MIZOTE LEH FIAMTHU

Ka u Tluangte Hnamte kha fiamthu duh em em mai, phuahchawp zung zung mai ṭhin kha a nia. Chhungkua/unau inhmuhkhawm nikhuaah pawh nuih tur chang khan kan bawr tuau tuau ṭhin. A fiamthu phuahchawp pakhat chu, “Bawngpu pakhat hian a bawngchaw zawnnaah sunglass hring a vuah a, hnah ro hlir a la a, a bawngin a ei duh ta reng reng lo mai a. A tihngaihna hre lo chuan a tawpah a bawng chu tarmit chu a vuahtir ve ta ringawt a, hnah ro chu a ei zo vek mai mawle” tih hi a ni. A sawi tum chuan kan nuihpui nasa hle.

Pawi ta deuh chu - chu fiamthu chu a kual a kual ta ni ngei tur a ni. Ṭum khat chu ka inkhawmnaah kohhran Upa pakhatin pulpitah a sermon sawi tihfiah nan thil thleng tak tak ang chiaha a sawi ka ngaihthla fuh ta mai a, zialo ka va’n ti tak! Kau Tluangtea hian luiral lehlama min kalbosan tak hnu khan a ṭhiante zinga pakhat chuan, “Tluangtea kha chu a chang chuan a ngeiawm lek lek ṭhin. Ṭhian hovin thu khunkhan tak kan lo sawiho lai te hian a rawn thlen chinah chuan ho deuh deuhin a rawn sawi zawm a, han inhmuamup tum teh mah ila, kan nui leh nge nge ṭhin” a ti. Ka u fiamthu kha a chang chuan a ṭhiante ngei pawh khan hun an tih loh chang a awmin, a tawpah erawh an lawm leh viau tho a.

Mizote hi fiamthu duh hnam kan ni. TV lamah pawh Comedian Search chu ennawm hlawhtling ber zinga mi a ni reng mai. FTH Channel (LPS) chu channel en hlawh ber zinga mi a ni bawk. Kan fiamthute hi ṭhenkhat chu zahmawh rawngkai leh ṭawp zet zet pawh a ni ṭhin a, in khap tum poh leh a zual emaw tih mai tur a nih chang pawh a awm fo.

Fiamthu hian mi a tihlim a, rilru a chhawk zangkhai tih hi kan pawm tlang vekin ka ring. Nui ngai lo mi chu mi khawngaihthlak tak a ni a, fiamthu ngaithei lo mi chu mi awhawm lo tak a ni ngei ang. Chutiang taka hlimna leh zangkhaina thlen thei thil chu bawh hum hum a, fiamthu thiam nih vek emaw, engkim mai hi nuihpui tura rilru pek mai tur tihna em ni ang?

Ni lul lo ve!

Fiamthu hi a hun leh a hmunin azir chuan nun tihlimtu a ni. Chutih rual chuan mi rilru tinatu a ni thei bawk. Keinin ‘fiamthu’ tia inthlahrung lo taka kan sawi leh kan thehdarh hian tu emaw nun chu hrehawm takin a lo siam reng thei a, a pawimawh takzet a ni.

Fiamthu kan duh luat vang emaw, miin kan thusawi nuih pui dur dur sela kan tih avanga nuih tur kan zawnna lamah mimal tu emaw rilru kan tina thei tih hi hriat makmawh a ni. Ṭhenkhat chuan tu emaw zurui khawlaia che nawi tak chu a nuihzatthlak tiin a(n) thla hial laksakin an thawn darh ta ṭhin a. Mi tam tak chu an lo nui maithei, mahse kha mi chhungkhat laina hnaite chuan rilru na leh zak takin an fapa/ fanu/ u/ nau thla chu an lo thlir ve thung ang. Tu chet dan emaw hi kan tan a nuihzatthlak a nih pawhin tu emaw tana hrehawm/ natna thlen thei a nih avangin insum hun leh uanna hmun hriat a ṭha hle.

Veng chhung, ram leh hnam khawih thil duhawm lo a thlen changa bengsika hmachhawn dan tur ngaihtuah ho a ṭul laia uanthuanna atana lo hman te hi ‘a hun lo’ - upate’n an lo tih ang hi a ni ngei ang.

Keini hnam hi chuan lirnghingte pawh a nghin hnu minute hnih/ khat lekah fiamthu nan kan hmang zui thei mai a. Khuarel chhiatna, mi tam takin nunna leh in leh lo an channa leh an rilru nat ngawih ngawihna pawh lo ching pawrin nuihzat theih tura chhawp chhuah kan tim hauh lo fo chu a nih ber hi!

Fiamthu kan uar lutukna lamah thu taka lak tur chi pawh phuah danglamin mi naran tan thu dik hriat harsa khawpin kan ching let fo a, ṭhenkhat phei chuan a tawpah anmahni fiamthu chu a tak emaw tiin anmahni bawk chuan an awih leh hial a ni!

Fiamthu hian hmasawnna a dal kan ti a ni maithei, hmasawnna kan hriatthiam dan pawhin a hril thui viau bawk ang. Amaherawh chu kan fiamthu duh lutukna hian tu emaw a hliam emaw, eng thu dik emaw tidala thutak thupna hmanruaa hman a nih chuan, thil nihphung pangngai chu a ni dawn lo phawt mai.

Hlim / nuih hi damdawi ṭha ber a ni. Mahse tu emaw natna leh zahna thlen lo chi ni sela, thu dik thup bo thei khawp uanthuanna laka insum tum tlat chungin fiamthu hi a thiam apiangin thawh zel ang u.

- Dikteii Hnamte