Chakma

Autonomous Dis­trict Council hi Constitution 6th Schedule-ah dah an ni a, Parliament Act siam hmang chauha siam theih a nih laiin, CADC hi Parliament Act siam (North East Re-organisation Act, 1972) in a huam tel miah loh, kha tih laia official-ten an lo telh belh ve mai a nih thu hi chiang deuhin kum 1998 khan CYMA-in ‘Ram leh Hnam Humhalh Kum’ an puan khan, an agenda tura ka rawn ziah (Ram leh hnam humhalh agenda) ah khan ka thai lang a. Hei hi court-ah challenge theih a ni ang tih te pawh ka ziak a, tuman a takin an lo bawhzui lem lo.

6th Schedule a dah ngat tawh hi chu, indigenous people nihna keng tel a ni tlat. Hei hi court thu tlukna tur pawh a ni ang. Mahse CADC lo pian dan hi, Parliament hriatpui leh authorised a nih loh avangin, dan kalh a ni a, hei hi kan challenge hmasak hi a kawng hmang dik zawk tur chu. Indian Constitution publication hrang hrangah pawh, hemi CADC hi 6th Schedule-ah an dah zel tawh a, order/ notification a awm miau avangin. Mahse chu order/ notification chu eng act hmanga siam nge a nih a, chu act-ah chuan CADC hi siam tur thu a awm em tih chu tuman an luh chilh tawh si lo. Kei hi a hmu chhuak hmasa bertu ka ni mai awm e. Chu pawh chu CADC pian hnu kum 25 velah! Chu pawh chu tuman court lamah put luh an tum si lo. Kawt thlera protest a in nawr ringawt hi chu a kawng ber a ni lovang.

Chakma te hi Mizoram chhunga Autonomous District Council nei an nih takah chuan, tuna taka MBBS & Technical Course a Mizoram quota a categoty I a telh loh theih dan a awm tawh loin a lang. Indigeneous inhabitant status an nei tlat tawh, CADC an neih miau avangin. CADC hi erawh chu Parliament Act-in a huam tel hauh loh, official hovin an lo baksis ve mai kha a nih dan chiang takin ka ziah kha! Unless & untill we undo the CADC, we have now no right to say that they are not indigenous inhabit of Mizoram. CYMA in a bu a an chhuah (1998) a 'Ram leh Hnam Humhalh Agenda' tih ka article-ah khan an dil anga UT pek mai pawh hi, GOI-in an duh phawt chuan, kan tan a him tawh zawk tih thlengin ka ziah reng kha!

Chakma hi Mizo rama Mi­zote ai daihin an tam a, refugee dinhmun deuh chauh hmun dangah an chang si a, CADC saw a hleta hmangin an rawn lut belh zel ang a, vote bank politics avang hian kan dang tak tak thei dawn lo va, min la chim buai viau thei tlat! Keini aiin an taima in an tum a ruh dawn si a, technical education seat mai ni lo, government job pawh min la chhuhsak zel ang. Thliar hran bik emaw, dan theihna kan nei tawh lo!

Tin, ka sawi ang khan tuna an CADC huam chhungah sawn Mizo ten engmah ta kan nei tawh chuang lo. Rest House pakhat sak tak ngial pawh min tibuai thei a nih kha. A hming maia Mizoram, min rawn chimbuai reng ṭhintu turte an nih saw. CYMA lehkhabu-ah pawh heng hi ka sawi tel kha.

- Lalthara, Kohima