SEDP ah MNF an fakawm

Covid avanga Mizoramin harsatna a tawh vanglai pawha SEDP pawisa sem chhuak thei MNF sorkar hi sawiselna nasa tak karah pawh fakawm takin an par chhuak leh ṭhin chu a nih hi. Politics inchirh thehna nasa tak karah miin MNF hian SEDP pawisa an sem chhuak zo dawn lovin an sawi a, mipui pawh an rilru a thlep hman a, chutihlaiin a hun takah an rawn che leh chat a, MNF chuan tunah chuan SEDP a takin an sem ta hum hum a ni.

Thil intihre tak tak leh social media lama ṭawng char tak takte'n MNF sorkar tan pawisa an neih loh avangin SEDP sem chhuah ngaihna a awm tawh loh thute an han sawi pap pap a, keini ang âk zât hnih hnuai lam rawng lo lehnghal chuan kan han awih duak duak hman kha a ni a,

kan awih duak duak kha a dik lo tawp tih rawn lang chhuakin; Zoram dap chhuaka sem turin SEDP ball chu a lir ta mup mup a ni tih Zoram mipuiin kan hmu leh ta a ni.

Mizoram sorkar a han harsa tak tak kha chu sorkar hnathawkte pawh khan a hunah tak khan hlawh an la thei miah lo va, sorkar kha a tluchhe mai dawn emaw tiin mi thuziak hrang hrangah khan a lo lang hman a, a tak ramah chuan kan sorkar hotute hian pawisa hi an kawl ṭan a, mipuiin an mamawh huna sem chhuah turin SEDP atan an lo khawl ṭha khiau a, chu chu mipui rilṭam tan a pekin an pe chhuak ta chur chur mai le.

Kan Chief Minis-ter zahawm tak Pu Zoramthanga sawi angin miin an rin tawh loh hnuah Joker chu an han pawt fuh ta a, chutah chuan SEDP hi a lo tlar phei tuarh mai a, SEDP sem hian a hma lawka SEDP sem ring lotute kha a timangang hle a, kum thara inthlan lo awm turah pawh SEDP hian a kap fuh leh nual dawn a, a bikima sem hman a nih phei chuan MNF tan 2023-ah campaign a ngai dawnin a lang lo ve. Sum harsat kara SEDP sem thei MNF hi sawiselna awm ṭhin bawk mah se, fak loh theih loh an ni ṭhin a ni.

- Muantea