Zangnadawmnaah bawk kan buai leh ṭhin hi...
Kumin kum tir lam khan Vairengte - Sairang inkar kawng zauh turah zangnadawmna vanga hna an la ṭan theih loh thu sawi a ni a. Zangnadawmna avang buaina hi kan tawk fo tawh a, thil zahthlak tak tak te pawh a lo awm fo tawh a, thil tithei leh thuneituten an chuh chak ṭhin hle tih pawh hriat a ni.
Ministry of Road Transport & Highways (MoRTH) hmalaknaa NH-06 leh NH-306 (Vairengte leh Sairang inkar) kawngpui zauh hna thawh turah pawh khan zangnadawmna tura pawisa pek ngai a tam lutuk avangin hna ṭan theih lohin a awm reng a. Hetih lai hian, zangnadawmna chungchang buaipui tura Mizoram sorkarin a ruat, competent authority for land acquisition (CALA), Kolasib Additional DC chuan he kawngin a tan tlang tur rama awm thlai man chu a to lo thei lo niin a sawi ve thung.
Kawng siamtu NHIDCL chuan, Vairengte-Chhimluang inkara zangnadawmna pek ngai zat tura CALA-in a thehluh chu a tam lutuk avangin an pawm thei lo tih an sawi a. CS leh Kolasib DC hnenah zangnadawmna zat tur hi chhût ṭha leh turin an thawn hial niin an sawi.
Kawng siam tur hian tih fel ngai tam tak a awm ṭhin a, zangnadawmna a fel loh chuan hna ṭan theih a ni lo a, hei hian hmasawnna hna kal mek vawi tam tak a lo tiṭhuanawp tawh. CALA-in Vairengte - Chhimluang inkar kawng zauhna atana zangnadawmna pek tur zat a thehluh leh NHIDCL-in an lo ruahman lawk chu cheng vaibelchhe 70 zetin a inthlau a ni.
He hna hi ṭan aṭanga kum hnih chhunga zawh hman tura tih a ni a, hna zawh a nih hun chuan Aizawl leh Silchar inkar chu darkar thum vel lek chhunga thlen theih a ni dawn a, hmasawnna ropui tak a ni ang.
He kawng hi mamawh kan chawk luhna pawimawh ber a ni hial a, hetiang a nih laia zangnadawmna buai bawkin hna a ti ṭhuanawp leh ta hi a pawi hle a ni.
Tuna zangnadawmna an phut hi a awm em a awm lo em tih lam hi ka sawi tum a ni lo. Sorkar hian he thila kan buai fo tawh dan leh, kum tam tak kal tawh aṭanga Mizoram hmasawnna hna lian tak daltu a la ni reng mai lai ka ngaimawh a. Vawiin thlenga kan sorkar ve riang ruangin hetianga thila kan buaina a la ching fel thei miah lo lai hi ka ngaimawh a. Sorkara thil ti theite inrawlh thuk lutuk ṭhin vang te pawh a ni fo a, zangnadawmna beisei vanga hna ṭan dawn hnaiah ram lei leh hralh hi khap se buaina tam tak chu kan pumpelh thei ngei ang.
- Lal Pekhlua