MIZO KAN NI TLAT

Hripui a leng e, tia ral khel dar khawn rik a nih rualin, inkhar khipin, ramri veng turin Mizo ṭhalai rual an pen chhuak ve nghal a. Mutbu telin, faisa ring ṭhin te kha, a rem rem eia in turin, dam leh tlang khatah, thih leh ruam khatah tiin ram hnuai pilril lamah in liam vawn vawn a. 

An in leh lo, nupui fanaute tlansanin, he ram leh hnam  hi chhanhim in tum a. Ral ven buk ṭha leh him an nei lo a,  ṭo haw hun leh ruahpui vanawn a thawh hun lai a ni tih hre chungin an thawk chhuak a. 

In hmaah rilṭam, tuihal, hreawmin a hmuak tih hre chungin, he ram leh hnam tan hian an pen chhuak a ni. Khawvel hmun dangah sipai ni lo, mahni ramri venga thawk chhuak hi an awm ve a nih pawhin an tlem ngawt ang. 

Nangni, ramri a ram veng himtute u, he hnam hian zahna chibai kan buk che u a, he hnam tana in rinawm tlat avangin rinawmna chibai kan buk che u. 

Nundan phung pangngaia khawsa hman lo khawpa hri vei enkawltute leh hri vei zawng pawl te, damdawi ina thawktu zawng zawngte u, a thim a var thlu loin, sawi leh sel, hah leh rim tawng pawh sawi loin, in hna chu chhel leh huai takin, in thawk mawlh mawlh a. Hri zawngin in  mit a thial erh urh a,  rilṭam chungin zan in tum tawi a. In chipuite natnaah hian in na tel ve a. Tidamtu rinchhan chhungin, in thiamna, in theihna in hman zozai te hi a va nasain, in inpekna hi a thukin a va sang em! 

Nangmahni kal tlangin chung lam khian hri veite chungah, damna kut a phar ngei kan ring tlat a ni. He hnam hian zahna leh rinawmna chibai kan buk a che u. 

Venhim ngai apiang veng him a, puih ngaite puitu, a sual a ṭha thliar loa in rinawmna leh in inpekna avangin, Mizoram police te pawh in va chhuanawm em! Dai kil kawmkar leh a hulum laiah chin fel ngai apiang in ching fel a, boruak sosang awm palh thei in vawng dai zel a, in zarah nunau thlabar turten muanna an hmu ṭhin. 

Sorkar tha tichak tura din, tlang hrang leh mual hrang hranga task force te, in hnathawh hi a va ropui em! Hlawh phut loin, chaw kawpuar pawh eia in mumal hman loin min thlamuan a. Tualcharah in thisen a luang a, ram riah ka pawh chhawn loin in tlusawp a, nunna hlu tak thlahlel hleithei loin he hnam himna hi in nunna nen in thleng a. Chawimawina sang tak nen tiang hrang thlanah zalh in va phu em! Zahna chibai kan buk a che u. 

Rorel pawlte u, ngaih­tuahna thiang leh rilru fim hman a hun lai tak hian thutlukna dik leh fing in hman theih nan in hnungah ṭawngṭaina nen kan dinpui tlat che u. Kan himna tura in thawh hahzia kan hria a, kan chhuang che u a, lawmthu kan hrilh a che u. 

Phai ramah, kan hmel ang pute hmuhsit leh endawng an hlawh lai khan, Mizorama an lo haw theihna tur atana sawrkar hmalakna te, state hrang hrang a Mizo intelkawm pawlte hmalak dan kha a va ropuiin, a va hlu em! In hahna leh inpekna avangin India ram hmun dangah kan hming a ṭha a. India ram hmun danga haw runpui hmang mekte nena khaikhin phei chuan in ruahmanna a felfal a. 

A buaipuitute in fakawm a, a rawn hawte pawh in felfai fu a. A lo dawngsawngtute pawh an fakawm e! Mizo nge nge tiin kan chhuang em em a che u! 

Chi puite rilṭama an awm lohna tura state pawn aṭang­a mamawh zualpui rawn phur luttu truck driver te, tangkhang phurtu driver leh conductor te inpekna pawh a fakawm e. Hlawh chu hlawh ni bawk mahse tun ṭumah kher hi chuan inpekna a ngaih tel avangin in inpekna hi a hlu a, zahna chibai kan buk che u a ni. 

Thingtlang mite u, in thlai thar tuihnai tak tak te, sum a chantir aia chipuite tana a thlawnin in han sem kual a,  va ropui em! Khawpui mite tan entawn tur in hnutchhiah hi a va hrawin, a va hmuhnawm em! 

Thiam nei ve lo, mipuite hian a him chin aṭanga lo puih ve theihna che u kan neih phawt chuan,  kan inpeih a, kan inkau reng. Zam hauh lovin, Pathian ring chungin, sorkar ruahmanna zawm chungin, mahni theihna zawn ṭheuhah theihtawp i chhuah tlang zel ang u. 

Engtik niah emaw chuan he hnam hian he hripui leng mek lakah hian hnehna hla do kan la chham ngei kan beisei a. Ṭanrual hi chakna a si a. Mizo hnam dam reng rawh se.