Vote 3,00,000 aiah Vote 25,000 an hmù dâwn ta
Kan dil pawh ni miah lovin amah Pu Zoramthanga'n kan awm mai mai lai kha cheng nuai 3 pek min rawn tiam ringawt a. A sawi thiam bakah patling Chief Minister ve meuh lo ni tawh, Chief Minister nih leh zel tumin a tiam a nih vang khan kan lo awih tlâng ve mai a ni.
A hmaa duh loa hnawl hnu, term hnih chhung MLA pawh nei zo tawh mang lo MNF tho kha kan han thlang tlinga Rs 25,000 chiah an sem ta a ni.
Nuai 3 hi chhungkaw tinah sem ta tak tak se, NLUP dawng tawh zawng zawng pawh han pe nawn leh thlap se chu MNF tán kum 2023 inthlan lo awm tur hmachhawn hi chu a nuam ngawt tur a ni ngai a. Tunah chuan miin an dil zat an pe thei lo tih ni lovin mi pawisa puk pe thei lo ang chauh kha an lo ni leh ta mai.
Mahni tiam zat aṭanga 50% chu sawi loh chumi let aia tlem pawh chu an pe thei ta si lova, inthlan hi pawisa sem nena hmachhawn ṭhin tán chuan a huphurhawm tawh dâwn a ni.
Rs 25,000 hi chu a tlem lulai a ni. Thlà khatah pawh ni se thingtlangah mi a inhlawh peih chuan ni 15,000 vêl a la phak a, kum 5 chhung atana chhungkaw intunnunna tura Rs 25,000 teh tlawng chu a tlem lu hret chu a ni. Eng sumdawnna pawh hi hetiang pawisa aṭang hian bul ṭan dâwn ila a huphurhawm lam chu a ni e.
Zaithiam intihsiaknaah mai mai pawh nuai chuang fe fe an theh chhuah tawh laia chhungkuain kan vote meuh thâpa kan nghah chhuah chu Rs 25,000 a nih chuan vote nawn chu a harsa lam a ni tawh ang.
Chhiarkawp dan a ni emaw ka hre lova, vote ni ta se Rs 3,00,000 beisei laia Rs 25,000 lek dawn hi chu vote 3,00,000 hmù turin vote 25,000 lek an hmuh phah ta a ni dâwn tihna a ni si a. MNF hian pawisa sem an titawp ngam a nih si loh chuan an intiam zat aṭanga an sem zat tlem lutuk hian an vote a tihtlem phah thei ngei dawn a ni.
- H Lallianzuala