Ram leh hnam hmasawn nan ‘change’ a pawimawh

Ram leh hnamin hma a sawn dawn chuan ‘change’ a hmasa ṭhin; change tih chu thil inthlakthleng tihna a ni mai. India ramah Congress dynastic rule kha la awm zel se tun ang hi a thleng lo maithei. Chutiangin BJP pawh hi lal reng suh se, an zia an chhuah tak tak hunah chuan Hindunisation bak tih tur an hriat loh hun a lo awm ang.

‘Change’ tih hian Congress leh BJP inthlakthleng tir chhen tur tihna a ni lo, Party dangah te pawh hruaitu fel leh tlak an awm hun a la awm ang. Chutiangin literacy rate sang tak nei Mizoram hian Congress leh MNF inthlakthleng tir chhen chu a tih tur a ni lovang, ‘change’ a tling lo a ni. Heng charismatic leader nei party-te hian Chief Minister-a an chhawp chhuah tur a hriat sa reng a ni. Chief Minister ni lo zawk pawhin a Chief Minister leh huna a thiam dan tur te a sawi ṭan tawh tih a ni.

Ram changkang USA-ah chuan an top leader atana an thlan President chu term hnih kum riat bak an chelh an rem ti lo, a chhan chu mihringin a theihna (talent) a hmang zo tawh an ti a ni. A bak eng chen pawh President ni leh mahse ‘change’ a thleng lovang tih an hre chiang hle a ni. Mizoramah tuna CM ni mek hian a kum 25-na hmang zo turah ngai ila, CM pakhat zawk pawh kum 10 zet a CM tawh. Mizoram leh hnam hmasawn nan ni lo an thlanlunga la ziak atan chauh a la ṭangkai ang tih a hlauhawm khawp mai. Heng kum sawmthum chuang chhung hian chawpui ‘buh’ ah intohdelh a awm lova, power-a intodelh leh BPL a thlawna eng chhit sak tih a awm lova, tui harsatna a kiam lova, unemployment rate a sang tual tual a, ruihhlo a hluar tial tial bawk niin a hriat a ni.

Ram hruaituin talent a neih that chuan ram leh mipuiin a mamawh eng ber emawah tal pawh ‘change’ a thlen tir thei a ni. An hun laia khawvel sawrkar ropui ber Britain mipuite khuan an tih tur tak an hre ṭhin. Khawvel indopui pahnihna (second world war) a thlen khan an PM Chamberlain chu a chak tawk lo tih an hria a, a aiah mi huaisen leh hrohrang na tak Winstone Churchill chu PM-ah an thlang ta a, pa namai lo tak a ni a, hnehna pawh an chang ta reng a ni.

Indopui pahnihna a zawh khan indonain a tihchhiat British economy siamṭhat a ṭul tih an hri a, PM-ah Mr Attlee an thlang leh mai a ni. Ram mipuiin ‘change’ tih nachang an hriat loh chuan ramin hma a sawn tak tak thei lo a ni. India rama state rethei pawl tak ni ve ṭhin Punjab State chu ei turah hun rei tak chhung purchaw hnam an ni ve ṭhin a, mahse a tawpah Mizoram buai kum vel aṭangin CM Kairon Singh Barnala an thlang fuh ta a, rei lote chhungin Punjab chu ei bera intodelh mai ni lovin India buhzempui pakhatah a siam thei ta a ni. Party ngawl vei leh charismatic leader buaipuitute tan ngaihtuahna hman a hun tawh hle-in a hriat a ni.

- CT Ruata, Tuikual