MNF HAWI LAM

Vanglaini ni 27.7.2017 chhuaka Lalremruata thuziak kha han thual ve hret ka duh a. India President thlannaah BJP leh a thawhpui candidate leh Cong­ress candidate an awm a. MNF-in a hrana candidate an neih loh avangin engtikawng mahin Congress candidate kha vote tur an ni lo.

Mi ṭhenkhatin Congress rilru pu ru tlat chungin eng­emaw hlekah MNF leh BJP sawi fin a, Mizo Kristian zinga MNF sawihnawm an tum reng a, hei hi game ningnel tak a ni.

Nikum lama AMC leh MLA bye-election ah khan ZNP chuan official-in BJP an thawhpui a, chu chu ngaimawh si lovin MNF sorkar tur anga lo lang ta hi tih ṭhuanawp tumin thil ni lo pui an kaihhnawihtir ṭhin a. BJP nena sawi pawlha tih leihnawng an tum a ni ber a.

India President thlannaa MNF MLA ten Congress ni lo an vote kha an tih tur dik tak a ni. BJP nena MLA ah pawh thawkho tur anga sawi luih ṭalh phahna chi a ni lo. Kawng lehlamah chuan MNF hi 2018 ah a sorkar kan ring tihna te pawh a kawk a, official-a BJP party anga thawhpui thlaptu ZNP ngaimawh lova, MNF eng emaw ti tala sawi hnawm tum ṭalh hi a hralh a tla vak lovang.

Kum 2018 ah chuan central-a BJP chuan Mizoram Congress paih ngei ngei an rawn tum dawn a, in rin aiin an che na ang. An Party BJP hmanga an paih zo dawn lova a lan chuan a paih theihna tur chu an dap ngei ngei ang. Chu chu Mizo mipui Congress ning hrim hrim tawh chuan pawi an ti hauh lovang.

MKHC-ah Pres­byterian a lian ber a, a tel ve UPC etc. te hi an Synod ta e tihna a ni lo ang hi MNF-in NEDA-a a tel ve dan a nih pawh hrethiam renga kaih lek tum ṭalh ho thu veivir dan hi a ṭhing tawh.

MNF chuan a malin kan ding dawn tih an la dinpui a. An la rel tha lo. Chutih laia BJP nena thawhho tum anga lo beih lo beih hi thu chuangtlai mai a ni. Inthlan puan hunah thawhpui an neih leh neih loh tur chu a chiang mai ang. Buana hmaa lo kherh hi chuan MNF sorkar an rinzia an puang nawn fo a ni ber zawk.

Hawi lam thuah chuan Congress sorkarin corruption lam a hawi nasa lutuk hi a ngaimawh awm fe zawk.

- R. Lalthlamuana, Tuithiang