Kawng kan ngaih thah

Kumin chu fur a inṭan hma avangin a enkawltute lam chuan kan inpeih hman lo deuh an ti a, chuvang chuan kumin furpui chu kawng chhia kan zawh tlut tlut dawn a nih hmel. Amaherawhchu tuna kawng chhia tam tak hi chu nikum ṭhal laia chhe tawhte kha a ni a, a enkawltute lam hian hmun ṭhenkhat hi chu an thlahthlam mah mah a ni.

Awlsam leh pawisa tlêm tê sênga siam theih a nih laiin an ngaihthah a, a chhe ta hle a, fur a lo thleng a, siamna hun a awm lo, fur a lo thleng hma lutuk an ti leh a. Fur hi zo ta se, hmun ṭhenkhat hi chu an ngaih thah leh vang vang a rinawm.

Aizawl khawpui chhungah pawh minister awmna veng leh an in panna hi chu a hriat deuh bik ṭhin an tih hi tak tak a nih hmel viau zel. Hman ni deuh khan kan chhungte damlo tlawh turin Durtlangah kan lêng chho a, kawng a chhe em em mai. Nikum pawh khan, Synod lai khan he kawng hi ka paltlang tawh a, a chhe em em tho. A enkawltute lam hian an ngaihven zui miah lo niin alang. Nikum aiin a lo chhe lehzual tawh a, a siam ṭhat nan sum tam zawk sen a ngai tawh ngei ang.

Kawng chhia hi chu a langsar hma si a, a enkawltute lam lah hian duh aiin a chhia hian an dah rei mah mah ṭhin bawk si a, mipui sawisel leh kawh hi an pawiti miah lo tihna a ni. Chuti a nih chuan mipui hi min ngai pawimawh tawk lo tihna pawh a ni thei ang. Kawng chhe hêlna lamah traffic a jam a, motor-in a tuar a, motor tui in a hek phah a, sorkar sum mai a hek a ni lo, mipui sum a hek a, hun a hek a ni.

State dangte nena khaikhin chuan Mi­zoram hian kawngpui kan nei tlem an ti ṭhin. Chu­tianga state dangte aia kawng kan neih tlem si a, kawng a chhiat tho bawk si chuan sorkar hian a hna a tlin lo hle tihna a ni. Hetiang sorkar hian mipuite kawngpui ṭha min pek theih loh chuan mipuite tan beisei tur dang a awm lo tihna a ni a, party mi leh sa invulh ringawt an duh tawk tihna a ni.

Thil tê thama kan ngaih thil ṭha lo hian thil ṭha lo nasa zawk a thlen thei. Kawngpuia a khawk pakhat lo awm hian nakinah a khawk lian zawk a siam ṭhin. A tira kan ngaih thah avangin kawng chhe tak tak kan neih phah a ni.

Kan kawngpui aṭanga thlir hi chuan sorkar hi han fakna tur te, 'sorkar chak tak' han tihna tur chhan a awm lo.

- Zoremthanga Pachuau