A sema sem hi
Mizorama kan political party neih len pahnih Congress leh MNF-te policy pui ber chu a sema sem a ni awm e. Sorkarna fawng vuantu Congress chuan policy lian berah NLUP an nei a, he policy hmang hian mipui hnenah cheng nuai 1 an sem a ni.
NLUP hnuaiah hian a trade azirin ṭum khata cheng nuai 1 sem nghal kher a ni lo a, trade tam zawkah chuan installment-a sem a ni. Eptu party lian berin tunlaia an tlangaupui nasat ber chu SEDP a ni awm e. He policy hnuaiah hian thil hrang hrang awm mah se, a policy laimu ber chu mipui hnenah pawisa sem tho ti ila kan sawi sual tam awm lo e.
NLUP hlawhtlin leh tlin loh hi tunlaia inhnialna tam ber pakhat a ni awm e. Tun hma zawnga auditor rintlak bera kan ngaih Comptroller Auditor General (CAG) of India chuan NLUP hi a hlawhchhamah a ngai a, ruahmanna siam a nih dan pawhin an kalpui lo niin a chhui chhuak a ni.
CAG report hi sorkar hotu lam chuan an helh hle a, kan ram hruaitu lu ber Chief Minister phei chuan 'CAG report hi Luka ziak ang bura rintlak a ni lo' tih te, 'CAG report-ah dik lo tam tak a awm' tihte a sawi chhuak hial a ni. Mahse, CAG report meuhin NLUP hi a hlawhchhama a ngaih chuan, an report-ah dik tawk lo pawh awm se, NLUP hi policy hlawhtling takah kei chuan ka pawm thei lo.
NLUP an thik nge ni; eptu party lian ber chu mipui hnena sum semna tur policy SEDP chu tunlai hian an tlangaupui nasa hle a, kalpui a la nih miau loh avangin NLUP aiin a ṭha dawn nge dawn loh hriatthiam theih a la ni lo. CAG meuhin sum semna policy NLUP hlawhchhama a ngaih hnua eptu party lian berin sum semna lam policy a rawn kalpui leh ta.
Kei chuan sum sem hmang hian kan ram hi khaichhuah theih a nih ka ring lo a, sum sem policy avanga ram ropui ni ta hi an awm pawhin ka ring lo. Chuvangin, kan rama sorkarna insiam chhawk ṭhin - Congress leh MNF-te hian mipui vote zawnna atan ringawt ni lo, ram dinchhuahna tur policy-te hi an ngaihtuah a hunin ka hria a ni.
Congress policy thar NEDP-ah hian ṭha tih deuh mai ka nei a, chu chu enterpreneurship lam an ngai pawimawh hi a ni. Hetiang deuh tho hi SEDP-ah pawh a awmin ka hria. Party pahnihte hian a sum sem lam aiin, hetiang ang policy ṭha atan hian sum sen tur tam zawk dah se kan ram hian hma a sawnpui zawk ngei ang.
A sema sem ringawt mai hi chuan mipuite rilru kan ti khaw loin, mipuite hi thatchhiatna ruamah min hnuk lut ang tih a hlauhawm a ni. Kan kuthnathawktute sum pek ngawt a, an thar chhuah hralhna tur ngaihtuahsak leh si lohte hi thil awmze nei lo tak a ni. Sum dawn ngawt ai chuan, a hralhna tur rate hre sain, kan kuthnathawktute hian hna han thawk se, kan ram hian a va hlawkpui dawn em.
Kan ram din chhuahna atan a sema sem policy chu CAG meuhin hlawhchhamah a ngai tawh a, chuvangin a sema sem lo deuh hi kan ram din chhuahna atan kan politician-te han ngaihtuah teh u.
- Lalchhandama