MNF hawi lam chu a chiang ta e

Tun hnaiah India ramin president a thlang a, chutah chuan MLA leh MP zawng zawngin vote an thlak thei. President vote turah khan India ram chu hmun hnihah a inṭhen hrang phawk a pakhat chu BJP leh a thurualpuite an ni a, an tling ta nghe nghe a, pakhat zawk chu eptu lam intelkhawm Congress leh party hrang hrang telna a ni. MNF chuan an hawi lam an tichiang tawh a, BJP candidate an vote ta a ni.

Politics-ah chuan thil hrang hrang sawi ṭhin ni mah se, a tawpa kan hawi lam tihchianna ber chu ‘tunge kan vote?’ tih hi a ni mai a, a bak hi chu tehna dang a tling lo. Insawi chhiat, in-er, kawngzawh, lungawi lohna lantir etc hi a tawpa a khaikhawmna chu vote tho hi a ni. MNF MLA-te chuan an hawi lam an tichiang tawh a, BJP presidential candidate an vote ta.

Insawifiah leh insawimawi theih a ni tawh lova, MNF chu BJP hnuaiah an kun tawh tih a chiang a, hei hi chu BJP kaihhruaina hnuaia North East Democratic Alliance (NEDA) an din khan a chiang daih tawh. MNF hian BJP hi a mawiah sawiselin Hindu sakhaw vuantute kal dan, bawng talh khap leh uchuak taka an thil tihte hi sawisel angin lang mah se, an nihna hlu ber politics thilah chuan an vote chu BJP tan an hlan fel tawh.

Kum 2018 Mizoram inthlan­ah pawh MNF leh BJP sumin an din ka ring a, MNF leh BJP hian seat an insem ka ring a, Congress paihthlak tumin BJP pawisa hmangin an bei ang. Congress pawh hi an hlauthawng ru viau ang, India President inthlannaah MNF chuan BJP lam an hawi ta a ni.

- Lalremruata