chian te aṭangin mipui hma ngaiin rawn sawi chian kan tum dawn a ni.

Hemi rual hian Mizoten cement mistiri hna thuk leh awmze nei zawka kan thawh theih dan tur te pawh sawi ila. YMA leh SIRD etc te hma­laknaa misitiri training te pawh kalpui zel ni se. Kut hnathawh lam hrim hrim hi state pawn aṭanga lo lutte kutah a tla deuh tlat mai hi a dik lo. Mizo mipui leh ṭhalai tam zawkin an luh chilh theih nana hmalak dan turte pawh sawiin kan hrut kual dawn a ni.

Kohhran pakhat biakin chhuat slab chhun tur hna a awm tih hriain vai mistiri hoin Ṭheka a thawh an dil a. Biak in hi feet 20 a zau feet 72 a sei a ni. Feet 1 square Rs. 100 in an thawk ṭhin tih an sawi a, chutiang a nih chuan biakin slab chhun hna work charge chu Rs 144000/- tur a ni.

Mahse vai thawhtir loin tualchhung mistiri pahnih leh helper pathum an ruai ta zawk a, ni 10 chhungin an thawk zo ta daih mai. Mistiri pahnih hlawh atan Rs 16000 leh helper pathum hlawhah hian Rs. 15000 an seng a, belhkhawm chuan Rs 31000 an seng a nih chu. Vaiho kha lo ṭheka tir ta se, cheng nuai chuang zet an chawi belh dawn tihna a ni. Vai mistiri-te hian Mizote hi min lo va bum nasa ṭhin em tih a lang chiang phawt.

Hman aṭanga vawiin thleng kan la chin ṭhan chu hnam dang mistiri te kan hna ṭheka tawhtir hi a ni. Vai mistiri buma kan awm reng tawh loh nan aware­ness neih fo pawh ka rawt e.

CYMA leh pawl ṭhenkhat hmalak azarah Mizo mistiri zingah hian chhawr nuam leh hna thiam tak tak an tam ve tawhin an sawi a. Saitual district lamah phei chuan vai cement mistiri an awm mang lo tih a ni, hei hi entawn ang u. Hetih lai mek hian Mizotena kan mamawh em em chu, a ruaitu lam tana chhawr nuam leh rintlaka hna thawh thiam hi a ni.

Min ruaitute duh dan aia mahni duh dana hna thawh tum tlat te pawh an awm ṭhin nia sawi a ni, hei hi vai kan tluk loh fo chhan pawh a ni. Thiamna lamah ni loin min ruaitute duh dana hna thawh hi Mizote tlin loh fona pakhat a ni.

Mizo hnathawktu ṭhen­khat chu duh duh huna ban mai emaw hna thawh laklawh laia kal pen daih mai ching an awm a, hei hi thil ṭha lo tak a ni. Training kan mamawh tel em em a ni, misitiri hna (technical) lam ni loin mi hnuaia hnathawh dan hi inzirtir kan mamawh a, mistiri association pawhin hei hi ngai pawimawhin inzirtir tam se.

Covid 19 avanga kan in Lockdown vak vak aṭang khan vai eng emaw zat chu an ramah an haw. Tichuan Mizo pa leh ṭhalai an harh thar phah, tin hnam dang hnathawktu an tlem avanga kan mamawhna khan a ko chhuak ve bawk a ni. Vai mistiri la awm ve bawk mahse Mizo hnathawktu kan ngah sawt a, kut themthiam tak tak an lo awm ṭeuh mai a, Mizo mistiri te kha hun eng emaw ti chhung kha chu hna in a hmuak a, an indaih lo ve hial a ni.

Cement mistiri hna thawk tur reng reng mumal takin management course pek ni tawh se. An hriat tur, business kawnga an hlawk theih dan tur, personality development course thlengin zirtir ila. Anmahni promote nan leh hna thawh laia chhiat tawkte pawh an awm ve leh ṭhin avangin insurance te pawh siamsak ila. Kuthnathawh hi sorkar ang pawha kan chawi lar a ngai. Security a ṭhat bawk chuan mi tam takin kan mamawh tak ni bawk hemi line hi an luh chilh duh dawn.

Tun hma deuh te kha chuan Mizo cement mistiri hrim hrim te rinlohna kha a awm deuh a, khatiang rilru Mizo mipuiten kan pu kha a pawi hle a ni. Tunah chuan Mizo mistirite tan hun ṭha a inhawng mek niin ka hria a, mipuiin in laka rinna an nghah ṭan mek lai hian in rinawmzia lantir nan in hnate ṭha leh rintlak takin thawk ula. Kum 4 / 5 te a lo ral leh chuan in sa turten vai mistiri an zawn ṭhin kha a reh ang a, Mizo mistirite tan eizawnna ngialnghet a inhawng ve thei dawn a ni. Chumi tur chuan kan hna thawh dan phung, tlai deuha kal te, ban hun aia hmaa haw chin te hi sim tur. Mahni hna zei leh tlin deuh (professional) taka thawh dan zir hi kan hmasawnna tur tak a ni.

Kan hnam kan tlem a, mahse kuthnathawh kan in sawi hmuh dan a lo dik lo deuh ṭhin bawk si a. Hna hnuaihnung lam deuh thawk tur hian Mizo ṭhalaite kan intodelh thei mai dawn lo. Hna hnuaihnung lam deuh bik thawk tur hian kan chhehvel hnamte hi kan la mamawh deuh reng maithei a, mahse anniho hi kan inbum tir fo tawh loh a ngai thung. Chutiang tur chuan Mizo mipuite pawh kan fin var a hun e. Tin, kan state chhunga awm hnam dangte mumal taka khuahkhirhna dan sorkarin a siam vat pawh a ngai.

ILP nei turin vaiho hnenah Mizoram sorkar hian application man Rs 2000 leh security deposit Rs 2000 kha a la ṭhin a, a bak fee dang a ngai awm ka hre lo. Hetiang ringawta ti lo hian hian mistiri ah thla tin Rs. 500; helper ah thla tin Rs 200 te hi hi lak ni ta zawk se. Sorkar revenue a pun phah dawn bakah awmze nei zawka hnam dangte kan enkawlna kawng pakhat a ni dawn a ni.

Mizo leh hnamdang pawh ni se mistiri putlingin a thiam ngei tur kha an thiam chiang a ni tih entirna (skills certificate) te pawh tehna mumal tak siama pek chhuah ni se. Hnamdang tan bik erawh chuan, DC office lamah hian an certificate neih dan milin an ILP fee hi bituk sak ni se. Mistiri leh helper ILP fee te hi inang veka siam loin awmze nei takin siam ni tawh se. Sorkarin dan te siamin hma la se, awmze nei zawkin kan in kaihruai thei dawn a ni.

- Vohbika Pu