Tualchhung sorkar tihchak

Chhimbial Chhan­tuten Tualchhung sorkar, V/C-te tichak tura sorkar hmalakna an thlawp thu Vanglaini Chanchinbu, ni 13-7-2017 news item-ah an chhuah a, an tih tur awm tak a ni a, Zoram mipuite pawh hian thlawp vek ila a va ṭha awm em!

Dik tak chuan democracy innghah­na bulthum chu tual­chhung sorkar, V/C-te hi an ni hial asin. Ramin hma a sawnna tura a pawimawh hma­sa ber chu mimal leh chhungkua hi a ni a, chumi khaikhawmtu chu tualchhung sorkar, kan VC-te hi an ni.

Ram chhung, tualchhung tin te, ie. khaw tinten hma a sawn loh chuan ram hmasawnna chu a rualkhai thei lo. Chuvangin, khawtlang inrelbawlna sorkar hi a pawimawh hle.

Kan chunga rorel­tu tur V/C-te kan thlang ṭhin a, anni hi tual­chhungah chuan kawng eng kima kan rawn an ni. Khawtlang a chhiat a ṭhatah mawh an phur nasa a, heti chung hian state sorkar hian an kovah mawhphurhna a nghat tlem ta viau. In hmun lo ram pek theihna dan an neih pawh chhuhsak an ni. Khawtlang hnatlan nikhua a, thawk duh lo runna V/C-te kuta awm ṭhin pawh state sorkarin bituk chin siamin, Rs. 50/- an ti ta tlat mai!

Development grant, tun hma lama tualchhung sorkarten an hai chhuah leh sorkar aṭanga an dawn ang chi te pawh kha engmah dawn a awm tawh ngai lo. Tualchhung hma­sawn­na tur thil ṭul leh pawimawhte chu a hre chiang ber tur an ni a, chuti chung chuan engah mah an rawn ngai ta hek lo. An sum khawih ve chhun chu MGNREGA sum lokal, work agency an nih anga sorkar mi leh sate lo thawhpui hi a ni mai awm e.

Hetiang taka kan aiawh tur, beng sika kan ngaihtuah a, kum nga chhung atana kan thlan chhuah ni si, engmah ti thei lova awm hi chu an khawngaihthlak bakah a zahthlak a, an pamhmai bawk a lawm le!

Chuvangin, India ram hmun danga Panchayat system an kal pui anga ram chhung hmun dang pen ruala pen a, kan kal ve a hun hle tawh lo maw? Ngek an state legislative hian thu­neihna tam zawk nei reng se, an hnuaiah mei khupa awmin kan awm reng zawk dawn?

Tualchhung inrel­bawlna sum eng emaw zat hi chu anmahniin budget insiamin, state sorkar hian lo pawm pui ve ṭhin se, tichuan tualchhung hmasawnna chu thawk ve ṭhin se hma kan sawn deuh ang.

Central aṭanga development sum pawh direct a dawng ve thei tur hian Pancha­yat system a kal hi a fuh ber lo vang maw? Tuna kan kal anga kal zel hi zawngin thingtlang khua, V/C awp khuate hi kan chaurau telh telh mai zawng a nih hi.

Khawpui mi kan MLA-te mitmei veng vak lova kal a chak­awm tawh alawm maw le!

- Patrick Z, Chhingchhip