BIHAR POLITICS

Bihar politics chu a vir chak ngei mai. Nilaini khan Chief Minister, Nitish Kumar-a chu a bang thut a, darkar 12 zet chauh a liam hnuah, Ningani chawhma dar 10-ah khan amah vek chu CM atan lak luh leh a ni a, a thawhpuite erawh chu an dang ta daih a ni. Bihar sorkar bang ta hi kum 2015 Assembly inthlana Janata Dal (United), Rashtriya Janata Dal (RJD) leh Congress ṭangrual siam a ni a, RJD-in MLA 80, JD(U)-in 71 an nei a, a nei tlem zawk, JD(U) hotupa, Nitish Kumar-a chu CM a ni a, RJD hruaitu, Laloo Prasad Yadav-a fapa, Tejashwi Yadav (28) chu Dy. CM a ni. Tun thla tir lamah khan, Yadav chhungkua hi eirukna thila inhnamhnawiha puh an ni a, CBI mite pawhin an in an dap nual hnuah, Tejashwi Yadav-a hi thubuai an siamsak a, hei hi tuna sorkar inthlaktirtu hi a ni ta a ni.

Nitish Kumar-a hian hei hi a ngai thutak hle a, sawifiah turin Tejashwi-a hi a duh a, a sawifiah theih loh phei chuan bang mai se a duh niin a lang. Mahse, a pa, Lalu-a chuan a fapa hi a chhan ve tlat a, Nilaini phei kha chuan Pu Nitish Kumar-a hi amah, Lalu-a vang chauha CM ni thei a nih thute a sawi ta. Lalu-a thusawi hi kawng hniha hrilhfiah theih a ni a, 'Ka fapa chungah hian engmah ti ngam tur i ni lo. CM-a dahtu che ka nih hi' a tihna a ni thei a, 'CM-a ka dah, Nitish-a nen hian intichhe mai tur kan ni lo, kan inphatsan lo ang' a tihna a ni thei bawk a, politics thlirtute chuan a hmasa zawk hi niin an ngai a, Lalu-a hian Nitish-a hi kutzungchal a hmuhah an ngai deuh a ni.

Lalu-a'n he thu a sawi hnu lawkah hian Nitish-a chuan state Larsap, Keshri Nath Tripathi-a hmuin, a banna a thehlut ta thut mai a, hemi hma hian BJP nen hian an inbe ru diam tawh a ang viau. Zanlaiah Nitish-a hian CM inah BJP MLA-te zanriah a buatsaihsak hman tlat a ni. Larsap pawh chuan JD(U) leh BJP thawk dun chu sorkar siam theiah ngaiin, Ningani tlai dar 5 kha sorkar lak luh hun atan a ruat a, mahse RJD lam hi an ṭhu mai mai bik lova, tih dan phung deuhah MLA ngah ber party hruaitu hi sorkar thar siam tura sawm an nih ṭhin avangin, Larsap hian sorkar lak luh hun hi chawhma dar 10-ah a sawn hma leh ta nia sawi a awm bawk. Tun hi Bihar CM atana Nitish-a lak luh a nih vawi 6-na a ni.

Nitish-a hian tun hma khan kum 17 chhung lai, BJP hi a thawhpui tawh a, kum 2013 khan PM candidate atan BJP-in Narendra Modi-a thlan avangin an thawh dunna chu chhu chatin, Congress leh RJD hi a thawhpui a, mahse thla hmasa khan, President thlannaah NDA candidate, Pu Ram Nath Kovind-a chu a thlawp leh daih a, tuna BJP a thawhpui leh hnuah hian Vice President atan eptu lam, Gopal Krishna Gandhi a thlawp tur thu a sawi leh lawi bawk.

Bihar sorkar thar dinhmun tur hi sawi a har hle tho a, state Assembly-a seat 243-ah sorkar siam tur chuan MLA 122 tal neih a ngai a, BJP 53, JDU 71, an vaiin 124 chauh an ni a, NDA MLA te zanriah a kilpuina-ah erawh kha chuan MLA 132 neiin a insawi. RJD-in rei tak, Bihar-a ro an rel chhung khan an sawp chhe hman fe a, Nitish-a hian he state hi nasa takin a tihmasawna ngaih a ni a, mahse BJP thawhpui, kalsan leh, thawhpui leh thut... tih ang vel hi chu engtinnge in ngaih le?

- RK Lianzuala