Special Drive

Vanglaini June 5th chhuakah khan kum 18-21 inkar tana electoral roll-a inthun luh rûnpui, Special Drive neih tur sawifiahna neih a nih thu tarlan a ni a. Election Commission of India (ECI) tarlan danin, special drive kalpui dan tur hi June 1, 2017 khan District Election Officer/ DC-te chuan an district

ṭheuhah an puangzar tawh a; beihpui hi July 1, 2017 aṭanga ṭan tur niin, July 31-ah zawh a ni ang.

Special drive-in a tum ber chu, India khua leh tui dik tak, kum 18 tling tawhte hmaih awm loa electoral roll-a thun a ni a, kum 18 leh 21 inkarte ngaih pawimawh bik tur a ni.

India ramah chenga awm kan nih chhung chuan kum 18 tling tawh phawt chu chanvo leh ham-ṭhatna hrang hrang dawng thei tur chuan electoral roll-ah kan hming a chuan a ngai a ni. Sawrkar-in hun remchang min siamsak hi bawhpelh loh hram hram tur a ni. Kum 18 tling tawh vote neih nachang hre lo leh vote neih pawimawhzia la hre lo kan nih chuan keimahni leh kan chhungte thiam loh tihna a ni.

Thingtlang hmun tam takah hian mahni awmna party duhsak luat avangin kum tling lo chungin mahni fate kum zat sawi upa-a vote neihtir (tum) an awm ṭhin niin a lang. Hetiang thil hi a changkang lo va, khua leh tui ṭha tan chuan tih loh tawp tur a ni. Vote hma takah neih tira an duhthlanna thiang tak hmang thei lo tura siam hi nu leh pa te tih atan a mawi lova, naupang rilru hruaisualna hmahruai a ni thei tlat a ni.

Vote neihtir kan duh avangin an kum zat kan sawi/ ziak upa a, an educational certificate-ah an kum zat an ziak naupang emaw a dik takin emaw an ziak leh si a; mi pakhat documents kha a inmil lo nuai ṭhin a. Chutiang document inang lo nuai siam ṭha tur chuan dan lam thiam leh dan lama hnathawkte rawih an ngaih phah hial ṭhin a ni. Buaina nasa zawk a thlen thei ṭhin a ni. Chuvangin, kum zat dik tak sawi a, ziah a, nihna anga lan mai hi a ṭha ber a ni.

Sawrkarin hun remchang tawite min siamsak hi kum 18 tling tawh si vote la nei lo chuan chhawr ṭangkai a, vote neihna hun bik atana hman i tum ṭheuh ang u.

- Isak Lalrinsanga, Thingsai