Positive Vibes!!!

A thupui chu a sâp deuh viau mai! Issue lian tham a awm laia thu leh hla lo neih ve hram tum ziah hi a ṭul viau lo nain, tukin zing chu mi hlim ṭawng takin, 'Min nawrtu a na em a,' ti ve deuh tlat teh ang! 

Ka zing tho hlim news kan en thuak thuak, DIPR lamin nitina Covid-19 sample test result an update-ah test zawng zawng an negative tih kan hmu, ka hmuh ruala ka rilrua thu lo awm chu tawi tê - 'Lalpa kan lawm e, ' tih tê mai hi a ni. Lâwmna tur hi kan va ngah ṭhin tak! Boruak thianghlim a thlawna hip tur man chawi ngai miah loin, Pathianin a free-in duh ang thala hip tur min pe! A thlawna boruak ṭha kan dawn zawng zawng hi keimahni sum leh paia kan rulh sen ngai loh tur a ni. Kan Covid-19 positive neih tam zawkte pawh symptoms nei lo tih a ni deuh zel, kai thar kan hmuh zingah ṭhalai kan tam zawk zel bawk. He hri hi kan hneh tlan ngei hi ka ring tlat a ni - Lal Isua hmachhuanin, fimkhur tel chung siin. 

He hri hi hlauh tur nge hlauh loh tur? Hlauh tur chu a ni teh meuh mai! Mahse ṭhenkhat hi chu kan hlauh dan leh kan chiai dan hi awmzia a nei lo hian ka hre deuh ṭhin. Lockdown an nawn lehna hlimchhâwn, hri kai an pun belh deuh a, test results leh a news ngai hlir mai, kan hriat leh kan hriat hnu kan inhrilh tawn mawlh mawlh a, kan WhatsApp status-ah nen kan awmna group-ah post hmasak loh hlauin hri kai thar zat phur takin kan in-post-siak sup sup a! Pu Vana belh sual thlengin kan suan kual tam narawh!

 Pawna chhuah lam kan insum chuang si lo! Loh theih loh thil avanga chhuakte pawhin social distancing kan hmang ṭha hlei thei lo. Ka ngamtlak ṭhiante bulah phei chuan, "A virus ai mahin  breaking news post tlai bîk nih hi kan hlâu ta ber zawk ni hian ka hre ṭhin," ka ti hial a ni. 

Covid-19 hi hlauh tur a nih rual hian WhatsApp Virus hlauhawm tak (Copy paste virus) hi kan buaina chu a ni tel chiang a ni. Ṭhenkhat chu chiai dan awmze nei lo hian kan chiai ve deuh bawk a, he hri buaia kan buai lai hian he lam zawnga kan buai dan zawngte hi kan ngaihtuah ve tho em? Lockdown chhungin kan ṭhalai la naupang tak tak eng zat nge thi tawh? Stroke, accident etc. an lainatawm tak zet. Hri chungchang news tharlâm lam ngaihvena buai phili reng lo hian ṭhalaite hian activity eng emaw tal i nei ang u. Lehkhabu chhiar a ṭha, kan peih vek kher lo a nih pawhin thil dang hrang hrang - taksa sâwi zawi, games eng emaw neih theih a ṭha khawp mai. Zai lam i tui a nih chuan zai chiam hunlai tak a ni ang, drawing leh painting lam tui mi tan pawh... Chutiang zelin sawi tur a tam ang. Pawn chhuak thei loin kan inkhung a, ṭhenkhat eizawnna tâwp bawk nen, kan rilru tâwt up up te, kan stress-te tiziaawm turin eng emaw thiltih (activity) i nei hram ang u.

Covid-19 virus hi a damdawite pawh an hmu chhuak chho zel turah ngai ila, a êng zawngin thil i thlir ṭhin ang u khai. He hri hi khawvel pumin kan buaipui chu a ni ngei mai, ram changkang leh ram ropuite pawhin an ngam loh hri a ni tlat,  pawngpaw basa ngam chi erawh a ni lo. Nimahsela, a hri veite ṭhenkhatin kan thinhrik deuh leh natna hlauhawm lutuk thihpui ngei ngei tur vei ang maia kan en erawh hi chu ka rilru a na deuh! Covid-19 chanchinthar hrang hrang hi kan ngaihven peih hlawm bawk a, India ramah hri vei kan tam ang aiin hri avanga thite hi a percentage anga lak phei chuan an tam viau lo ka ti ve tlat - he lamte hi ngaihven tel bawk ila, copy paste kual rau rau chuan a chanchin lawmawm lamte pawh hi hrut tel ṭhin ila.

Ṭhenkhatin hri kaite kan hlauh dan hi chu natna hrik dam leh mai mai thei lo, thihpui ngei ngei tur natna ṭihbaiawm tak vei ang hian kan en emaw tih mai tur a ni! Kan unau hri veite pawh an dam leh vek ang, Pathian zarah he hri hi kan hneh ngei ang! Kan Covid-19 positive mekte kan hmuh dan leh kan dawnsawn dan hi i thlak hram ang u hmiang. 

Fimkhur takin awm ila, kan thiamsa kut sil uar chhunzawm ila, hand sanitizer hmang zel ila, face mask vuah chhunzawm zel ila, ṭun ang hri lêng avanga kan inkhung ṭhup lai hian taksa hrisel piah lamah rilru hrisel hi a pawimawh aw...