Martar ruhro leh vote bank policy
Tunlai political party-te thu inchuh ti mai ila martar ruhro party pakhat MNF in vote zawn nana hman ṭangkai tuma puhmawhna chungchangah khatih laia thil awmzia chiang zawka tuihnih leh ṭha in ka hria.
Kan hriat angin Mizoram buai chu kum 20 chuang deuh (1st March, 1966 - 30th June, 1986) a awh a. Mizoram buai avanga in leh lo, (eizawnna) bungrua, pawisa chan tamzia leh an chan zat chhutchhuah sen a ni lo. Mihring nunna hlu tak chan a nih dan erawh report hriat theih chinah India sipai kuta thi mi 880 vel, MNF in mahni Mizo puite an thah mi 630 vel leh CRPF, etc kut tuara thi mi zahnih tling lo deuh nia sawi a ni.
Heng bakah hian sawisak tawk hriat zui hauh loh a hnua thi ta te, tam leh eichhiat avanga thi te, etc an tam hle ang tih a rin theih. Heti hi a nih avangin martar thlanmual Sesawng-ah leh Luangmuala siam a ni pawh hi a mak lo a ni. Amaherawhchu, MNF-in martar thlanmuala an dah tawh mi 1563 leh tuna an dah belh mi 12 te nen mi 1575 te hi an tam hle mai a, chuti a nih chuan E. Pakistan (Bangladesh) a an awm laia thi hrim hrim te leh hmundanga mi te pawh an sengkhawm ni turah a ngaih theih a ni. Heng zingah hian India sipai leh police te nena inkahnaa thi te chu martar bik hliah hliaha ngaih nachin pawh a awm ngeiin a rinawm.
Pu Zoramthanga Ex-CM in 30th June, 1992-a Vanapa Hall-a a thusawiah kum 5 vel bak independence an sual lo tih a hriat theih a, kum 1971-86 chhung ṭhangkhat lian zet chu India biakrem tumin hun an hmang a, kum 1976 1st July-ah SIB office Balliganj Kolkata-ah Pu Denga leh S.L Khurana, India Home Secretary te khan ‘Mizoram chu India ram bungkhat a ni; tiin a lo ziak daih tawh a ni. Heng an pute rilru hre pha lo khang hun hnu lama inkahnaa thite pawh engemaw zat an awmin a rinawm a, anmahni lamah chuan martar an nih lohna tur awmin a lang lo a ni.
India sipaite meuh pawhin an hmu neu lo tih hriat theihna chu Mizoram peace-accord 30th June, 1986 zawha MNF-te Aizawl Sipai Lammuala lawm luh an nih khan martar ruhro zawn luhpui an tum khan an remti hauh lo mai a, "Hengho hi chu in-surendered an ni ve lo," an ti a ni. Khang mite khan an vawiin hun kha kan naktuk atan an lo hlan tawh reng a ni. Khang thih huama independence beia nunna chan tate khan India hnuaia inthlanna tura politic khelh nan an ruhrote hman an phal ang em, tih ngaihtuah ila an chhanna tur pawh kan hre nghal mai awm e. Ram hmasawnna hnuk ngaihtuah loa lalna leh thuneihna leh sum kan duh luat tukah politic tuina siam chawp hmanga mipui hrairuih tum hi sim a ṭha khawp mai. Tunlai ṭhangtharte an fing ta a, tuifinriat ang maia engkim an dawl zo ta mai pawh hi kan hnam vanneihna tur zel niin a hriat a ni.
- Hrangchina, Champhai