Ruihhlo hi Sorkar do tur nge YMA do tur?

YMA Central Executive Committee (CEC) ṭhu­khawm chuan, Central YMA hnuaia ruihhlo dotu bik din thar leh an rél a. Kum 2018 vel daih tawh khan Mizoramah ruihhlo a hluar em avangin SRS din a lo ni tawh a. SRS chuan ruihhlo a han do ta a, an dai pelh ve rem rum a, dan bawhchhetute nena dinhmun inang deuh thawa an awm chang te pawh a awm hial a nih kha.

SRS in hun eng emaw chen ruihhlo a do hnuah SRS tihtawp hun a lo thleng a, mahse Mizoram dinhmun en khan ruihhlo do hna sorkar kutah dah kha YMA in sorkar a rin zawh loh avangin SRS ruihhlo do hun chu a pawt sei hial a ni.

Tunah ruihhlo hluar vang bawkin Mizoramah YMA in ruihhlo do beihpui thlak leh a tum a, heti taka sorkar mi leh saten ruihhlo an do hneh lo hi sorkar tan chuam mualphona lian tak a va ni em.

Chhun en laia ruihhlo inpe chhawng ngam khawpin ruih­hlo a zalen leh a, ruihhlo zuarte pawh hlauh nei lo ang maiin an khawsa leh ta tlat a ni. Central YMA-in a vawikhatna atan SRS dinin beihpui a thlak vak tawh a. SRS chet dan hi mipui lam aṭanga duh lohna a awm hman hial a, an beihte an len ve em avangin a beitu lam pawh an ṭang nâ viau a nih kha.

SRS sawiselna remchang awm thei turin chet sual chang an nei ve bawk. Mahse YMA in ruihhlo do a kalpui khan Mizoramah ruihhlo nasa takin a tlahniam ta a nih a ni.

Tun hnai khan Home minister Lalchamliana chuan, Central YMA-te'n Supply Reduction Service (SRS) dina ruihhlo do beihpui an thlâk kha a hlâwk hle thu leh, CYMA leh SRS-in ruihhlo an do dan ang kha tunah hian Mizoramin a mamawh leh ta nia a hriat thu a sawi chhuak hial a. Mahse hlawh pawh nei loa tlawmngai pawl pawhin khati taka ṭangkaia ruihhlo a do thei a nih chuan hlawh tam tak nei zawk kan police force te hian eng vangin nge an tih ve theih loh tih hi ka zawhna lian ber chu a ni e.

Hlawh pawh nei loa hnathawk an nih avangin YMA-te'n ruihhlo do hna hi an thawk reng thei dawn lo a, sorkar hi YMA kuta a innghat leh a nih ngat chuan Mizoram chu ruihhlo bawkin min tichhe leh dawn tih a chiang reng mai.

Tun hnaia CYMA lamin SRS chhun­zawm zel tura an rel hi thil lawmawm tak a ni. Chutih rualin ruihhlo do hna hi sorkar hian YMA koah ringawt nghat tawh loin ama tha chakna hmangin awmze neiin ruihhlo do ve theih tum tawh rawh se.

- Lal Remtluangi