Nuai 3 min tiamtuten khaw en laiin min bum duh dâwn em ni?
Kan nghahhlelh em em SEDP chu Mizoram sorkar chuan a sem dâwn ta a. Singapore lama min hruai tura kan beiseiten Silchar-ah min hruai se kan läwm dâwn loh tehlul nen tunah chuan Rs 3,00,000 min tiamtute khan Rs 25,000 chiah min sem an tum a, chu pawh chu bial khatah a dawng tur an thlang chhuak leh dâwn a ni.
SEDP hnuaia Rs 3,00,000 sem MNF hian mn tiam a ni. Chu pawh chu a la ni satliah lova, kan dil leh kan phût pawh ni lo kha a sem theih dan hriaa rawn insawiin kum 2018 inthlan campaign lai khan a zawrhin an rawn zuar a ni. Mipui chuan chu thil zawrh chu kan lo lei ta a, a man kan pe tawh a, kum 5 dan chiaha kan neih theih kan vote hlu tak mipuiin kan pe tawh a ni, SEDP atan hian a man pek a ni tawh a, a tak hi sorkar hunah pek min tiam a ni.
MNF chu an sorkar ta ngei a, mipui chuan kan tih tur kan ti zo vek tawh a, sorkarin a intiam angin Rs 3,00,000 min pe ve rawh se. Kum 2023 inthlan lo awm turah hian tuna Rs 25,000 inpek hmanga inpawh tán chi kan ni tawh lova, "Tlem hi sem ila, kan thlung bet tho tho ang," tih chu kan ni lo. Mipui hian kan hotute min tiam Rs 3,00,000 kha kan duh tawh a ni. Kum 2023 ah kan inthlang leh dâwn a, an intiam zat Rs 3,00,000 hi min pe thei dâwn em le?
Kan ram hruaitute hi mi tak tak an nih chuan min bum duh lovang. Mizoram meuh hruai thei tura inzuar, mipui pawhin kan thlan tlinte hian thil dang an tihlawhtling thei lo a nih pawhin mipuia a tiama min tiam Rs 3,00,000 hi chu min rawn pe tal se a va han duhawm em. Kan hotute hian min bum duh hi kan ring lova, Zoram mipui pawh min bum let tawp duh an lo nih chuan mipuiin kan ring leh tawh ngai dawn si lo.
Kan dil leh phût vang ni lova anmahni min sawi hmuh ngei Rs 3,00,000 hi kan beisei a, kum khat ṭha bâk hun an nei tawh si lo. Vawksa ei tur min tiama samṭawk min pe a nih chuan tumah kan läwm lovang a, chutiang mai ni lova Rs 3,00,000 min tiam tuten tunah Rs 25,000 an sawi ta mai hi a mak a ni.
Kan ram hruaitute hi han insang mar se, kan beisei zat ni lo anmahni min tiam zat pawisa SEDP hmanga Rs 3,00,000 min pek tur hi rawn chhung lut tawh rawh se. Tichuan 2023 ah kan vote leh ang - an chhun luh loh chuan Rs 3,00,000 dawng lo zawngin vote tur dang kan lo zawng ve tawh mai ang.
- Lalthangliana