BJP an vote ta ruau mai sia!

MNF hian eng lam nge an hawi? tih zawhna hi ka thinlungah a chianna rei viau tawh hle mah se a taka a lan chhuah hma chu nemnghehna a awm theiin ka hre lova.

Khatia hman ni lawka India Pre­sident inthlanaa Uttar Pradesh lam mi BJP candidate Ram Nath Kovind vote tura MNF party-in thutlukna an siam khan a nemnghet ta a ni.

Congress Party candidate Meira Kumar aia an thlan chhan kha Congress candidate an vote pui theih loh vang a nih chuan an duh phawt chuan India president inthlan­naah khan an hai thei a; nimahsela BJP candidate a chak ngei theihna turin thutlukna an siam ta a ni.

Congress sorkarin Kohhran pawi an sawi tawh a, Koh­hranin zu zawrh a duh lo chungin zu an zuar lui tawh a ni. An zu zawrh sawi mawi an tum luatah ṭawngkam mawi lo tak pawh an chhak chhuak hreh lo a, kohhran tana ngaihthlak hrehawm tur thute pawh an MLA rualin an sawi chhuak zui hial a, Kohhran mipui tam takin Congress ngaihdan tawk an thiam ta.

Sum an duh luat avangin kristian ramah hian zu zawrh pawh an hreh tawh lo a, kohhranin ngen lawm lawm mah se an sum hmuhna tur a nih miau avangin zu hi an zuar lui ta tho a ni.

BJP hi Hindu sakhaw party a ni tih chu tlang hriat a ni a, a nih lohzia sawi tum mah se a nihzia chu an chet danin a nemnghet vek tho. Hindu pathian a nih vang maiin bawng talh an khap a, a sa ei pawh an khap a, Hindu sakhaw duh dana kal an ni.

He Hindu party hi MNF hian an thlawp mai ni lovin a vote pawh an vote ta ngei mai a, hei vang hian BJP leh MNF hi a takin an thawk dun ta a ni.

Kum 2018 MLA inthlan lo awm turah pawh hian Indian President election lama inkawp tlat tawh MNF leh BJP hi an inkawp leh ngei hmel a, kohhran mi pangngai tan chuan Hindu party kawp a, lo ṭanpui hi chu a harsa viau ang.

Hei tak hi ZNP leh MPC lam tan advantage a ni thei thung. Amah­erawh­chu, tuna an awm dan mai mai hi chuan mipuiin sorkar zo turin an ring si lova, an party an tuai thar a, an in din thar viau a nih pawh chuan Zoram mipui hian an duh loh party pahnih aṭang hian an duh loh zawk rau raua an duh zawk an thlan a ngai leh dawn pawh a ni mai thei asin.

Mipuiin Congress aṭanga tlan chhiatna tur an neih chhun MNF berin BJP an vote ta ruau mai si a, ZNP leh MPC hian remchang lak dan thiam tak maw?

- Biakchungnunga