Zu leh politics bawk

Tunlaia kan sawi peih pawh loh kan rilru kaptu lian tak ni si chu zu bawk hi a la ni. Mizoramin hripui kan do lai pawha min tibuaitu lian ber chu zu leh ruihtheihthil a ni a, kan ramri duty te pawhin a vena ven ngai khawpin ruihhlo lak tum kan ṭhalaiten state ramri kan an tum tihte, zu lak tum an tamzia te pawh media lamah kan lo hmu ve.

Ka rawn sawi tum chu Mizorama zu khap dan lem lutuka kan kalpui lam daih zawk hi a ni. 

Zu in ngai lo mi pawh ni ila tuna zu khap dan hi chu ka thlawp thei tlat lo. Tuna kan zu khap dan hi chu zu kan titlem loin zu kan tito a, zu kan tihlu bawk a, zu hi kan ṭhangtharte hi chuan an la rawn ngaisang zel dawn a ni. Kan ngaihsan loh em em leh kan hmuhsit zawk ṭhin kan Assam unau, kan kawm thlang maia mite pawhin an kal pelh mai mai an zu dawr (wine shop) te chu Mizo tlangvalte (nulate pawh an ni) chuan an ngaisang a. Chuta zu an zawrh mai mai nei theitu nih chu Aizawl khawpui veng changkang inti chinah pawh 'intih­theihna tham' zuk tlinga mawle! 

"Zu hi zuar leh ila, zu dawr hi awm leh rawh se," tih hi sawi ka tum pawh a ni chiang lova, mahse dan anga zu zawrh titawp thei a, dan lova zu zawrh titawp thei lo hi kan dem tur a ni. Dan anga zu kan zawrh lai khan (A 

ṭha lo chung chungin) sorkarah chhiah tam tak zu kal tlangin a lut a nih kha. Dan anga zu zawrh tihtawp a nih hnu hian zu hi tawp zui se kan sawi kan sawi lovang, mahse dan lova zu zawrh a tam em em si hi kan phun kan phun a ni.

Dan bawhchhiaa zu zuar an lian tual tual a, dan lova zu zuar lui tlatte chu kan zu in mi (ṭhalai leh a ṭhen chu pavalai) te hian an dawr lo thei lova, dan lova zu zuarte hmaah kan unau/ fate/ pate an han kûn a, zu chhe em em mai an lo pe a, man to uchuaik takin an lei a ngai tho si a. Sorkara chhiah pek chu sawi loh sorkar phal loh zuar an ni bawk a nia, zu zuarte hi. A khawilaiah hian nge zu hi kan huat tak tak? Vote hmuhna hmanrua atan chauh em ni kan huat? 

Kan politician, officer, party hruaitu zingah pawh khap chunga zu nghei chu sawi loh a tui tui in thei an tam si, zu hi kan khap bet tak tak duh lo nge politics khelhna atan kan duh mai mai zawk ni?