Kan hming phuah dan hi

Tun hma chuan Mizote hian awmze nei takin an fate hming an lo phuah ṭhin a. Entirnan, Vawmsuala, Keitawna, Vawmhrangi, Keikapa, Keihawla tih te chu a ngaihruat theih mai. Kaprumvunga han tih te hian Savawm emaw Sakei emaw tu berin emaw kapin a huk nasa tih a hriat theih mai a.

Sum lama hlawh­tlinna entirna ni maw, Sangkhuma, Sangliana, Sangkamlova, Rokam­lovi, Singthangi, Sang­khawli tih te a lo ni leh a, a kawh lam a rin hriat theih mai.

Kristianna a lo luh hnuah hian Vanram­lawma, Vanlalnghaka, Vanzairema, Vanlalpat-hianzarzokima, Vanin­mawia, Vanlaltanpuia, Lalmalsawma, Lal­khawngaihi, Lalrem­ruati, Lalremtluangi, Lalthanmawia, Lalthuthlungliana tih te kan uar leh ta.

Politics leh hnam boruak vang nge, Zo­siama, Zoremthanga, Zodinliana, Zodinsanga, Zohmangaiha, Zohma­hruaia, Zohmingthanga, Zochamliana, Zo­chhuana, Zoramthanga, Zonunmawia tih te chu kan hming sak duh dan a ni leh ta fur mai bawk. Heng hming phuah dan hi chu a dikin a Mizo thawkhat hle a, hnam pawi a khawih lo.

Tun hnai kum 20, 30 vel chhung erawh hi chuan Mizo hming hlang kan duh khawp ta lo nge, hnam dang hming ni awm telh kan ching ta hle mai. Roman ho hian Bible-a mi hming telh an ching a, sakhuana vangah ngaihsak pawh ni ila, chu pawh kan uar ta hrat. Roman ni lem lo pawhin Mizo hming pangngai duh tawk lovin Sap hming kan telh ṭalh zel ta mai.

Mithiamten India rama ṭawng riral chho zel tur zingah Mizo ṭawng an telh tlat mai. Hnam dang hming kan telh nasat danah hian ṭawng tihdalna chikhat a nih loh vek pawhin hnam nihna tihdalna chu a ni ngei ngei ang.

Hmanah Shillong Mizo Ṭhalfavang Kut-ah Best Girl an han puang a, Margaret Pari Lyngdoh a ni. Best Boy pawh Richard Harku Hmingliana Duncan a ni. Sap kan pawng ngaihsan vang nge, kan hmingah kan telh nasa ta hle mai. Roberta, Jimmya, Joela, Solomona, Angela, Priscilla, Cindy, Moses, Rebec etc. etc. adt.

Kum 40 zet kal ta aṭang khan sap hming hi kan lo uar zual ta a nih hmel a, khaw tinah hian chhiar ta ila, Mizo hming pangngai bak belh hi a percent a sang tawh viau ang. Kan uar telh telh niin a hriat nghe nghe a.

Kan hming phuah dan aṭang rengin kan Hnam nihna kan tidal zo takngial dawn. Kum 40 a vei leh meuh chuan Sap hming pu hi kan tam zawk tawh mai ang tih pawh a hlauhawm. Tuna pawiti lem lova, ngaihsam taka kan fate hming kan phuah mai mai hian kan hnam pawi a khawih hun a la thleng mai ang e.

Rambuai lai khan Senator Pu Malsawma Colney (Kawlni tih a dik zawk) khan ram hnuai khuaah fu huan a siam a, "I huana fu chu a va ṭha ve" an han ti dek dek a, ani lah chuan, "Tlangchhuaka huan tih ai chuan Malsawma huan tihah te chuan fu a ṭha zawk dawn tih a hriat reng alawm" a ti daih. A ni lah tak a, K.L.a han tih ngawt ai chuan Thangkanglova han tih te chuan a nghet charh mai a ni.

A enga pawh chu ni se,/ Mizo hming ziktluak pangngai duh khawp lova, hnam dang hming (ṭawng) kan phuah belh nasa ta lutuk te hi chu ngaihtuah chian a ngai ta khawp mai.

- Rualkhuma Hmar