Sakawlh leh tunlai thil awmzia

Hetah hian fin a ṭulzia a lang. Chhut thiam chuan sakawlh nambar chu chhut rawh se; mihring nambar a ni si a; a zat chu 666 a ni.

Thutak Bible zirtirna dawng fumfe lote zingah Bible thu hian mi tam tak a lo tibuai fo tawh a, a tibuai reng dawn a ni. A chhan chu Setana hian hmanrua ṭha tak tak tunlai mila a rawn chhawp chhuah zel vang a ni. Piantharna dik tak neitu, thutak Bible chiang taka zirtu, belh tur dik tak bela ṭawngṭai ṭhintu nun chu heng zirtirna dik lo tak tak thli rawn tleh vuk vukin a len per ve ngai lo va, a nghing ngai bawk lo vang. Sakawlh 666 hi tun maia buaipui kan ni lo va, khawvel hmun hrang hrang ringtute nun lo chawkbuaitu a lo ni tawh ṭhin a, engemaw thil danglam deuh a lo thlen veleha lo hmehbel tum hram, mahni ngaihdana lo chhut ve mai, chhut tluantling thiam leh si lo te hi an buai em em zel si a nih hi!

Sakawlh 666 thuah hian kohhran hruaitute an pawimawh. “Buai loh tur, a hlauhawm lo” tih ngawt a tawk lo va, miin a hre fuh lo va, a buai si chuan hrilhfiah an ngai tihna a ni. Bible-in a sawi tlat alawm, chhut a ngai a, a pawnga puia chhut ringawt pawh a ni chuang lo va, Pathian rawn chunga kan chhut a ngai

ṭhin reng a ni. Sakawlh 666 hi mithiamte zingah pawh ngaihdan tam tak a awm a, sawi sen a ni lo. Mithiam zawkten an rawn sawi zawm atan a pawimawh tlem chauh tarlang ila, kim lo tam tak a awm a, he thu-in a tum ber zawk erawh chu ringtu intite buailohna turah kan buai ṭhin niin a lang a. Tun dinhmunah chuan buaina em em tur a awm em ni? tih kawhhmuhna a ni mial thei dah law maw? ka ti a ni.

A ziaktu khawvel hun:- Thil reng reng chhui dawn chuan a ziah hunlai khawvel dinhmun zir a ngai ṭhin. Thupuan bu hi thu harsa pui pui, hriatthiam harsa tak a ni a, a lehkhabu thute hi Juda-te lehkhabu ziah dan chi khat ‘apocalyptic literature’ (khuhhawnna thuziak) hmanga ziah a ni a, Johana ziak bu dangte nen pawh Grik

ṭawng hman dan pawh a inan lohzia Bible mithiam R.H. Charles chuan a sawi nghe nghe a ni. A ziah hunlai khawvel hi ringtute tihduhdah hunlai tak niin a lang a, hlauhna leh harsatna karah ringtute thlamuanna thuchah puanchhuah a ngai si a, a hunlaia a chhiartu turte tana hriatthiam awlsam tak ni ṭhin kha, tunlai khawvelah chuan hriatthiam a lo harsa tawh ṭhin a ni. A

ṭhente phei chu thupuan dawngtu Johana pawhin a dawn bak sawifiah thiam lohte pawh a awm niin a lang. Ṭawngkam mak pui pui sakawlh, dragon leh hmeichhia leh thildang tam tak, number hrang hrang kan hmu ṭeuh a ni. Thu awmze ril tak nei, thu inthup si, hun kal tawh, tawn mek leh lo la awm tur karah inhnialna tawp thei lo erawh a awm reng thung.

Sakawlh 666:- Sakawlh (wild beast) hi Bible-ah hian a awm nual a, ramsa hlauhawm tak, mi sehhlum hmang tiin sawi ta ila a dik ber mai thei (Study Bible). Ramsa kawlh tak tak anga a ngiala ngana zuk hmehbel chi a ni lo va, tehkhin thu a ni. Ramsa kawlh anga mihring zia phawkin tihna a ni mai ang chu. Thupuan bua kan hmuh chu ki sawm leh lu pasarih nei tih a ni.

Kaisara Awgusta hun lai aṭanga Thupuan hun thleng lal pasarih lo langte chu Tiberius (14-37 AD), Caligula (37-41 AD), Claudius (41-54 AD), Nero (55-68 AD), Vespasian (69-79 AD), Titus (79-81 AD), Domitian (81-96 AD) te an ni. Rom lalho hi an hunlai chuan lal tak an ni a, Pathian ang hialah an in ngai hial a ni. Lal pasarih zingah hian Nero hi a lar a, Pathian angah a inchhal hial a nih kha, kristiante tiduhdahtu Nero kha Latin hmingah ‘Nero-Caesar’a ni a, Grik ṭawng chuan ‘Neron Kaisar’ tih a ni. Hebrai ṭawng an han dah lehin NRWN QSR a ni thung. Number zawnga hebrai hawrawpa an chhut chhuah lehah chuan 50+200+6+50+100+60+200 = 666. Nero kha 68 AD ah a thi a, mahse, thi tak tak lo angin thu a thang a, engtik niah emaw chuan a la rawn kir leh dawn a ni tih rinna an nei a, he sakawlh hliam hi a dam leh turah an ngai a ni. (“Tin, a lu pakhat chu thihpui khawp hiala hliam angin ka hmu a; nimahsela a thihpui khawp hial tura hliam chu a dam ta a, tichuan leia mi zawng zawngin sakawlh chu mak an ti a, an zui a”).

Domitian khan lalna a rawn chang a, kristian-te nasa takin a ti duh dah a, Nero a rawn tho leh a, a rawn kir leh ngei a nih hi an ti a ni. ‘Neo redivivus’ an ti hial a nih kha. Domitiana hun lai hian kristiante chu bazaar thil lei leh zawrh an khap hial a ni. Hetiang hian tutu te emaw hming number zawnga chhut chhuah takah chuan 666 chhuak a awm nual thei a ni. Mimal leh ram leh hnam lak bing zawnga Sakawlha inpuhna hi a awm chho zel bawk a, entirna tlem tarlang ila, Napoleon-a, Pope Leo X, Saladin, Hitler, Bill Gates, Saddam Hussein, George W.Bush, Barack Obama, WCC, EU, Reagan-a, UID etc. te an ni. Ṭhenkhat chuan Pope hi sakawlh niin an ngai nghet bur bawk a, Pope title an pek hi Vicarius Filli Dei a ni. Chu chu 666 a ni an ti a, chiang zawka chhut erawh chuan 666 ni mahse pope nihna title a ni.

Bible-ah chuan 666 chu mihring nambar a ni si a. Hrilhfiahtute zinga Preterist ho chuan hun kal tawha thil thleng a ni a, thu chah pawimawh tak ni mahse, hun lo kal leh zel tur nena hmehbel tur a awm lo an ti ve thung. Hengho hi chu a tlangpuiin liberal ho an ni. Ngaihdan hrang hrang neiho te kan sawi seng dawn lo va, a thui dawn lutuk avangin, kutziak (manuscript) ṭhenkhat an hmuh chhuahah chuan 616/610/640 tih a awm a, 606 chuanna sawi a awm bawk a ni. Eng pawh nise, Bible-ah sakawlh no 666 hi rin phawt mai a ṭha ang.

Tunlai UID/ Aadhaar?: Unique Iden­tification (UID) hi chhinchhiahna danglam bik tihna a ni mai awm e. Vai ṭawngin ‘Aadhaar’ an ti. India khua leh tuite a bik taka chhinchhiahna leh venhimna kawng hrang hrang ngaihtuahna aṭanga rawn siam chhuah a ni. He ngaihdan ṭha tak rawn sawr chhuaktu chu Infosys Company Co-Chairman Nandan Nilekani a ni. A lehkhabu pawimawh tak ‘The Idea of India’ ah a ziak lang a, India sawrkarin ṭha a tih em avangin India khua leh tui chhiarpui neih ṭhinah a rawn hmang ta a ni. India ram zau takah hian ramdang mi (foreigner) tam tak an awm a, heng lak

aṭanga khua leh tui hriat hranna turte a ni. Khua leh tuite zingah misual tak tak rukru, pawngsual ching te an awm ṭhin a, awlsam taka zawnchhuah a nih theih nan te a ni. Police te hnuchhuina kawngah pawh nasa taka pui thei tura ngaih a ni. ID Card lem tam lutukte pawh a ti ziaawm hle tura ngaih a ni.

Kum 10 dana India chhiarpui neih ṭhin chu khawvel lo changkang zelin a rawn hrin chhuah pakhat ve mai a ni a, hmalak dan kawng a danglam zel a, chhiarpui pakhat ve mai a ni. India khua leh tui, India ram chauh tan a ni. Sakawlh 666 nena inthlunzawmna a awm lo va, sakhua nena a siamtute rilru-ah pawh engmah a awm lo. Engemaw danglam a lo awm a, rem leh rem lo va hmehbel tum pawl, phi ruai, a nihna tak chhut si lo, awm ang deuh a che ringtu intite zingah hian kan awm ṭhin hi a pawi hle.

Ringtu dik leh nghet chu thil danglam a lo thlen pawhin a phi ruai ngai lo va, Pathian rawn chung leh ṭawngṭaina-in thutak a zir zawk ṭhin a ni. Pathianin a huat em em zawk chu Sakawlh leh a lem chibai buktute an ni. Pathian tak chibai buk hnawla sakawlh leh a lem chibai buktute an ni dawn a ni. Pathian thutak buaipui aiin sakawlh hlaua phi ruai ho te, sakawlh hlau viau si, sual kawng zawh tho si, sual nel viau si te, lei leh hralh chhuah khap hlau viau si te, sakawlh 666 chhut thiam inti, Pathian thu tak hre tluantling si lo, mahni hriatna chapo puia kohhran hruaitute hmu khaw ro viau te kan nih chuan Bible thu hi kan zir chiang tawk lo va, kan ṭawngṭai tam tawk lo tihna a ni. Sakawlh hian engang pawhin min chhinchhiah mahse, amah ringtute hi an ril a tam ang tih hi a awm hauh lo a ni.

Bible-in sakawlh 666 chu a sawi miau a, a lo la thleng ngei ang, mahse, phi ruai hun a ni em? tih erawh kan chhut thiam a ngai. Lo la thleng tur pawh nise, keini ringtute min venghimtu kan Pathian hi engti kawng mahin Setana hian a hneh ngai dawn lo tih hi lo chhinchhiah ve phawt mai teh.

- R.Zomawia