Chakma leh Political Party
Chakma leh MNF
Dt. 18th - 20th. November, 1997 Assembly Session-ah khan Pu Zoramthanga chuan Chakma District lo piannaah hian 100% a nih loh pawhin 80% chuan mawh kan phur, a ti a. ‘MNF underground-a awm te kha E.Pakistan, Bangladesh aṭanga Mizorama kan rawn luh dawnin Chakma area kaltlang dawn chuan kan kaltlang thei lo, min report rang lutuk. Chuvangin, kan kal hlei thei lo. Chhim chhak deuh aṭanga rawn hel a ngai a. Chu chiah chu hriain hetah hian ram i siam sak ang u, tiin keini MNF underground te hian min counter-na kha cent percent a nih loh pawhin 80% chu a nih ka ring’ tiin a sawi a.
‘Hnam Kalsiam’ tih Biakchhunga ziak phek 215-na, tlar chung berah chuan hetiang hian a inziak: ‘Mizoram chu state puitling kan lo ni a. Chief Minister Pu Laldenga MNF President a lo nih khan Chief Minister letter head-in Chakma duhsakna thu ni 12.7.1987 khan a thawn a. He thu hi ‘The Chakma’s Life Struggle’ by S.P. Talukdar lehkhabu phek hmasa berah a chuang. He lehkhabu phek 67-naah Chakma tualṭo party, Chakma Jaintia Parisad leh MNF Party te hi thawkho an nih thu a ziak bawk. Heng avangte hian an tan Chakma chunga hlei len hi a remchang lo em ni ang, tih theih a ni!’ a ti.
Tin, Proceeding of the Mizoram Legislative Assembly Reports dt. 2-5, Sept., 1986 kan en chuan Pu Laldenga’n (RIP) Chakma thlavang a hauhna thu kan hmu bawk.
Chakma leh Congress
Kum 1991 Congress sorkar chhung khan Mizoram sorkar chuan official-in CADC-ah Political & Cabinet Department kaltlangin lehkha an thehlut a. (No. J.15011/6/91/Pol. dt.8.7.’91) Chu lehkha subject-ah chuan- Memorandum to Prime Minister of India for Creation of UT for Chakma residing in Mizoram’ tih a ni a.
He lehkhaah hian Mizoram sorkar (Congress) chuan thil pathum Chakma-ten rawn tifel turin an ti a, chungte chu- 1) Chakma-te’n UT atana an demand area. (area of territory for which formation of UT demanded). chiang taka rawn tilang turin. 2) 1991 chhiarpui angin Chakma population. 3) Chakma area demand chhunga hnam hrang hrang awm zat. (break up of population community wise).
Hetianga Congress-in Chakma UT lo pian theihna tura hma a lak avang hian Rajya Sabha Committee on Pettition aṭanga lo irh chhuak, Mizoram aṭanga Chakma inlakhran tumna kha a inzawm chho zel pawh a ni mahna. Chakma UT lo piang tur duh lo hian kohhran, tlawmngai pawl hrang hrang leh political party-ten dt. 12. Nov., 1997-a kawngzawh ropui tak kan neih nghe nghe kha - kan la hre ṭheuh awm e.
Chakma leh MPC
Chakma District Council ṭhiah a nih theih nana an hmalakna langsar tak pakhat chu Prime Minister hnena Memorandum an thehluh kha a ni. He lehkha hi MNF chuan ngaimawhin dt. 11 June, 1982 khan na takin MPC chu lehkha an pe a. Chu lehkhaah chuan-
“A hnuaia thu hi ngun taka ngaihtuah a, Pathian leh kan ram tan a pawimawh a ni tih hre renga zawm nghal turin ka han hriattir a che.
I hriat angin tunah hian MNF aiawhte leh India sorkar chu inremna kawng zawngin hma an la mek a ni a; hemiah hian MNF ten an lallukhum rawn hawn ngei tur nia lang chu Chakma District Council ṭhiah (dissolved) leh Chakma lo lut tharte hnawhkir lehna hi a ni. Tunah hian heng thilte hi tihlawhtling ngei tur hian PC party chuan nasa takin hma in la tih kan hriatin leh India Prime Minister hnenah Memorandum hial in lo thehlut a ni tih kan hriat hian MNF te hamṭhatna tur chuhpuitu niah kan ngai che u a. Chuvangin, tun aṭang chuan hemi kawnga in hmalakna zawng zawng hi lo titawp nghal turin ka han hriattirin ka han ngen a ni e.” (He lehkhaah hian MNF aiawhin Aichhinga, President Emissary chuan hming a ziak a ni.)
Chakma leh ZNP
Tuna an dinnaah chuan ram dang mi (foreigner) leh leilung fate thliar fel an nih hma chuan he area-ah hian nationalist party an nihna angin unit pakhat pawh kan din dawn lo a ni, an ti a. Hei hi mi ṭhenkhatten chirhtheh nana hmangin ‘an la tlem vangin an ti mai mai a ni, hnam thil hi sawi sawi ve suh se’ ti tawk an awm bawk. Engpawhnise, Chakma la pawlhnut loh awm chhun party an nih avangin Chakma chung changah hi chuan engzawng pawhin zalen taka hma la thei awm chhun party an ni awm e.
- Rothuama Sailo