MNF-in an image an thlak a ngai
Mizorama ruling party hian kum 10 te te ro an inrel chhawk ṭhin tih ni mah se, tuna a lan dan hi chuan MNF hian an image hi an thlak loh chuan tling zo turin an lang ta lo. Social media hi tehna tling lo, tehna ni lo thei si lo, tehna dik thei si a nih avangin kan Chief Minister leh MNF Minister chuam ṭhenkhat thlalak leh an thiltih comment tam zawk hi a negative avangin real life-ah hian a danglam tam lo ang tih a rin theih a ni.
Tun hnaia social media-in India rama politician-te hmalam hun leh an hun a nghawng dan (social media effects on real-life political participation) an zir chianaa lang chu social media hian dawt a sawi lo tih a ni. Han sawifiah dawn ta ila social media "trend" an tih hi a takah pawh 'trend' a ni ṭhin a, chu chu sawifiah leh kan tum chuan social media mipui thlek dan hian a tak ram a nghawng nasa hle tiin kan dah thei awm e.
Kum 2019 Lok Sabha Election ah khan Congress kha social media lamah khan an ṭang ulh (over-aggressive Congress IT cell) niin mithiamte chuan an sawi a, kha aia puitling zawk khan social media kha hmang ṭangkai se chu khati em em khan an che chhe lo tur tiin an sawi a ni. BJP ve thung hi social media hmang thiam em em an ni a, anni chuan Narendra Modi thusawi a nih tawh chuang a sang tel dawn hi a sawi mawi tur leh a pu darh tur an nei a, Rahul Gandhi thusawi ni se a lo nuihsawh leh lo sawisel tur "keyboard Warrior" hi BJP hian an nei ṭha an ti ṭhin a ni.
Hetiang taka zirchianna hi awm ve mah suh se, tunlaia Mizorama social media kan en chuan MNF hi negative zawnga comment an tam zawk a, hei hi MNF tan a ṭha lo. Chief Minister ve meuh si comment section pawh on ngam lovin Instagram lamah chuan a awm tawh hial a ni awm a, hengte hi nakin lawka an vote an zawn leh tur mipui hian an hre reng dawn a ni.
MNF tan chaun tun hi insiam ṭhat hun a ni a, kum 2022 chhungte hian an image hi an siam ṭha a nih loh chuan kum 2023 lama rorel tur khawpa invawrh tur chuan social hman tlemna bial, TV leh chanchinbu chhiar tlemna bial, mipuiin state ningkhawng an hriat vak lohna lamah MLA an ngah a ngai dawn a, tuna an image hi chu negative image a ni tih hai rual a ni si lo.
- John L Renthlei