AW PATHIAN KAN RAM HI
An thau tung tung zel mai a ni kan hotute hi. Ram siam ṭhatna kawr min haktir ru, an ti a. Kan haktir kawrkilh peh ṭhawt khawpin an thau tak hi. Delhi pa in a kawr ṭha, mi retheite hak tura a sem laiin, kan hotute chuan Delhi tlang atanga rethei tanpuina lo lutte chu, kawr thar lei nan lo hmangin, an hak sen loh party workers an sem a, an sem an sem mai a ni.
Aw Pathian, heti hian kan vui thu kan sawi leh ringawt thin a, sawi sawi mah ila kan hotute thengthawng hi a khawih pha reng reng lo. Ram siam ṭhatna kawr kan haktir an hak theih tawh loh avanga thau tawhte hian. Mi retheite au thawm aiin, an lal ṭhutthleng bula music tum thiamte music tum, an beng dârah a ri a ring zawk tlat si a.
LALPA, kan pi leh pute kha he ram ṭha takah hian i hruai lut a, hei aia sik leh sa nuam hi khawvel hmun dangah a awm bik lo tih theih khawpa ram nuamah. Thlai chawm nana ruah tui chhenfakawm dawnna ramah hian. Thlan tui sen tam ngai lova mihring finna chhawr theia awm tawh tur kha. Ram dang mite awt reng rengin, thlan tui hnap tui nena kan thawh pawhin, hlawkna awm lo beidawnna ruamah, kan hotuten min hruai lut zel bawk si a.
Aw Pathian, an lalzia an lalzia mai chu maw, mipuite hi dawt min hrilh pawh an tim miah lo asin. Min bum a, min bum min bum mai a ni. Bum fin theih loh keini mipuite lah chu, an chil perah kan lo nui ang vur vur a.
Ram chu LALPA ta a ni ti siin, heti khawpa i ram min pek kan suasam avang em ni? Hri chhia leh tihdam theih loh natna in min tlakbuak tak. Mi thiamten kan leilung chhungrilah, thil hlu tam tak inphum anga an sawi laiin, chung thil hlute pawh chu a luang ral ta zawk nge tih pawh kan hriat tawh loh hi.
I thu thianghlimah heti hian kan hmu. Lal Davidan a fapa Solomona lal atan a ruat lai khan, "I thil tih apiang leh, i hawina lam apianga i hmuingil theih nan Mosia Dana ziak anga, LALPA i Pathianin a kawngte zawh tûr leh, a thuruat te, a thupêk te, a rorêlte leh a thuhriattirte pawh tûra thu a pekte hi zawm rawh(1 Lalte 2:3) tih thute.
Tihnuam tak leh thu awih taka in awm chuan, in rama thil thate hi in ei ang(Isaia 1:19) tih thute hi ka tan pawh i thu ruat a ni lawm ni?
Khawnge kan ram thil ṭha chu, kan hawina lam apianga hmuingilna aiin hlawhchhamna thing lu bulah kan dak ta zawk a nih hi. A tlaran zawng zela kal mek he ram hi chhan chhuak turin, Aw Pathian, nangin kan ram hi din thar leh ang che. AMEN.
- Lalrinliana Colney