Chanchin Ṭha nena inmil zelin aw...

Mizote hi Kristian kan nih ang takin kan thil tih apiangah Pathiana innghat tur kan ni a, kan thil tih apiang Chanchin Ṭha nena inmil zel ni thei sela. Kolasib kawng dan avanga mi tangkhang ṭanpui ngaite chunga mi tlawmngaite thil tih te kha a va mawi tak em!

Lal Isua chu chawi­mawiin a awm a, chumi rual chuan Mizo nih pawh a nuam a ni. Kan ram rorelna pawh hi Krista Chanchin Ṭha nena inmilin kal zel thei sela. Mi tu pawhin an hnena an mamawh an sawi apiang chu ngun taka ngaihthlak sakin anmahni tibuaitu mai maia ngai loin kha kha an hna dik tak a ni tih hre reng se la. Lo in tih lal khumin ngaihsak tlakah ngai lo mai lo sela. An thil ngiat te pawh chu tih awm tak tih mai theih si an lo mangnghilh palh te a nih hlauh phei chuan nawr nawr ngai loin ti mai sela, nawr kal kher ngai sawrkar nih tum lo sela.

Nuar ho te hian "Vawi tam tak thu neitute hnenah kan sawi tawh a, ngaihsak kan hlawh lo" an ti ṭhin a, a pawi hle a ni. Tihsak awm tak leh tih theih a nih bawk chuan a titu tur chu sawrkar a ni a, thil tih awm lo leh tih theih a nih loh pawhin nu leh pa chan chang taka thil awmzia lo hrilhfiah chu an hna dik tak a ni bawk.

Zoram ringtute nun hi kan in en chian a ngai tawh a ni. Kohhran thil tihnaah chuan kohhran takin, YMA anga kan tihnaah chuan YMA takin, politics a nih chuan pawisak pawh nei lo ang maiin mah se mihring chu a ngai hlir kha kan ni si a. Hetianga nun mumal lo, a changa kristian, a changa khawvel mi tak nih hi kan Pathian thu chuan a pawm loa, kan nun pum hi a thu anga hmang turin min duh a ni.

Sorkara kan duhte kan dil ṭhin hi kan tih tur reng a ni a, mah se midangte ngaihtuahna nei loa mahni hma chauh kan sial lutuk chuan a kristian lo ang a, nunhona pawh a tibuai thei ang. Kan ngiat kan nawrna kawngah hian a huaibak zawnga beih vak kan ching tawlh tawlh dawn pawh niin alang. Chanchin Ṭha pawh hre loho thil tih dan kan entawn ta lutuk a ni.

Sorkar pawhin harsatna a nei ve thei a, chu chu kan hriat pui thiam a ṭha a, buai lohna turah kan buai tam tawlh tawlh ang tih pawh a hlauhawm ta. Kan awm dan leh Krista Chanchin Ṭha hi inmil rawh se.

- Sanglura Sailo, Electric Veng