CAG REPORT KAN RINGHLEL ELO?
Nikum September ni 6-ah khan Comptroller and Auditor General (CAG) Report chungchang hi, ka hriat loh ang angin ka sawi tawh a, khami hma lawk Assembly Emergent Session-ah khan CAG Report hi pharh a ni a, chutah chuan Mizoram sorkar hnuaia sum hman dan dik lo lam thil a lang nual ni àwm tak a ni, tihte kan sawi a. CAG hi ram danpui bung leh chang fel tak tlawhchhana ruat, thuneihna sang tak nei, sorkar laipui leh state sorkar bâkah sorkar din office, Board leh sorkar company sum chêt vel dan endiktu a ni. CAG hi Indian Audit and Accounts Department hotu a ni bawk a, ram pumah thawktu 58,000 chuang an nei. CAG hi a lal hle a, ram pumah lal dan indawtah 9-na daih a ni a, Supreme Court Judge nen lal dan thuhmuna ngaih a ni tihte pawh kan sawi.
Tun hnaiah CAG report chungchang hi kan sawi leh sawi leh ta mai a, a dik vek lo thei tihte kan sawi ta a. (NLUP) NIB-in CAG report a pawm lo, tih te pawh chanchinbu-ah kan lo hmu. Kum 30 chuang kal taah khan Pu JK Kapoor-a'n Printing & Stationery Dept. Controller a nih lai(?)-a Peon pakhat a bàn a, ani chuan, 'Ka pu, min bànna ka pawm lo. Ka báng dawn chuang lo' a tih te ka hre chhuak. CAG report pawm lotu êm atan chuan kan lian tâwk lo deuhin ka ring. CAG hlui, Vinod Rai-a phei kha chu Manmohan Singh-a ching raltu (the man who demolished Manmohan) an tih hial kha a ni a, a lehkhabu, 'Not Just an Accountant' chhiarte chuan in hre chiang hle ang.
CAG report siam dan hi, a hriaten an sawi danin, vawi tam tak an inzawh fiah a, sawifiah ngaite pawh a theih ang anga sawifiah a nih hnuah fimkhur takin an report hi an siam ṭhin, an ti a. Huai taka an ṭan ngamna tur thil lo-ah chuan sorkar laipui emaw, state sorkar emaw, an endikte hi an páwng puh hmingchhiat mai chu rin a har. Kan insawifiah hleih theih loh hnuah report a lo chhuak a, kan zahpui leh deuh si em ni? Mi zinga mualpho nek hnua mahni in chhunga dawhkan chùma inhrosa te pawh kan ang palh ang tih a hlauhawm.
CAG report hi a dik vek lo a nih a, min tarlan dan hi nuam kan ti lo a nih a, kan sawi ngam tak tak dawn chuan tih dan a awm ang chu mawle. Heti maia ngaihtuah chuan, report-ah hian kan lo fai tâwk lo a nih chuan, anni ai chuan keini lam hi inenfiah tur chu kan nih a rinawm a, kan lungawi thei ngang lo a nih phei chuan, heta inhrosa lovin, khutah, a thlenna tur dik a awmin a rinawm. Kan lungawi loh thu te, a dik zawk te, min tihhmingchhiat avanga a pawizia te hi zu thlen ila a
ṭha lo maw? Heta 'kan pawm lo' kan lo ti hi zawng, JK Kapoor-a te kan ang riau a nia.
England Football Manager atana Sweden pa, Sven-Goran Eriksson an hman laia England leh Sweden inkhelh dawna ka ringhlel tlat mai te kha ka hre chhuak a! A manganthlak duh khawp mai! CAG report-a kan hmingchhiat avang hian engnge lo thleng thei, tih chu ka hre tak tak lo a, a ni lo berah, kan insawifiah zawh si loh chuan hmingchhiat chu a ni phawt mai ang a, a dang zel chu ka hre lo. Kan sum khawih dan bawrh bawrh hi a mak hlawm em bawk a, mualpho ve àwm pawh hi kan ni mai thei. CAG report meuh pawh kan pawm hlei thei tawh lo a nih chuan, India ramah hian kan fimkhurna atan engnge kan neih tawh ang?
Heti kan nih chuan ni kin ni-a rorelna pawh hi 'kan pawm lo' thei hial ang tih a hlauhawm ta a, tute emaw sorkar lai chu ni se, tuna kan ṭan lohna lamah hian kan ṭang leh fur mai thei bawk. Party ruih chilh hi chu a hnawk teh e.
- RK Lianzuala