Aizawl Traffic chungchang

Aizawl khawpuia lirthei tam tawh avanga traffic jam nasa lutuk hi nitin kan hmu a. Traffic jam nasa hi pumpelh theih loh khawp ngaia neih mai awl a ni. Chuti chung chuan, traffic hotute leh a duty ten hma an lâk azâra ziaawm viau zawk a ni. Lirthei number indawt pahnih inâwl chhâwk hian traffic jam nasa lutuk tur a tiziaawm a ni.

Chutih lai chuan hmun ṭhenkhat, a bikin Vaivakawn leh Bawngkawn-ah hian nitin traffic jam hi a nasa bik reng mai a, traffic duty te thurâwn pek ka duh chu : duty te hi phar nasa lo sela, lirtheite hian anmahni hun tur remchang an tih ang zel hian kal mai sela tih hi a ni.

Duty te an intihthu lutuk leh mi thunun an tum nasat (proactive) lutuk apiangin traffic kal lai (flow) a ding zing. Reilotê din pawhin motor tam tak an inhnawh a, jam a siam nasa zualin a lang.

Traffic duty hi chu lo ding ve ringawt sela, chhun engah chuan tumah intai leh insu duh an awm lo, kal inchuha intibuai an awm ngai lo. Duty-te hna pawimawh zawk chu traffic point aṭanga hmuh phâk loh deuh laia motor lo dah leh traffic dan bawhchhia vâi hi a ni zawk mahin a lang.

Traffic point-a duty pahnih pathum awm ai chuan duty zinga pahnih emaw te chu kal kual se, traffic dan zawm lova lirthei lo dahte man se a ṭha zawkin ka hria.

Mipui vangtlang tana awlsamna aia harsatna siamna thil dang leh chu : Khatla kawn aṭanga New Secretariat (New Capital Complex) kaltlanga Chawnpui leh Dinthar veng inrina, Ebenezer Medical Center pawha kawngpui hi kawng ṭangkai tak a lo ni ta. A chhan chu Aizawl tlangdung kawngpui tâwt lutuk pumpelhna ṭha tak a ni.

He kawng hi chhunah hawn a ni a, zan lamah khâr a ni tlat hi mipui vangtlang tan harsatna siamna a ni. A chhak lam leh thlang lamah gate siam a ni a, police duty dah a ni. Zan lam dar 7 bawr vel aṭang chuan mipui tan kaltlang a rem tawh lo. A chhan ni bera lang chu ‘helai hmun velah hian nula tlangval leh damdawi hmang khawlo ṭhin an tlangnêl lutuk’ tih a ni. Hei hi chhuanlam tling lovah ka ngai.

Hei hian khawpui chhung mite tana awlsamna aiin harsatna a thlen tlat a ni. Rikrum thil leh hmanhmawh thil tak tak a nih loh chuan VIP nih loh chuan duty ten mi naran chu an kaltlang tir duh lo tluk a ni. Khawpui chhung nun tinuama remchang siamtu tur kha helaia traffic/ police duty awm hian harsatna an siam ta tlat a ni.

He kawngin a paltlang office hmun­hma veng himtu tur chu office chowkidar an awm vek. Secreta­riat-ah phei chuan security guard emaw dah mai ni se. Sipai hmun leh sorkar hmun pawimawh bik (restricted area) awmna pawh a ni si lova, hetia keimahni leh keimahni harsatna, awlsam lohna kan insiam hi chu tihtawp ran chi a ni.

Sorkar lam thunei­tu dik tak ni lo, veng/ hmun pakhata cheng­ten mipui nghawng harsatna siam hi tihtawp vat a ṭha hle mai.

- Saralynn-i Pu