Tlak hlau rorel

Nakkum kum tawp lamah MLA inthlan pui kan hmachhawn leh dawn. Pawl hrang hrang, khua leh veng ṭhenkhat ten political party laka panchan theihna hun nia ngaiin thawm an nei leh ta chuah chuah mai. Kumin aiin nakkum kumtir lamah pawh a zual ngei dawn niin a lang.

MNF sorkar term hnihna a zawh dawn khan Saitual, Khawzawl leh Hnahthial te chu district capital atan an puang rup mai a, a hun lai kha chuan khaw mipuite an lawm teh e. Mahse, Zoramthanga sorkar khan a ti fuh chuang hlei law, Zoram pumah chiang zetin a sorkar chu paihthlak a ni ta tho a; heng khaw pathumte hian tun thlengin an duh leh beisei chu an hmu ta chuang hlei lo bawk a.

Kum 2013 MLA election neih dawn khan party lian pahnih Congress leh MNF te hian campaign auhla atan 'District thar tih puitlin' bawk an au pui leh. Kum li chuang a liam hnuah pawh an thu sawi chu a taka chantir a la ni ta chuang lo a, sum leh paia sorkar pachhiatzia ngaihtuah chuan a taka chantir theih tur chi ni pawhin a lang rih lo.

Tun hnaiah pawh khaw ṭhenkhat chuan district headquarters-a min puanna hi a takah chantir tawh rawh u tiin chak takin hma an la leh ta mek. Sorkar tan an intiamna tih hlawhtlin chu an bat a ni a, khaw neitu lam hi dem ngawt theih an ni bik lo mai thei. Sorkar tan khaw pakhat pek ngawt a ngam awm dawn lo a, khaw dangin an duh ve leh zel tur thil a nih avangin rorel thiam a ngai khawp ang.

Mizoram khaw lian ve deuh, dristrci nei thei tur china inngai a piang deuhthaw maiin district an awt em em hi enge a chhan ni ta ang. A chhan nia lang ṭhenkhat chu, hna ṭau a ṭet ang a, sorkar hna a tam ang; thil pakhat lek buaipui tur pawhin Aizawl pan kher loin mahi khua ngeia tih ve theih a ni dawn vang te, district pakhata mipui tam fal bik lutuk avanga hmasawnna rualkhai lo chu daihzai zawka sem rual a nih theih an beisei vangte ni berin a lang.

Mizoramah hian hmasawnna tura sum lo kal hi a hmanna tur dik taka hman nise, thingtlang leh khaw te zawkte hian an chanvo an hmuh tur ang hi hmu vek ta bawk se; inkalpawhna kawngpui ṭha, damdawi in, zirna school leh tuilak nei ṭha se, khawpui chhunga an thlai thar zawrhna tur hmun siamsak an nih bakah an thar chhuah sa hi ṭha taka lei sak ni bawk se - district an awm dawn chuang em ni? Kan chanvo dawn tur ang kan dawn loh vanga thil dang ngiat lek hi kan ang ṭhin.

Nakkumah kan in­thlang leh dawn, mipui lam hian kan party-te hi an tih theih loh tur intiam tura nawr fo hi an siam a hun tawh. Min tiam ṭhin ang an ti hlawhtling thei ngai chuang lo tih hriain nakkina kan buaina tur thu lo sawipui vak hi tih tlem a ṭha hle.

Thu neitu lam pawhin mipui lung­awina tur a nih vang ngawta kan tih theih loh tur thil tiam hi sim ila, mawhphurhna kan insiam belh lo zawk ngei ang. Inthlana thlak hlauh luat avanga nakin hun ngaihtuah lo leka rorel hi sim ila, Mizoram tana ṭha tur a nih phawt chuan a tirah mipui lamin dawngsawng thiam lo deuh mah se khua reiah fak an la hlawh zawk ngei ang.

- Vohbika pa