School naupang bag rit leh naupang chhawr

Kum 7 vel liam taah khan naupang bag rit lutuk hi ka ziak tawh a, an tihzan phah ta chuang lo chu a nih hi! Tunlai naupang bag rit lutuk hi an khawngaihthlak hle mai a, changkang deuh fate chu lirtheia hruai an ni a, a ṭhen chu an awmpuiten bag an ah sak a, school-ah an dah/ hruai mai ṭhin.

Khawlum lai phei chuan an thlan nen, an in ak par par a, an berh phang mai a ni. An bag rih chhan hi lehkhabu a ni phawt a, tiffin leh tui an pai a, hei hian a tirit belh a. Tui thianghlim lo an in kan hlauh avangin tui kan paitir a, hei hi school-ah filter te kawlin naupang tui pai ngai kher loin a tih theih dan a awm lawm ni? Tiffin hi pai pawh nise an lehkhabu hi a rit lutuk reng reng, zirtirtute hian heti em ema tam lo hi lehkhabu kentir dan ngaihtuah se ka ti ṭhin.

Naupang dang: Khamrang huanah motor-in ka feh fo a, chuta ka hmuh ṭhin hmuh nuam lo leh hreawm, khawngaih­thlak, naupang te te feh ka hmu ṭhin. Khamrang aṭangin an kal a, an kalna a thui hle mai a, a ṭhenin ar an pawm a, a ṭhenin buhfai an pu bawk a, a ruaka kal te pawh an awm ṭeuh mai. A theih zat zat kan phur a, an buhfai bag te kan phurh sak a, ka han zawt a, T.N.T naupang an lo ni hlawm a, a zia lo ka ti hle mai.

Naupang ṭhenkhat chu an awm ṭhat duh loh vanga an chhungten an dah te pawh an ni ang a, a ṭhen chu fahrah an niin ka ring. An tih tur ka han zawt a, buh seng turin an kal a lo ni a. Han en reng reng pawhin buh seng rual an ni lo hrim hrim a ni. Hnuchham enkawlna ṭhenkhat hi chu an hnathawh ṭha hle mah se company lian tak ang mai an ni tawh a, naupang hi chu chhawr lutuk tur an ni chuang lo, an hotute hian ngaihtuah chiang se a va ṭha em!

Ka chanchin aṭang­in, naupang chhawr lutuk aṭanga lehkha thiam loh theih a nihzia ka han sawi duh a. Kan naupan lai aṭangin bawng rual kan vulh a, a chang chuan bawg 70 te kan nei a ni. Ka pain bawnghnute, pui 10 te a sawr a, a note pawh hran a lo ngai a, kan unau hmeichhiate nen lam kan pui ṭhin a ni. An ek kan paih ziah bawk a, Middle School kan kal aṭangin bawnghnute ṭheka kan sem pah a, tlai lamah bawnghnute bur ruak kan khai a, kan tlan ri chhawr chhawr ṭhin.

Khang hunlai khan bawng kha ramah kan tlattir avangin ram hnuaiah kan zawng a, kan khalh haw leh a, a note sawrlai fate kan thlung khawm leh vek a, zingah kan sawi tak ang khan khel loin kan ti ziah a, kan lo tleirawl chho a, huan sam, lo vah, hlo thlawh a lo ni leh a, khatiang reng reng chuan lehkha a zir tak tak theih loh. Kan tihtur zing aṭanga tlai thlenga khel lova ka hmabak kha kan enghelh zawk tlat zel a ni. Chuvangin, naupang te lehkha thiam tir kan tum a nih chuan chhawr tam lutuk hi a ṭha lo ka ti a ni. Tin, Kohhran leh Y.M.A vela in hman tam tir lutuk pawh hi thatchhiatna leh chapona hmawr a ni ka ti duh hram bawk.

- R. Lianhluna, Tuikual South